1-2. (a) Bagi si itulis bas Kuan-kuanen 16:31, uga arusna perukurenta kerna turang senina si enggo metua? (b) Penungkunen kai saja kari sijawap bas artikel enda?

LIT sada taman bas Amerika Serikat, melala i je batu amparen. Situhuna batu-batu e banci ibentuk jadi berlian si seh kel ergana. Enterem kalak si reh ku je la kapna merga batu e perban la tehna kerna si e.

² Turang seninata si enggo metua bali bagi berlian si seh kel ergana e. Lit ikataken bas Pustaka maka uban kalak e bali bagi mahkota. (Baca Kuan-kuanen 16:31; 20:29) Tapi mon-mon la kita sadar maka kalak e erta si meherga. Situhuna adi sadar kita, banci sidat kai si ndauh ergan asangken berlian. Bas artikel enda, sijawap kari telu penungkunen enda: Engkai maka turang senina si enggo metua meherga akap Jahwe? Engkai maka turang senina si enggo metua penting bas organisasi Jahwe? Kai si banci silakoken gelah sidat manpaat arah usihen kalak e?

3. Bagi si itulis bas Masmur 92:12-15, engkai maka meherga akap Jahwe turang senina si enggo metua?

³ Meherga akap Jahwe turang senina si enggo metua. Tuhu-tuhu kel itandaiNa kalak e. TehNa kalak si uga kin kalak e, tehNa sipat-sipat kalak e si mehuli, janah si e meherga kel akapNa. Meriah ukur Jahwe adi ceritaken kalak e pengalamenna bas pelayanen man kalak si terngudan asangken ia. (Jop 12:12; Kua. 1:1-4) Ergai Jahwe ka sipat kalak e si megenggeng. (Mal. 3:16) Amin pe melala masalah si terjadi bas geluh kalak e, kiniteken kalak e man Jahwe tetap paguh. Arapen kalak e reh paguhna adi ibandingken ras sanga tangtangna kalak e erlajar kebenaren. Keleng ate Jahwe kalak e perban tetap beritaken kalak e  gelar Jahwe “amin pe enggo metua.”​—Baca Masmur 92:12-15.

4. Kai si banci mpegegehi turang seninata si enggo metua?

⁴ Adi enggo reh tuana kam, teklah kam maka inget Jahwe kerina kerja keras si enggo lakokenndu. (Heb. 6:10) Meriah ukur Bapakta si i surga ngidah kam perban enggo semangat kam ndukung dahin erberita. Enggo megenggeng kam ngadapi erbage-bage masalah, termasuk si erban ceda kel ukurndu. Enggo dalankenndu ras belandu patoken-patoken Pustaka. Setia kam ngelakoken tugas si penting bas organisasi Jahwe janah ajarindu ka kalak si deban. Asa ngasupndu terus usahakenndu gelah banci ngikutken erbage-bage perubahen si lit bas organisasi Jahwe. Dukungndu ka kalak si ngelayani sepenuh waktu. Meriah kel ukur Jahwe perban setia kam. Erjanji Ia maka “labo pagi tadingkenNa pelayanNa si setia.” (Ms. 37:28) Erjanji ka Ia, nina, “Seh ngasa bukndu mbentar, lalap pagi kam Kudukung.” (Jes. 46:4) Emaka, amin pe kam enggo reh tuana, ula akapndu kam la meherga bas organisasi Jahwe. Situhuna meherga kel kam!

5. Kai si arus iinget turang senina si enggo metua?

⁵ Turang senina si enggo metua penting kel bas organisasi Jahwe. Amin pe banci saja gegeh kalak e lanai bagi si mbarenda, tapi mbue pengalamen kalak e. Banci lalap gunaken Jahwe kalak e bas erbage-bage cara. Mari sinen buktina arah contoh si mbarenda ras si gundari.

6-7. Ceritaken contoh-contoh arah Pustaka kerna kalak si enggo metua si ipasu-pasu Jahwe perban setia.

⁶ Bas Pustaka, banci siidah contoh-contoh si mehuli arah umat Jahwe si setia amin pe enggo metua. Contohna Musa. Umurna kira-kira 80 tahun sanga mulai ia ngelayani Jahwe jadi nabi ras peminpin bangsa Israel. Si debanna eme Daniel. Banci saja umurna enggo 90-en tapi tetap gunaken Jahwe ia jadi nabiNa. Bage ka pe Rasul Johanes, si banci saja umurna kira-kira 90-en sanga igunaken Jahwe ia nulis buku Ketangkasen.

 ⁷ Bas Pustaka pe lit ka iceritaken kerna enterem umat Dibata si setia. Banci saja kalak e la terkenal janah nukah kita lupa nandangi kalak e. Tapi inget Jahwe nge kalak e janah upahiNa perban kalak e setia. Contohna Simeon. Amin pe ia “kalak si benar ras bujur,” sitik ngenca si ituriken kerna ia bas Pustaka. Tapi tandai Jahwe kel ia ras bereNa hak istimewa man bana eme banci idahna Jesus si mbaru lahir janah ernubuat ia kerna Jesus ras nandena. (Luk. 2:22, 25-35) Cuba ka ukuri kerna Nabiah Hanna si enggo janda. Umurna enggo 84 tahun tapi “la pernah tadingkenna rumah pertoton.” Pasu-pasu Jahwe ia perban ratur ia reh ku rumah pertoton janah bereNa ia kesempaten ngidah Jesus si mbaru lahir. Enda pasu-pasu si luar biasa! Simeon ras Hanna tuhu-tuhu meherga akap Jahwe.​—Luk. 2:36-38.

8-9. Kai si terus ilakoken turang seninata Didur bas organisasi Jahwe amin pe enggo mate dilakina?

⁸ Gundari pe enterem turang senina si enggo metua jadi usihen man kalak si terngudan. Contohna, turang senina Lois Didur. Sanga umurna 21 tahun, jadi perintis istimewa ia i Kanada. Kenca si e, ndekah ia ngelayani ras dilakina, John, bas dahin keliling. Dungna ngelayani kalak e bas Betel Kanada 20 tahun dekahna. Sanga umur Lois 58 tahun, iundang ia ras dilakina ngelayani bas Ukraina. Uga tanggapen kalak e? Metuasa nge akap kalak e bana ngelayani bas negri si deban? Lang. Nggit kalak e ngaloken tugas e janah ilantik me John jadi anggota Panitia Cabang i je. Pitu tahun kenca si e, mate John, tapi tetap denga Lois ngelayani bas tugasna. Gundari umur Lois 81 tahun, tapi tetap ia setia ngelayani janah keleng kel ate keluarga Betel Ukraina man bana.

⁹ Diberu-diberu si enggo janda bagi Lois banci saja lanai enterem kalak si mperdiatekenca adi ibandingken ras sanga nggeluh denga dilakina. Tapi labo ertina kalak e lanai meherga. Ergai Jahwe kel diberu-diberu si bage perban enggo idukungna dilakina ertahun-tahun dekahna, janah tetap kalak e setia ngelayani Jahwe. (1 Tim. 5:3) Selain si e, ipegegehi kalak e ka turang senina si terngudan.

10. Kai si banci sipelajari arah Tony?

¹⁰ Enterem turang seninata si enggo metua si tading sisada, kalak e pe meherga kel. Contohna turang seninata Tony. Sanga umurna 20 tahun, iperidiken ia bas bulan Agustus 1942 i Pennsylvania, Amerika Serikat. La ndekah kenca ia iperidiken, ipenjaraken ia dua setengah tahun dekahna perban la ia nggit ikut wajip militer. Ia ras diberuna Hilda mpebelin dua anakna bas kebenaren. Tony enggo pernah ngelayani bas telu runggun jadi pengawas umum (si gundari igelari koordinator  badan pertua). Pernah ka ia jadi pengawas pertemuan wilayah. Lit piga-piga waktu dekahna, reh ia ku penjara guna mandu perpulungen ras pelajaren Pustaka. Amin pe umur Tony enggo 98 tahun, tetap denga ia semangat ngelayani Jahwe. Lalap usahakenna mereken si mehulina bas ngelayani Jahwe radu ras turang senina si lit bas runggunna.

11. Uga carata ngergai turang senina si enggo metua?

¹¹ Pasti siergai ateta turang senina si enggo metua si sisada ngenca ia tading, ntah pe si tading ras keluargana si la Saksi. Uga carana? Adi banci, sampati pertua-pertua min kalak e gelah banci ikut perpulungen ras erberita. Banci ka sidahi kalak e ntah pe siundang ia ercakap-cakap arah video call. Arus kita ermediate man kalak e terlebih ka adi kalak e tading bas ingan si ndauh arah runggunna. Amin pe la banci sidahi kalak e, ula min silupaken kalak e. Sanga ercakap-cakap kita ras turang seninata si enggo metua, banci saja piga-piga arah kalak e lanai kapna penting ncakapken kerna ia. Tapi adi sabar kita nungkunisa ras sibegiken pengalamenna bas ngelayani Jahwe banci terpegegehi kel kita.

12. Kai si banci sidat adi siban waktuta ercakap-cakap ras turang senina si enggo metua bas runggunta?

¹² Bas runggunta, banci saja lit turang senina si enggo metua si jadi usihen man banta. Tapi banci siteh si e adi siban waktuta ras kalak e. Contohna, turang seninata si gelarna Hariet. * Setia ia ngelayani Jahwe puluhen tahun dekahna bas runggunna i New Jersey, Amerika Serikat. Bas pudi wari, pindah ia ku rumah anakna si diberu. Turang senina si lit bas runggunna si mbaru e rusur ngajak ia ercakap-cakap, janah dungna teh kalak e maka mbue kepeken usihen si mehuli arah ia. Ipegegehi Hariet kalak e alu nceritaken pengalamenna erberita mbarenda, kenca ia erlajar kebenaren tahun 1920-en. Sanga si e, rusur ibabana sikat gigi sanga erberita, perban banci kari itangkap ia ras ipenjaraken. Bas tahun 1933, lit dua kali ia itangkap janah sada minggu ia bas penjara. Paksa si e, dilakina si labo Saksi Jahwe ndukung ia. Dilakina si ngurus teluna anak kalak e sanga Hariet bas penjara denga. Jelas me, turang seninata si enggo metua bagi Hariet patut kel siergai!

13. Engkai maka turang senina si enggo metua penting akap Jahwe ras organisasiNa?

¹³ Turang seninata si enggo metua, penting kel akap Jahwe ras organisasiNa. Enggo gejapken kalak e pasu-pasu Jahwe ras idah kalak e uga Jahwe masu-masu organisasiNa alu erbage-bage cara. Enggo melala pelajaren penting sidat kalak e arah kesalahenna. Emaka anggaplah kalak e “sumber kepentaren” ras erlajarlah arah pengalamen kalak e. (Kua. 18:4) Adi siban waktuta guna nandai kalak e, kinitekenta banci reh paguhna janah mbue si banci sipelajari arah kalak e.

14. Bagi si ikataken bas Ulangen 32:7, kai si perlu ilakoken kalak si terngudan?

¹⁴ Kitalah si leben mperkuanken kalak si enggo metua. (Baca Ulangen 32:7.) Memang banci saja lanai jelas pengidah kalak e, lanai kalak e banci meter erkai pe, ras lanai megang sorana. Tapi situhuna perukuren kalak e nguda denga janah enggo banna “gelar si merim” i lebe-lebe  Jahwe. (Peng. 7:1) Teruslah siinget engkai maka iergai Jahwe kalak e. Teruslah siergai kalak e. Usihlah Elisa. Tetap temanina Elia seh ngasa kalak e sirang duana. Enda teridah arah kata-kata Elisa sanga lit telu kali katakenna bagenda man Elia, “Labo aku nggit nadingken kam.”​—2 Raj. 2:2, 4, 6.

15. Penungkunen kai saja si banci sisungkun man turang senina si enggo metua?

¹⁵ Buktiken man turang senina si tertuan maka merhat kita nandai kalak e terdeheren. (Kua. 1:5; 20:5; 1 Tim. 5:1, 2) Emaka, banci sisungkun kalak e bagenda, “Engkai maka nggit kam mpelajari kebenaren? Kai saja si pernah adapindu si erban kam reh rembakna ras Jahwe? Kai si erban kam tetap ermeriah ukur bas ngelayani Jahwe?” (1 Tim. 6:6-8) Kenca si e begikenlah cerita kalak e.

16. Kai manpaat si dat turang senina si enggo metua ras si terngudan adi ban kalak e waktuna ercakap-cakap?

¹⁶ Sanga ercakap-cakap turang senina si enggo metua ras turang senina si terngudan, kalak e banci dat manpaat. (Rom. 1:12) Si terngudan banci reh tekna maka perdiateken Jahwe nge umatNa, janah si enggo metua banci gejapkenna maka ia ikelengi. Pasti meriah ukur kalak si enggo metua nceritaken uga Jahwe masu-masu ia.

17. Engkai maka turang seninata si enggo metua reh dekahna reh jilena i lebe-lebe Jahwe?

¹⁷ Rupa si mejile banci dungna bene, tapi kalak si setia man Jahwe reh dekahna reh jilena. (1 Tes. 1:2, 3) Engkai maka banci bage? Perban enggo ertahun-tahun dekahna, turang senina si enggo metua nggit itegu-tegu kesah si badia Jahwe janah e nampati kalak e mpebelin sipat-sipat si mehuli. Adi reh bagesna sitandai kalak e janah reh buena kita erlajar arah kalak e, reh jelasna me siteh maka kalak e tuhu-tuhu meherga!

18. Kai kari sibahas bas artikel seterusna?

¹⁸ Runggun banci reh paguhna, adi turang senina si terngudan ras si tertuan radu-radu siergan. Emaka labo saja si nguda denga ngenca si perlu ngergai turang senina si tertuan. Bas artikel seterusna, sibahas kari uga carana turang senina si tertuan ngergai si terngudan.