1. Kai si banci ilakoken turang senina si enggo metua?

PERBAN kita reh tuana, banci saja mbiar kita reh sitikna si banci silakoken bas ngelayani Jahwe. Amin pe bage, banci sigunaken kepentarenta ras pengalamenta nampati turang senina si terngudan gelah erguna man organisasi Jahwe, ras ndatken terbuen tanggung jawap. Bagenda nina sekalak turang senina si enggo ndekah jadi pertua, “Perban aku enggo metua, lanai bagi si mbarenda buena si banci kulakoken. Emaka ngata bujur kel aku perban lit senina-senina si terngudan si banci ngelakoken dahinku e.”

2. Kai kari sibahas bas artikel enda?

² Bas artikel sebelumna enggo sibahas uga turang senina si terngudan ndatken manpaat arah si enggo metua. Bas artikel enda sibahas kari uga sipat meteruk ukur, meteh bana, meteh ngata bujur, ras nggit mere banci nampati turang senina si enggo metua kerja sama ras si terngudan. Alu bage, runggun pe dat pasu-pasu.

3. Bagi si ikataken Pilipi 2:3, 4, kai ertina meteruk ukur, janah kai hasilna adi sekalak jelma meteruk ukur?

³ Turang senina si enggo metua arus meteruk ukur adi sampatina atena si terngudan. Kalak si meteruk ukur ganjangen akapna kalak si deban asangken ia. (Baca Pilipi 2:3, 4.) Kalak si enggo metua si meteruk ukur tehna maka melala cara bas ndungi sada tugas janah cocok ras prinsip Pustaka. Emaka labo arapkenna kerina kalak ndungi sada  tugas bagi carana mbarenda. (Peng. 7:10) Banci sampatina si terngudan alu nceritaken kai si enggo pelajarina. Tapi arus ka inget kalak e maka “keadan si lit bas doni enda sangana berubah” janah banci saja perlu pelajarina cara si mbaru.​—1 Kor. 7:31.

4. Uga pertua keliling ngusih perukuren kalak Lewi?

⁴ Turang senina si enggo metua si meteruk ukur tehna maka lanai bagi si mbarenda buena si banci lakokenna. Contohna pertua keliling. Sanga umurna enggo 70 tahun, isuruh ia ngelakoken tugas si deban. Banci saja mesera kapna ngelakoken tugas si mbaru e. Engkai? Perban meriah kel kapna ngelakoken tugasna si sedekah enda, janah merhat denga ia ngelakokenca. Tapi tehna maka ulin nge kalak si terngudan si ngelakokenca. Emaka seri perukurenna bagi kalak Lewi bas Israel mbarenda. Sanga umur kalak Lewi enggo 50 tahun, lanai kalak e banci ngelayani bas kemah ingan ersembah. Tapi tetap meriah ukur kalak e la soal tugas kai pe si ibereken man kalak e. Semangat kalak e ngelakoken kai si itugasken man bana janah sampatina kalak si terngudan. (Bil. 8:25, 26) Gundari pe, pertua keliling si umurna enggo 70 tahun lanai ngelayani ku runggun-runggun. Tapi tetap melala penampat ras pergegeh si banci bereken kalak e man runggun inganna itugasken.

5. Kai si banci sipelajari arah Dan ras Katie?

 ⁵ Cuba siukuri usihen arah turang seninata si gelarna Dan, si enggo 23 tahun ngelayani jadi pertua keliling. Sanga umurna 70 tahun, ia ras diberuna, Katie, itugasken jadi perintis istimewa. Kai si lakoken kalak e gelah meriah ukurna bas tugasna si mbaru? Ikataken Dan maka la pernah ia bagi si gundari sibukna! Melala tanggung jawapna bas runggun, sampatina turang senina si dilaki gelah ncukupi syarat jadi sinampati runggun, ras sampatina kalak si deban erberita bas kota-kota bage pe bas penjara. Man bandu turang senina si enggo metua, banci denga nge sampatindu kalak si deban la soal kam ngelayani sepenuh waktu ntah lang. Uga carana? Usahakenlah gelah tetap meriah ukurndu bas tugasndu si mbaru. Banlah tujun si mbaru. Ukurilah kai si banci ilakokenndu, labo si la banci ilakokenndu.

6. Engkai maka perlu kita meteh bana? Ban perumpamanna.

⁶ Kalak si meteh bana la arapkenna lebihen asangken kai si banci lakokenna. Emaka banci ia tetap ermeriah ukur ras semangat ngelakoken kai si banci ilakokenna. Kalak si meteh bana banci sipeseri bagi supir si sangana maba motor i dalan si nangkeng-nangkeng. Perlu iturunken supir e gigi motorna gelah banci motorna e terus erdalan ku datas. Memang, banci saja reh meletna motorna e, tapi motorna e banci terus erdalan. Bage ka pe kalak si meteh bana, itehna ndigan ‘nurunken gigina’ alu bage banci ia terus ngelayani Jahwe ras nampati kalak si deban.​—Pil. 4:5.

7. Kai buktina Barsilai meteh bana?

⁷ Cuba ukuri contoh arah Barsilai. Umurna enggo 80 tahun sanga iundang Raja Daud ia tading bas istanana. Perban Barsilai meteh bana la ia nggit ikut ras raja. Teh Barsilai lanai mbue si banci ilakokenna, emaka suruhna Kimham kalak si terngudan nggantiken ia. (2 Sam. 19:35-37) Bali bagi Barsilai, turang senina si enggo metua pe banci ermeriah ukur adi berekenna kesempaten man kalak si terngudan guna ngelakoken tugas tertentu.

8. Kai buktina Raja Daud meteh bana?

⁸ Raja Daud pe contoh si luar biasa bas ncidahken sipat meteh bana. Merhat kel ia mbangun rumah pertoton Jahwe. Tapi sanga ikataken Jahwe maka Salomo pagi si mbangun rumah pertoton e, nggit Daud ngaloken keputusen Jahwe, janah dukungna proyek e alu bulat ukur. (1 Kro. 17:4; 22:5) Labo akap Daud maka pasti ulin ia si mbangun rumah pertoton e perban Salomo “nguda denga janah la lit pengalamenna.” (1 Kro. 29:1) Iteh Daud maka proyek pembangunen e banci dung perban pasu-pasu Jahwe, labo perban umur ntah pe pengalamen kalak si minpinsa. Gundari pe bali bagi Daud, turang senina si enggo metua banci tetap semangat amin pe tugas kalak e berubah. Iteh kalak e ka maka pasti ipasu-pasu Jahwe kalak si terngudan si ngelakoken tugas kalak e.

9. Kai buktina Shigeo meteh bana?

⁹ Gundari pe, lit contoh si mehuli kerna kalak si meteh bana eme Shigeo. Bas tahun 1976, sanga umurna 30 tahun, ilantik ia jadi anggota Panitia Cabang. Bas tahun 2004 ia jadi koordinator Panitia Cabang. Dungna, tehna maka lanai  bagi si mbarenda ia gegehna janah lanai bagi si mbarenda terna ia erdahin. Emaka totokenna kerna si e janah ukurina kai manpaatna adi kalak si terngudan si ndahiken tugasna e. Gundari Shigeo lanai jadi koordinator Panitia Cabang, amin pe bage tetap denga ia ngelayani jadi anggota Panitia Cabang. Emaka, kai si banci sipelajari arah usihen Barsilai, Raja Daud, ras Shigeo? Kalak si meteruk ukur ras meteh bana si iperdiatekenna eme kai si banci ilakoken kalak si terngudan, labo kai si la banci ilakoken kalak e. Anggapna kalak si terngudan temanna erdahin, labo saingenna.​—Kua. 20:29.

10. Uga nge arusna tanggapen turang senina si enggo metua nandangi kalak si terngudan bas runggun?

¹⁰ Turang senina si enggo metua anggapna kalak si terngudan pemere arah Jahwe. Ngata bujur kel kalak e nandangi kai si ilakoken kalak si terngudan. Sanga gegeh kalak e reh urakna, ngata bujur kel kalak e perban kalak si terngudan nggit nggunaken gegehna ngelayani bas runggun.

11. Bagi si ikataken bas Rut 4:13-16, kai pasu-pasuna perban nggit Naomi isampati Rut si ngudan asangken ia?

¹¹ Bas Pustaka lit contoh si luar biasa arah kalak si enggo metua eme Naomi. Nggit ia ngaloken penampat arah kalak si terngudan. Kenca mate anak Naomi, isuruhna gelah permenna Rut mulih ku keluargana. Tapi la nggit Rut nadingken Naomi janah ikut atena mulih ku Betlehem ras ia. Meriah kel ukur Naomi perban nggit Rut nemani ia, janah nggit ka ia ngaloken penampat Rut. (Rut 1:7, 8, 18) Perban si e, luar biasa kel pasu-pasu si  aloken Naomi ras Rut. (Baca Rut 4:13-16.) Gundari pe, turang senina si metua si meteruk ukur nggit ngusih Naomi.

12. Kai buktina Rasul Paulus meteh ngata bujur?

¹² Rasul Paulus pe ngata bujur perban penampat si alokenna. Contohna, ngata bujur Paulus man kalak Kristen i Pilipi perban bereken kalak e penampat man bana. (Pil. 4:16) Ngata bujur ka ia perban sampati Timotius. (Pil. 2:19-22) Ngata bujur ka Paulus man Dibata perban reh turang senina mpegegehi ia sanga ia bas perdalanen ku Roma selaku tahanen. (Perb. 28:15) Paulus kalakna semangat kel, enggo lit ribun kilometer dauhna perdalanenna guna erberita ras mpegegehi runggun-runggun. Tapi e labo erban ia mela ngaloken penampat arah turang seninana.

13. Uga carana turang senina si enggo metua ngata bujur man kalak si terngudan?

¹³ Man kam turang senina si enggo metua, banci buktikenndu maka ngata bujur kam man kalak si terngudan si lit bas runggunndu. Misalna, adi nggit kalak e nampati kam belanja, ngelegi kam gelah banci ikut pulung ras naruhken kam mulih, ntah pe nampati keperlun si deban, alokenlah penampat kalak e. Ingetlah, penampat kalak e eme salah sada cara Jahwe engkelengi kam. Dungna, banci saja kompak kam ras kalak si nampati kam e. Teruslah usahaken nampati kalak e reh rembakna ras Jahwe. Kataken ka maka meriah ukurndu ngidah kalak si terngudan nggit mereken terbuen bas runggun. Banlah waktundu ngerana-ngerana ras kalak e guna nceritaken pengalamenndu. Adi bage banndu, e ertina ‘terus katakenndu bujur’ man Jahwe perban enggo tarikNa kalak si terngudan ku runggun.​—Kol. 3:15; Joh. 6:44; 1 Tes. 5:18.

14. Kai buktina Raja Daud nggit mere?

¹⁴ Arah Raja Daud pe banci ka sipelajari sipat si penting si debanna eme nggit mere. Sipat enda perlu iusih turang senina si enggo metua. Bereken Daud melala sen ras barang-barang si merga guna ndukung pembangunen rumah pertoton. (1 Kro. 22:11-16; 29:3, 4) Nggit ia ndukung pembangunen e amin pe dungna rumah pertoton e igelari rumah pertoton Salomo. Gundari pe, amin gia lanai kita megegeh, banci denga sidukung dahin pembangunen organisasi. Misalna banci sisumbangken senta. Selain si e, banci ka sisampati kalak si terngudan alu nceritaken pengalamenta man bana.

15. Kai buktina Rasul Paulus nggit mere man Timotius?

¹⁵ Cuba siukuri usihen arah Rasul Paulus si nggit mere. Ajakna Timotius gelah ikut ras ia erberita ku ingan-ingan si ndauh. Meriah ukur Paulus ngajari Timotius si nguda denga kerna uga carana erberita ras ngajar. Enda buktina Paulus nggit mere. (Perb. 16:1-3) Perban enggo iajari Paulus, enggo beluh Timotius erberita ras ngajar. (1 Kor. 4:17) Dungna, ipake Timotius ka cara-cara si enggo pelajarina arah Paulus guna ngajari kalak si deban.

16. Engkai maka nggit Shigeo ngajari kalak si deban?

¹⁶ Gundari pe turang senina si enggo metua nggit ngajari si terngudan ngelakoken tugasna si mbarenda bas runggun. La kalak e mbiar lanai pagi erguna adi tugasna ilakoken kalak si terngudan. Contohna Shigeo si enggo iceritaken ndai.  Terus iajarina anggota Panitia Cabang si terngudan asangken ia. Si e ilakokenna enggo ertahun-tahun dekahna, perban si pentingna akapna eme pendahin Kerajan bas negri inganna ngelayani terus maju. Hasilna, sanga lanai ia banci jadi koordinator Panitia Cabang, enggo lit si banci nggantiken ia. Lebih 45 tahun dekahna Shigeo jadi anggota Panitia Cabang janah terus gunakenna pengalamenna nampati turang senina si terngudan. Turang senina si bali bagi Shigeo, tuhu-tuhu pasu-pasu man umat Dibata!

17. Bagi prinsip si lit bas Lukas 6:38, kai si banci ilakoken turang senina si enggo metua?

¹⁷ Turang senina si enggo metua, kam me buktina maka cara si mehulina bas ndalani geluh eme ngelayani Jahwe alu setia ras erkiniteken. Usihen si ibanndu mbuktiken maka mbelin kel gunana mpelajari prinsip-prinsip Pustaka ras ndalankenca. Amin pe tehndu uga carana ndungi sada tugas arah pengalamenndu, tapi nggit kam mpelajari cara si mbaru perban situasi enggo berubah. Turang senina si enggo metua si mbaru iperidiken pe banci nampati kalak si deban alu erbage-bage cara. Banci ceritakenndu uga riahna ukurndu gundari perban enggo tandaindu Jahwe. Pasti meriah ukur kalak si terngudan megiken pengalamenndu ras ndatken pelajarenna. Adi ‘terus kam mere’ alu nceritaken pengalamenndu, pasti bere Jahwe melala pasu-pasu man bandu.​—Baca Lukas 6:38.

18. Uga carana si metua ras si terngudan sisampat-sampaten?

¹⁸ Man bandu turang senina si tertuan, adi reh kompakna kam ras turang senina si terngudan, banci kena sisampat-sampaten. (Rom. 1:12) Tiap kalak, lit kelebihenna masing-masing. Kam si tertuan, lit bas kam kepentaren ras pengalamen si enggo datndu segedang geluhndu. Kam si terngudan, lit bas kam gegeh. Adi kompak kita kerina kerja sama, sibereken me kepujin man Bapakta si perkeleng si lit i surga, janah enda jadi pasu-pasu man kerina kalak bas runggun.