1-2. Kai si inubuatken Nabi Hagai si terjadi bas jamanta?

“BAS piga-piga menit saja, mulai sontaren toko-toko ras bangunen si enggo ndekah.” “Kerina kalak panik . . . Enterem kalak ngatakenca lit dua menit dekahna ingan e mugur-ugur. Tapi adi aku seh kel kuakap dekahna.” Bage me nina piga-piga kalak si selamat arah gempa si terjadi bas Nepal tahun 2015. Adi lit pengalamen si bage si erban kam trauma, banci saja la terlupakenndu.

² Situhuna gundari pe kita sangana iugur-ugur, tapi labo bas sada kota ntah pe bas sada negri ngenca. Kerina bangsa si lit i doni sangana iugur-ugur, janah enda enggo ndekah terjadi. Mbarenda, pernah inubuatken Nabi Hagai kerna keadan si mugur-ugur enda. Itulisna, “Bagenda nina Jahwe penguasa malekat, ‘Sekali nari, lanai ndekah, Kuugur langit ras doni bage pe laut ras daraten.’”​—Hag. 2:6.

3. Kai bedana kejadin si mugur-ugur e ras gempa?

³ Keadan si mugur-ugur si inubuatken Hagai e labo bagi gempa si erban hancur, tapi mereken hasil si mehuli. Bagenda nina Jahwe, “Kuugur pagi kerina bangsa, masuk pagi erta si merga arah kerina bangsa ku rumah e. Kudemi pagi rumah enda alu kemulian.” (Hag. 2:7) Uga nubuat e terjadi bas jaman Hagai? Janah uga nubuat e terjadi bas jamanta? Sibahas kari jawapenna janah sipelajari ka kari uga carana gelah banci kita ikut bas dahin ngugur bangsa-bangsa.

4. Engkai maka isuruh Jahwe Nabi Hagai ndahi umatNa?

⁴ Ibereken Jahwe tugas si penting man Hagai. Cuba  ukuri kai si terjadi sope ilakoken Hagai tugas e. Bas tahun 537 SM, sada kelompok kalak Jahudi si setia mulih ku Jerusalem kenca itaban i Babilon. Banci saja Hagai pe ikut ras kalak e. La ndekah kenca seh kalak e bas Jerusalem, bangun kalak e rumah Jahwe ntah pe rumah pertoton. Tapi kitik kel ukur kalak e perban lit tentangen. (Esa. 3:8, 10) La ndekah kenca si e, ngadi kalak e mbangun rumah pertoton. (Esa. 4:4; Hag. 1:1, 2) Emaka bas tahun 520 SM, isuruh Jahwe Nabi Hagai mpegegehi ras ngiahken kalak e guna ndungi rumah pertoton e. *​—Esa. 6:14, 15.

5. Engkai maka berita si ipeseh Hagai banci mpegegehi umat Dibata?

⁵ Ipeseh Hagai berita arah Jahwe man kalak Jahudi si sangana kitik ukur gelah paguh kinitekenna man Jahwe. Bagenda nina Hagai, “Nina Jahwe ka, ‘O umatKu, pegegehilah diri kena janah dahikenlah. Sebap Aku kap ras kena,’ nina Jahwe penguasa malekat.” (Hag. 2:4) Kata-kata “Jahwe penguasa malekat” pasti mpegegehi kalak e. Jahwe erkuasa nandangi malekat-malekat si la tanggung buena. Emaka adi berhasil ate kalak Jahudi arus iandalkenna Jahwe.

6. Kai si terjadi kenca ipeseh Hagai berita arah Jahwe?

⁶ Bereken Jahwe perentah man Hagai guna mpeseh berita maka iugur-ugurNa ateNa kerina bangsa. Enda erban kalak Jahudi tek maka nandangi iugur Jahwe me Persia, penguasa doni paksa si e. Kai hasilna? Pertama, umat Jahwe banci ndungi pembangunen rumah pertoton e. Kenca si e, kalak si labo Jahudi pe ikut nembah Jahwe bas rumah pertoton e. Berita enda tuhu-tuhu mpegegehi umat Jahwe!​—Sak. 8:9.

7. Bas dahin kai nge kita ikut gundari? Jelasken.

⁷ Uga nubuat Hagai e terjadi bas jamanta? Sekali nari iugur Jahwe me kerina bangsa janah enda me waktuna ikut kita bas dahin e. Cuba ukuri enda: Bas tahun 1914, enggo ilantik Jahwe Jesus Kristus jadi Raja bas KerajanNa i surga, janah Kerajan e enggo mulai merentah. (Ms. 2:6) Enda berita si la mehuli man peminpin-peminpin si lit i doni perban e ertina “waktu si itetapken man bangsa-bangsa” enggo keri. (Luk. 21:24) Banci ka ikataken maka enggo dung masa sanga la lit penguasa si jadi wakil Jahwe. E me sebapna mulai tahun 1919, iberitaken umat Jahwe maka Kerajan Dibata ngenca si banci ndungi masalah kerina kalak. Dahin mberitaken “berita si meriah kerna Kerajan” enda enggo ngugur kerina doni.​—Mat. 24:14.

8. Bagi si ikataken bas Masmur 2:1-3, uga tanggapen melala bangsa nandangi beritata?

⁸ Uga tanggapen kalak nandangi berita e? Teremen kalak la senang megi berita e. (Baca Masmur 2:1-3.) Lanai tenang bangsa-bangsa. Berita Kerajan si ipeseh e la ianggap kalak e berita si meriah. Piga-piga pemerentah pe ngelarang dahin erberita. La kalak e nggit ngaloken Raja si ilantik Jahwe, perban mbiar kalak e lanai kari ia jadi penguasa. Padahal enterem arah kalak e ngaku ngelayani Dibata. Emaka bali bagi penguasa-penguasa bas jaman Jesus, penguasa si gundari pe nulak Raja si ilantik Jahwe  alu nyerang pengikutna si setia.​—Perb. 4:25-28.

9. Uga tanggapen Jahwe nandangi penguasa-penguasa arah bangsa-bangsa si la nggit megiken beritata?

⁹ Uga tanggapen Jahwe nandangi penguasa-penguasa arah bangsa-bangsa si la nggit megiken beritata? Jawapenna lit bas Masmur 2:10-12 si ngataken, “Gundari, o raja-raja, pentarlah kam, o hakim-hakim si lit i doni, alokenlah persinget. Mbiarlah man Jahwe janah sembahlah Ia, ermeriah ukurlah janah hamatilah Ia. Muliakenlah anak e gelah ula merawa Dibata janah la kena ikernepken, sebap rawaNa e banci rempet gara. Ermeriah ukurlah kalak si erlindung man baNa.” Jahwe tetap mehuli man kalak e, berekenNa waktu man kalak e guna erban keputusen si benar. Lit denga waktu erban perubahen ras ndukung Kerajan Dibata. Tapi, waktuna kentisik nari ngenca perban kita nggeluh bas “wari-wari pendungi.” (2 Tim. 3:1; Jes. 61:2) Keputusen si pentingna si arus iban kerina kalak gundari eme meteh kebenaren ras milih guna ngelayani Jahwe, perban waktuna enggo nandangi keri.

10. Menurut Hagai 2:7-9, kai hasil arah dahin ngugur-ugur si inubuatken nabi e?

¹⁰ Mehuli tanggapen piga-piga kalak man berita si ipeseh Hagai. Ikataken Hagai kai hasil arah berita si ngugur e eme “erta si merga [kalak si meteruk ukur] arah kerina bangsa” dungna nembah Jahwe. * (Baca Hagai 2:7-9.) Jesaya ras Miha pe pernah mpeseh berita si seri si terjadi bas “wari-wari pendungi.”​—Jes. 2:2-4; Mi. 4:1, 2.

11. Kai si ilakoken sekalak turang seninata sanga tangtangna begina berita kerna Kerajan?

¹¹ Cuba perdiateken pengalamen turang seninata Ken, si ngelayani bas kantor pusat Saksi-Saksi Jahwe. Ingetna denga ngasa gundari uga perasanna sanga  tangtangna begina berita kerna Kerajan kira-kira 40 tahun si lewat. Nina Ken, “Sanga tangtangna kubegi kebenaren arah kata Dibata, ngata bujur kel aku perban banci kuteh maka kita nggeluh bas wari-wari pendungi. Kuteh ka maka gelah ngena ate Dibata aku ras kudat kegeluhen si rasa lalap, aku la banci jadi bagin arah doni enda janah arus aku erpihak man Jahwe. Mis kutotoken kerna si e. Lanai aku jadi bagin arah doni enda janah erlindung aku bas Kerajan Dibata si ndigan pe la banci mugur-ugur.”

12. Uga rumah pertoton Jahwe secara rohani enggo dem alu kemulian bas wari-wari pendungi enda?

¹² Enggo ibuktiken Jahwe maka ipasu-pasuNa umatNa. Bas wari-wari pendungi enda, melala kel kalak si enggo mulai nembah Jahwe. Bas tahun 1914, ribun kalak ngenca si nembah Jahwe. Gundari enggo lebih waluh juta kalak si semangat nembah Dibata, janah tiap tahun lit ka jutan kalak si ikut ras kita ngerayaken wari Peringet-ingeten Kematen Jesus. Alu bage, halamen rumah pertoton Jahwe si lit i doni enggo dem alu “erta si merga arah kerina bangsa.” E ertina reh teremna kalak si nembah Jahwe alu cara si benar. Gelar Jahwe pe imuliaken perban iban kalak e perubahen alu makeken sipat-sipat si mbaru.​—Ep. 4:22-24.

13. Bas ayat si apai ka inubuatken kerna umat Jahwe si reh teremna? (Nen gambar sampul.)

¹³ Kerna kalak si nembah Jahwe si reh teremna e pe lit inubuatken bas Jesaya 60. Contohna bas ayat 22, nina, “Si sitik jadi seribu pagi, si kitik jadi bangsa si mbelin. Aku, Jahwe si erbanca meter bas waktuna.” Perban reh teremna kalak si nembah Jahwe, hasilna luar biasa kel. Kalak si mbaru ikut nembah Jahwe si bali bagi “erta si merga,” erbage-bage kengasupenna, janah kalak e pe semangat mberitaken “berita si meriah kerna Kerajan.” Ipake kalak e kengasupenna guna ndukung kegiaten umat Jahwe. Jadi, bali bagi si ikataken Jesaya maka ‘bangsa-bangsa me si nikapken keperlun’ umat Jahwe. (Jes. 60:5, 16) Alu  penampat turang senina si mbaru e, dahin erberita banci ilakoken bas 240 negri, ras baca-bacanta banci iterbitken bas lebih 1.000 bahasa.

14. Keputusen kai si arus iban kerina kalak gundari?

¹⁴ Perban bangsa-bangsa enggo iugur-ugur bas wari-wari pendungi enda, kerina kalak arus erban keputusen: Nggit nge kalak e ndukung Kerajan Dibata ntah andalkenna pemerentahen si lit bas doni enda? Tiap kalak arus erban keputusen si penting e. Amin pe Saksi Jahwe patuh man undang-undang pemerentah si lit bas inganna tading, tetap kalak e netral bas urusen politik doni enda. (Rom. 13:1-7) Teh kalak e maka Kerajan Dibata ngenca si banci ndungi masalah manusia. Kerajan e labo bagin arah doni enda.​—Joh. 18:36, 37.

15. Bagi si ikataken bas buku Ketangkasen, ujin kai si nandangi siadapi?

¹⁵ Arah buku Ketangkasen, banci siteh maka kesetian umat Dibata iuji bas wari-wari pendungi. Reh rusurna me kita itentang ras ianiaya. Ipindo pemerentahen doni enda pagi gelah sidukung kalak e. Adi la kita nggit ndukungsa, isiksana me kita. (Ket. 13:12, 15) “Kerina jelma ipaksana ngaloken tanda bas tan kanan kalak e ntah pe bas perdempaken kalak e, eme kalak si biasa-biasa saja, kalak si penting, kalak bayak, kalak mesera, kalak si bebas, ntah pe budak.” (Ket. 13:16) Mbarenda, budak-budak biasana lit tanda bas ia si ncidahken ia budak ise. Bage ka pe gundari, iarapken doni enda gelah kerina kalak tempa-tempa lit tanda bas tanna ntah pe bas perdempakenna. Arah perukuren ras perbahanenna arus teridah pemerentahen si apai si idukungna.

16. Engkai maka arus sipastiken gundari guna tuhu-tuhu setia man Jahwe?

¹⁶ Sialoken nge pagi tanda e janah sidukung nge pagi pemerentahen si lit bas doni enda? Adi la sialoken tanda e, siadapi pagi kesusahen ras bahaya, perban bas buku Ketangkasen pe ikataken bagenda, “Ise pe la banci nukur ntah pe ndayaken, selain kalak si lit tandana e.” (Ket. 13:17) Tapi arah Ketangkasen 14:9, 10, iteh umat Dibata maka ihukum Dibata pagi kalak si ngaloken tanda e. Emaka la nggit umat Dibata ngaloken tanda e. Tempa-tempa bagenda itulis kalak e bas tanna: “Jang Jahwe.” (Jes. 44:5) Gundari me waktuna sipastiken maka tuhu-tuhu kita setia man Jahwe. Alu bage, meriah pagi ukur Jahwe ngakuisa maka jangNa kap kita!

17. Kai si perlu siinget kerna kesabaren Jahwe?

¹⁷ La tanggung sabarna Jahwe sedekah wari-wari pendungi enda, perban la ateNa sekalak pe ikernepken. (2 Pet. 3:9) BerekenNa waktu man kerina kalak guna ertobat ras nembah Ia. Tapi kesabaren Jahwe lit batasna. Kalak si la nggit ertobat ras nembah Jahwe, ikernepken pagi bagi raja Mesir bas jaman Musa. Pernah ikataken Jahwe man raja Mesir bagenda, “Banci Kupake kuasaKu guna ngukum kam ras rakyatndu alu penakit si mekelek. Alu bage masap kena arah doni enda nari. Tapi, Kupediat kam tetap nggeluh gelah banci Kucidahken kuasaKu man bandu, gelah itandai kalak gelarKu i belang-belang doni.” (Kel. 9:15, 16) Kerina pagi bangsa meteh maka Jahwe ngenca Dibata  si benar. (Esek. 38:23) Kai kin pagi si ilakoken Jahwe?

18. (a) Bagi si ikataken bas Hagai 2:6, 20-22, kai nge maksudna si iugur-ugur e? (b) Ja nari banci siteh maka kata-kata Hagai e terjadi pagi bas masa depan?

¹⁸ Ertahun-tahun kenca mate Hagai, ikataken Rasul Paulus man kalak Kristen i Heber maka kata-kata si lit bas Hagai 2:6, 20-22 terjadi pagi bas masa depan. (Baca.) Itulis Paulus bagenda, “Gundari enggo erjanji Ia, ‘Sekali nari Kuugur doni, labo saja doni, tapi langit pe.’ Kata ‘sekali nari’ ncidahken maka kernepken Dibata kai si mugur-ugur si labo Ia erbanca, emaka si la mugur-ugur e tetap nge lit.” (Heb. 12:26, 27) Si iugur-ugur bas ayat enda, la seri ras si ikataken bas Hagai 2:7. Si iugur i jenda maksudna eme kalak si bali bagi raja Mesir si la nggit ndukung pemerentahen Jahwe, ikernepken pagi kalak e seh rasa lalap.

19. Kai pagi si la banci ndigan pe mugur-ugur janah ja nari banci siteh?

¹⁹ Kai pagi si la mugur-ugur ntah pe si la ikernepken? Nina Paulus ka, “Perban sialoken Kerajan si la banci mugur-ugur, teruslah sialoken kiniulin Dibata si luar biasa si nampati kita mereken pelayanen si badia man baNa alu mbiar ras mehamat sesuai ras cara si erban Ia senang.” (Heb. 12:28) Payo, sanga dahin guna ngugur-ugur si terakhir enggo dung, Kerajan Dibata ngenca pagi si tetap lit janah ndigan pe la banci mugur-ugur!​—Ms. 110:5, 6; Dan. 2:44.

20. Keputusen si penting kai si arus iban kerina kalak, janah uga carata nampati kalak e?

²⁰ Gundari lanai waktuna tertaren-taren! Kerina kalak arus erban pilihen: Adi ipilih kalak e terus ndukung doni enda, ikernepken pagi kalak e. Adi ipilih kalak e ngelayani Jahwe ras erban perubahen guna ngelakoken peratenNa, dat kalak e pagi kegeluhen si rasa lalap. (Heb. 12:25) Arah dahin erberita, banci sisampati kalak erban keputusen si penting e. Emaka sisampatilah kalak guna ndukung Kerajan Dibata. Selain si e, teruslah siinget kata-kata Tuan Jesus enda, “Berita si meriah kerna Kerajan e iberitaken pagi man manusia i belang-belang doni guna kesaksin man kerina bangsa, kenca si e reh kedungen e.”​—Mat. 24:14.