1. Uga nge ninta banci ngelebuh Jahwe?

Anggota keluarga Jahwe eme kerina si nembah Ia, termasuk Jesus “si pertama iciptaken Dibata arah kerina si ciptakenNa,” ras malekat-malekat si seh kel buena. (Kol. 1:15; Ms. 103:20) Sanga Jesus i doni, sampatina kalak si erkiniteken gelah angkai kalak e maka banci lebuh kalak e Jahwe bapakna. Sanga ngerana ia ras murid-muridna, ikataken Jesus maka Jahwe e “Bapakku bage pe Bapak kena.” (Joh. 20:17) Sanga sibaktiken geluhta man Jahwe ras iperidiken, kita enggo jadi sada keluarga ras turang seninata si perkeleng.​—Mrk. 10:29, 30.

2. Kai kari sibahas bas artikel enda?

² Piga-piga kalak mesera kapna mbayangken Jahwe e bagi sekalak Bapak si perkeleng. Si debanna ka, la tehna uga cara ncidahken kekelengen man turang seninana. Bas artikel enda sibahas kari kai si ilakoken Jesus guna nampati kita gelah sianggap Jahwe e bagi Bapak si perkeleng. Sipelajari ka kari uga carata ngusih kekelengen Jahwe man turang seninata.

3. Uga contoh pertoton si ajarken Jesus banci nampati kita rembak ras Jahwe?

³ Jahwe e Bapak si perkeleng. Ate Jesus bali min perukurenta ras ia kerna Jahwe. Atena sianggap min Jahwe bagi orang tua si perkeleng si nukah ndeherisa, labo bagi sekalak penguasa si nuruh ngenca tehna. Banci siteh kerna si e arah cara Jesus ngajari murid-muridna ertoto. Bas toto si ajarkenna e ibenakenna alu kata-kata, “O Bapak kami.” (Mat. 6:9) Situhuna banci nge ajari Jesus kita gelah silebuh Jahwe e “Si Madakuasa,” “Si Nciptaken,” ntah pe “Raja si  rasa lalap,” sebap kerina istilah e ipake nge man Jahwe. (Kej. 49:25; Jes. 40:28; 1 Tim. 1:17) Tapi, ate Jesus si lebuh min Jahwe e “Bapak.”

4. Ja nari siteh maka ate Jahwe rembak min kita ras Ia?

⁴ Mesera nge kapndu mbayangken Jahwe bagi sekalak Bapak si perkeleng? Piga-piga arah kita bage. Adi bapakta la mehuli banci saja mesera siakap mbayangken sekalak bapak si perkeleng. Adi bage si gejapkenndu, ula kitik ukurndu. Sebap, angkai Jahwe uga perasanndu ras engkai maka bage perasanndu. Merhat Ia rembak ras kam. Arah Pustaka undangNa kita, nina, “Rembakkenlah diri kena ku Dibata, emaka rembakkenNa ka diriNa man kena.” (Jak. 4:8) Keleng nge ate Jahwe kam janah nggit Ia jadi Bapak si mehulina man bandu.

5. Menurut Lukas 10:22, uga cara Jesus nampati kita gelah rembak ras Jahwe?

⁵ Banci sampati Jesus kita gelah rembak ras Jahwe. Itandai Jesus kel uga Bapakna e janah banci usihna sipat-sipatNa alu sempurna. Emaka banci bagenda nina, “Ise si enggo ngidah aku, enggo idahna Bapak.” (Joh. 14:9) Jesus bali bagi anak sintua si banci ngajari kita uga carana ngergai Bapakta ras patuh man baNa. Ajarina ka kita kerna kai si arus silakoken gelah meriah ukur Bapakta ras ndatken jadi ateNa. Tapi banci siteh Jahwe e mehuli kel ras perkeleng khususna arah kegeluhen Jesus sanga i doni. (Baca Lukas 10:22.) Mari sibahas piga-piga contohna.

6. Bereken contohna uga cara Jahwe megiken toto Jesus.

⁶ Nggit Jahwe megiken anakNa. Cuba siperdiateken cara Jahwe megiken Jesus anakNa sintua. Sanga anakNa e i doni denga rusur begikenNa totona. (Luk. 5:16) BegikenNa ka toto Jesus sanga ibanna atena keputusen si penting, misalna sanga pilihna atena 12 rasul-rasulna. (Luk. 6:12, 13) Begiken Jahwe ka toto Jesus sanga kuatir kel ia. Ope lenga Jesus ihianati  Judas, ertoto Jesus man Bapakna kerna kai si nandangi terjadi man bana. Labo terjeng begiken Jahwe toto Jesus e, tapi suruhNa sada malekat mpegegehi anak si ikelengiNa e.​—Luk. 22:41-44.

7. Uga perasanta sanga siteh maka begiken Jahwe totota?

⁷ Gundari pe, ibegiken Jahwe totota janah ijawapNa bas waktu si tepat ras alu cara si mehulina. (Ms. 116:1, 2) Cuba ukuri pengalamen sekalak turang seninata arah India, si nggejapken uga Jahwe njawap totona. Susah kel akapna ngadapi perasan kuatir janah totokenna kerna si e man Jahwe. Bagenda nina, “Cocok kel kuakap acara JW Broadcasting^® bulan Mei 2019, si mbahas kerna kai si banci silakoken adi kuatir kita. Enda me jawapen arah totoku.”

8. Uga cara Jahwe mbuktiken kekelengenNa man Jesus?

⁸ Keleng ate Jahwe kita ras ermediate Ia man banta, bali bagi si lakokenNa man Jesus sanga Jesus nggeluh i doni. (Joh. 5:20) IsampatiNa Jesus gelah tetap paguh kinitekenna. PegegehiNa Jesus sanga latih kapna rukur, janah sikapkenNa keperlun Jesus secara jasmani. Selain si e, ikataken Jahwe man anakNa e maka keleng ateNa ia janah jadi ateNa ngidah ia. (Mat. 3:16, 17) Iteh Jesus maka Bapakna si perkeleng si lit i surga lalap ras ia janah nampati ia, emaka labo pernah sisada kapna bana.​—Joh. 8:16.

9. Kai buktina keleng ate Jahwe kita?

⁹ Bali bagi Jesus, kerina kita enggo rusur sigejapken maka keleng ate Jahwe kita. Contohna, nggit Jahwe erteman ras kita. BerekenNa ka turang senina si perkeleng si erban meriah ukurta janah pegegehiNa kita sanga latih siakap rukur. (Joh. 6:44) Isikapken Jahwe ka pangan rohani si banci erban paguh kinitekenta, ras sampatiNa kita gelah banci sidat keperlunta tiap wari. (Mat. 6:31, 32) Adi siukuri kerna kekelengen Jahwe e man banta, reh belinna me kekelengenta man baNa.

10. Kai si banci sipelajari arah perbahanen Jahwe man turang seninata?

¹⁰ Keleng ate Jahwe turang seninata. Tapi banci saja labo nukah siakap engkelengi turang seninata ras mbuktiken maka keleng ateta kalak e. Mon-mon, mesera siakap ngelakokenca perban beda budayata ras carata ipebelin. Selain si e, kerina kita pasti pernah erban salah si banci erban kitik ukur kalak si deban ntah pe erban kalak e la ermeriah ukur. Tapi kerina kita banci siusahaken mpebelin kekelengenta man turang seninata. Uga carana? Alu ngusih cara Jahwe engkelengi turang seninata. (Ep. 5:1, 2; 1 Joh. 4:19) Mari sibahas uga carata ngusih Jahwe.

11. Uga cara Jesus ngusih “perkuah ate si lembut” arah Jahwe?

¹¹ Jahwe dem alu “perkuah ate si lembut.” (Luk. 1:78) Kalak si perkuah biasana sedih kapna sanga ngidah kalak si deban susah. Daramina cara guna ngapuli ras nampatisa. Bage ka me si ilakoken Jesus. Usihna sipat Jahwe si perkuah sanga erurusen ras kalak si deban. (Joh. 5:19) Contohna, bas sada paksa sanga idah Jesus jelma si enterem, “mekuah atena, sebap kalak e itindas janah la iperdiateken bali bagi biri-biri si la lit permakanna.” (Mat. 9:36) Labo terjeng mekuah ate Jesus man kalak e tapi sampatina kalak e. Pepalemna si sakit ras isampatina kalak “si latih janah beraten.”​—Mat. 11:28-30; 14:14.

12. Bereken contohna uga carana kita ncidahken perkuah ate.

 ¹² Gelah banci sicidahken perkuah ate man turang seninata, perlu lebe siukuri masalah si iadapi kalak e. Contohna, banci saja lit turang seninata si mekelek penakitna janah la pernah ceritakenna masalahna e. Tapi banci saja meriah kel ukurna adi lit kalak si nampati ia. Banci siukuri uga ia nikapken keperlun keluargana. Banci nge sisampati ia alu nikapken pangan man bana ntah pe nampati ia mbersihken rumahna? Contoh si deban, banci saja lit turang seninata si lenga lit dahinna. Banci nge sibereken sitik sen man bana guna nampati ia sope datna dahin si deban janah la sikataken sen e arah kita nari?

13-14. Uga carata ngusih Jahwe si nggit mere?

¹³ Jahwe nggit mere. (Mat. 5:45) Perban keleng ate Jahwe kita, berekenNa kerina keperlunta amin pe lenga sipindo. Contohna, tiap wari iban Jahwe terbit matawari man kerina kalak, labo man kalak si ngata bujur saja ngenca. Emaka keleng kel ateta Jahwe perban Ia mehuli ras nggit mere. Kita pe merhat ngusih Jahwe. Emaka sisampati ateta turang seninata ope lenga pindona penampat.

¹⁴ Enterem turang seninata ngusih Bapakta si i surga si nggit mere. Contohna, bas tahun 2013, melala kel bangunen si ceda bas Filipina perban angin Topan Super Haiyan. Enterem turang seninata si lanai lit rumahna ras ertana. Tapi turang senina si lit i sebelang doni, meter kel mereken penampat man kalak e. Enterem si mereken sen ntah pe penampat guna mpekena ras mbangun mulihi hampir 750 rumah bas waktu kurang setahun. Selain si e, sedekah pandemi COVID-19, Saksi-Saksi Jahwe kerja keras guna nampati turang seninana. Adi meter sisampati turang seninata, sibuktiken maka keleng ateta kalak e. Uga carata ngusih Jahwe si nggit mere?

15-16. Menurut Lukas 6:36, uga carata ngusih Bapakta si i surga?

¹⁵ Jahwe perkuah ras nggit ngampuni. (Baca Lukas 6:36.) Tiap wari Bapakta si  i surga nggit ngampuni kita. (Ms. 103:10-14) Jesus pe seri ras Bapakna. Mekuah atena pengikutna si la sempurna janah nggit ia ngampuni kesalahen kalak e. Nggit Jesus ngorbanken kegeluhenna gelah dosa-dosata banci iampuni. (1 Joh. 2:1, 2) Perban Jahwe ras Jesus perkuah ras nggit ngampuni, la kin reh merhatna kam rembak ras Jahwe bage pe ras Jesus?

¹⁶ Banci sipegegehi persadanta ras turang seninata adi tuhu-tuhu kita nggit ngampuni. (Ep. 4:32) Memang mon-mon mesera siakap ngampuni, emaka arus kita erusaha ngelakokenca. Sekalak turang seninata mbaca sada artikel arah Sora Ermomo kerna nggit ngampuni, janah si e erguna man bana. Bagenda nina, “Arah artikel e, banci kuteh engkai maka nggit ngampuni banci erguna man bangku. Bas artikel e, ijelasken maka nggit ngampuni labo ertina setuju kita nandangi perbahanen si salah ntah pe la ceda ukurta perban perbahanenna e. Tapi sanga siampuni kalak, lanai kita merawa man bana janah dame pusuhta.” Adi tuhu-tuhu kita nggit ngampuni turang seninata, sibuktiken me maka keleng ateta kalak e janah siusih Bapakta Jahwe.

17. Menurut Matius 5:16, kai si banci silakoken gelah Bapakta si i surga imuliaken?

¹⁷ Ngata bujur kel kita perban banci jadi bagin arah turang seninata si perkeleng si lit i sebelang doni. Ateta min reh teremna kalak si nembah Dibata radu ras kita. Emaka la ateta ngelakoken kai pe si banci ncedai gelar Jahwe ntah pe umatNa. Lalap siusahaken ngelakoken si mehuli gelah nggit kalak megiken berita si meriah.​—Baca Matius 5:16.

18. Kai si banci erban kita pang nceritaken kinitekenta?

¹⁸ Mon-mon pandangi kalak kita ntah pe aniayana kita perban patuh kita man Bapakta si i surga. Kai nge si banci silakoken adi mbiar kita nceritaken kinitekenta man kalak si deban? Tek kita maka Jahwe ras anakNa pasti nampati kita. Ikataken Jesus  man murid-muridna maka la perlu kalak e mbiar kerna uga ras kai si arus ikatakenna. Engkai maka bage? Nina Jesus, “Ibereken nge pagi man kena kai si arus kataken kena bas paksa si e, sebap si ngerana labo kena saja, tapi kuasa Bapak kena si ngerana arah kena.”​—Mat. 10:19, 20.

19. Ceritaken sada contoh kerna sekalak turang seninata si pang mbela kinitekenna.

¹⁹ Cuba ukuri usihen Robert arah Afrika Selatan nari. Sanga mbaru denga ia erlajar Pustaka, pernah ia ibaba ku pengadilen perban la ia nggit ikut wajip militer. Amin pe sitik denga ngenca pemetehna kerna Pustaka, pang ia njelaskenca bas pengadilen maka tetap atena netral perban keleng atena turang seninana. Ngata bujur kel ia perban banci jadi bagin arah turang seninana. Rempet-rempet isungkun hakim ia, nina, “Ise kin turang seninandu?” La iarap Robert bage penungkunen hakim e man bana. Tapi mis ingetna ayat harian wari e eme Matius 12:50 si ngataken, “Ise pe si ndalanken peraten Bapakku si i surga, ia kap seninaku, turangku, ras mamakku.” Amin pe Robert mbaru denga erlajar Pustaka, isampati kesah si badia Jahwe ia njawap penungkunen e ras mbue penungkunen si deban si la iarapna. Pasti bangga kel Jahwe ngidah Robert e. Jahwe pe pasti bangga ngidah kita adi siandalken Ia janah pang kita erberita amin pe siadapi tentangen.

20. Kai si arus terus silakoken? (Johanes 17:11, 15)

²⁰ Ngata bujur kel kita perban banci jadi bagin arah keluarga Jahwe. Banci ka sidat Bapak si mehulina ras enterem turang senina si engkelengi kita. Ula min sianggap kerina e biasa-biasa saja. Setan ras pengikutna si jahat erusaha erban kita ragu maka keleng ate Bapakta si i surga man banta. Tapi enggo ertoto Jesus guna kepentingenta janah pindona man Bapakta gelah ijagaNa kita. Alu bage, keluargata tetap ersada. (Baca Johanes 17:11, 15.) Bali bagi Jesus, ula pernah kita ragu maka keleng ate Bapakta si i surga nandangi kita ras pasti kita isampatiNa. Emaka teruslah kita reh kompakna selaku sada keluarga.