1. Banci saja uga nge perasanta adi lit kalak si keleng ateta ipecat arah runggun?

LIT nge kalak si keleng atendu ipecat arah runggun? Pasti getem kel pusuhndu perban si e! Bagenda nina turang seninata Hilda, * “Kenca 41 tahun kami erjabu, mate perbulangenku. Paksa si e, kuakap e masalahku si mberatna. Kepeken lit masalah si ndauh beraten ngadapisa eme sanga anakku ipecat arah runggun ras tadingkenna diberuna ras anakna.”

2-3. Menurut Masmur 78:40, 41, uga perasan Jahwe sanga lit umatNa si lanai nembah Ia?

² Cuba ukuri uga cedana ukur Jahwe sanga piga-piga malekat si jadi bagin arah keluargaNa nadingken Ia! (Jud. 6) Cuba bayangken uga suina pusuhNa sanga kalak Israel si keleng ateNa mulih-ulih mberontak ngelawan Ia. (Baca Masmur 78:40, 41.) Teklah kita maka Bapakta si perkeleng si lit i surga pe ceda pusuhNa sanga kalak si keleng ateta lanai ngelayani Ia. IangkaNa uga suina pusuhndu. Pasti ipegegehiNa kam ras isampatiNa.

³ Bas artikel enda, sibahas kari kai si banci silakoken guna ndatken penampat arah Jahwe adi lit kalak si keleng ateta lanai nembah Ia. Sibahas ka kari uga carata nampati kalak si deban bas runggun adi lit kalak si keleng atena ipecat. Tapi mari sibahas lebe uga carata mpedauh perukuren si salah.

4. Uga biasana perasan orang tua adi lit anakna si ipecat?

⁴ Adi lit sekalak anak si ipecat, biasana bagenda perukuren orang tuana, ‘Bicara bagenda min ndai kuban, bicara bagah min ndai kuban, ntah tetap denga min ndai anakku e nembah Jahwe.’ Lit ka sekalak turang seninata si gelarna Luke, si anakna ipecat ngataken, “Kuakap enda salahku. Nipi-nipin aku perban si e. Mon-mon ngandung aku janah mesui kel pusuhku.” Sekalak pernanden si gelarna Elizabeth pe bage perasanna, nina, “Kuakap aku labo nande si mehuli. La aku beluh ngajari anakku engkelengi Jahwe.”

5. Ise si salah adi lit kalak si ipecat?

 ⁵ Perlu siinget maka ibere Jahwe kita bebas erban pilihen. Enda ertina banci sipilih patuh man Jahwe ntah lang. Lit anak-anak si pilihna ngelayani Jahwe ras tetap setia man baNa, amin pe orang tuana la mereken usihen si mehuli. Lit ka anak-anak si pilihna nadingken Jahwe, padahal orang tuana enggo erusaha ngajari ia engkelengi Jahwe. Jadi situhuna, ia nge si erban keputusen guna ngelayani Jahwe. (Jos. 24:15) Emaka, adi ceda ukurndu perban lit anakndu si ipecat, ula akapndu si e terjadi perban salahndu. Perukuren si bage arus ilawan!

6. Banci saja uga perasan anak-anak adi orang tuana lanai nembah Jahwe?

⁶ Mon-mon, lit ka perbapan ntah pe pernanden si lanai nembah Jahwe janah tadingkenna keluargana. (Ms. 27:10) Enda pasti erban ceda kel ukur anak-anakna perban biasana orang tuana si jadi usihen man bana. Bagenda nina Esther si bapakna enggo ipecat arah runggun, “Rusur aku ngandung perban kuteh maka sengaja nge bapakku e nadingken kebenaren ras Jahwe. Keleng ateku ia. Emaka sanga ipecat ia arah runggun, rusur kel aku kuatir kerna keadanna. Mon-mon, la aku banci ngelakoken kai pe perban kuatirna.”

7. Uga perasan Jahwe ngidah kalak si orang tuana ipecat?

⁷ Kam anak muda, adi bapakndu ntah pe mamakndu si ipecat, kami pe sedih kel akap kami! Teklah kam teh Jahwe uga suina pusuhndu. Keleng ateNa kam janah ergaiNa kesetianndu. Kami pe turang seninandu bage perasan kami. Ingetlah, labo kam si salah adi ipilih orang tuanndu lanai nembah Jahwe. Bagi si enggo ikataken ndai, ipediat Jahwe tiap kalak bebas erban pilihen. Selain si e, kalak si enggo mbaktiken dirina man Jahwe ras iperidiken arus “maba babanna masing-masing.”​—Gal. 6:5,

8. Kai si banci silakoken janahta nimai kalak si keleng ateta mulihi nembah Jahwe? (Nen ka kotak “ Mulihlah ku Jahwe.”)

⁸ Sanga kalak si keleng atendu lanai nembah Jahwe, wajar nge adi arapkenndu ia mulihi nembah Jahwe. Kai si banci ilakokenndu janahndu nimai ia mulihi nembah Jahwe? Jagalah kinitekenndu gelah tetap paguh. Si e banci erban kam jadi usihen man anggota keluarga si deban ras kalak si ipecat e. Alu bage, banci kam ngasup ngadapi kerina masalahndu e. Mari sibahas kai si banci silakoken gelah tetap paguh kinitekenndu.

9. Kai si banci ilakokenndu gelah tetap paguh kinitekenndu? (Nen ka kotak “ Ayat-Ayat si Banci Mpegegehi Kam.”)

⁹ Raturlah kam ngelakoken kerina kegiaten rohani. Penting kel mpegegehi kinitekenndu ras kiniteken keluargandu. Uga carandu ngelakokenca? Baca ras ukurilah Pustaka tiap wari janah ratur ka kam reh ku perpulungen gelah datndu pergegeh arah Jahwe. Joanna, si bapakna ras kakakna nadingken kebenaren ngataken, “Reh tenangna aku sanga kubaca sipat-sipat kalak si icatat bas Pustaka. Usihen arah Abigail, Ester, Jop, Jusup, ras Jesus mpegegehi aku ras nampati aku gelah tetap positip. Lagu-lagu arah JW Broadcasting^® pe tuhu-tuhu mpegegehi aku.”

10. Uga Masmur 32:6-8 nampati kita gelah ngasup ngadapi perasan kuatir?

¹⁰ Turikenlah man Jahwe kerina si erban kam kuatir. Amin pe latih kel ukurndu, ula kam ngadi ertoto. Teruslah totoken man Dibatata si perkeleng gelah bali perukurenndu ras Ia, janah ‘pindolah gelah bereNa kam pengertin ras ajariNa dalan si arus dalanindu.’ (Baca Masmur 32:6-8.) Memang banci saja mesera akapndu nuriken uga situhuna perasanndu man Jahwe tapi angkai Jahwe uga suina pusuhndu. Keleng kel ateNa kam janah iahkenNa gelah turikenndu isi pusuhndu man baNa.​—Kel. 34:6; Ms. 62:7, 8.

11. Menurut Heber 12:11, engkai maka arus kita tek nandangi disiplin si perkeleng arah Jahwe? (Nen ka kotak “ Pemecaten Eme Disiplin si Perkeleng arah Jahwe.”)

¹¹ Dukunglah keputusen si iban pertua-pertua. Jahwe kap si erbanca pengaturen kerna pemecaten. Persinget ntah pe disiplin si perkeleng si bere Jahwe e guna  kiniulin kerina kalak, termasuk man kalak si ipecat. (Baca Heber 12:11.) Piga-piga kalak bas runggun banci saja ikatakenna maka keputusen pertua-pertua e labo tepat. Tapi ingetlah kalak si bage biasana la ia nggit nceritaken perbahanen si la mehuli arah kalak si salah ndai. Situhuna, labo siteh kerina faktana. Emaka, teklah maka pertua-pertua si ikut bas panitia pengadilen enggo hati-hati kel bas ndalanken prinsip Pustaka ras ngakimi “guna Jahwe.”​—2 Kro. 19:6.

12. Kai hasil si mehuli adi sidukung disiplin arah Jahwe?

¹² Adi sidukung keputusen pertua-pertua, situhuna e banci nampati kalak si ipecat e gelah mulihken ku Jahwe. Bagenda nina Elizabeth si ituriken ndai, “Mesera kel kuakap la ngerana ras anak kami. Tapi kenca mulihken ia ku Jahwe, akuina maka pas nge keputusen si iban sanga ia ipecat. Selain si e, ikatakenna maka melala pelajaren si mehuli si idatna. Kuteh maka disiplin arah Jahwe lalap benar.” Bagenda ka nina Mark, perbulangenna, “Ndekah kenca si e, ikataken anak kami maka salah sada alasenna nggit ia mulihken nembah Jahwe perban la pernah kami ngerana ras ia. Meriah kel ukurku perban isampati Jahwe kami patuh man baNa.”

13. Kai si banci nampati kam gelah tetap positip perukurenndu?

¹³ Ceritakenlah perasanndu man temanndu si ngangkai kam. Banlah waktundu ras turang senina si paguh kinitekenna si banci nampati kam gelah positip perukurenndu. (Kua. 12:25; 17:17) Joanna, si ituriken ndai ngataken, “Sisada kuakap bangku. Tapi tersampati kel aku sanga kuceritaken perasanku man teman-temanku si banci nampati aku.” Tapi, kai si banci lakokenndu adi lit ranan turang senina bas runggun si erban kitik ukurndu?

14. Engkai maka perlu kita ‘tetap sabar janah alu bulat ukur ngampuni sada ras si debanna’?

¹⁴ Ula kam nukah megelut. Perlu siinget maka kerina kita banci salah ngerana. (Jak. 3:2) Kerina kita la sempurna. Emaka ula kam sengget adi la teh turang seninandu kai si man katankenna ntah pe la ia sengaja belaskenna ranan si erban kitik ukurndu. Ingetlah nasehat Rasul Paulus, nina, “Bicara lit pe alasen kena megelut, kena arus tetap sabar janah alu bulat ukur ampunilah sada ras si debanna.” (Kol. 3:13) Sekalak turang senina si anakna ipecat ngataken, “Isampati Jahwe aku ngampuni turang seninaku si atena mpegegehi aku tapi kepeken erban kitik ukurku.” Adi bage, kai si banci ilakoken runggun guna nampati turang senina si lit keluargana ipecat?

15. Kai si banci silakoken guna nampati turang senina si lit keluargana ipecat?

¹⁵ Mehulilah man turang senina si lit keluargana ipecat. Sekalak turang senina si gelarna Miriam, sempat latih kel  ukurna sanga reh ku perpulungen kenca turangna ipecat. Bagenda nina, “Mbiar aku ngukuri kai kari ning kalak. Tapi kepeken bas runggun enterem turang senina si sedih ka kapna ngidah kai si terjadi man kami. Labo lit icakapken kalak e si la mehuli kerna turangku si ipecat e. Ngata bujur aku man kalak e perban kalak e pe ikut ka sedih ras aku.” Turang senina si deban ngataken, “Kenca anak kami ipecat, iapuli turang senina kami. Lit si ngataken maka la tehna kai si man katanken. Lit ka si ngandung radu ras aku, janah si debanna lit ka si ngirim surat guna mpegegehi aku. Kerina si lakoken kalak e tuhu-tuhu mpegegehi kami!”

16. Uga carana runggun banci terus ngapuli ras nampati turang senina si lit keluargana ipecat?

¹⁶ Teruslah sampati turang senina si lit keluargana ipecat. Khususna bas situasi si bage, perlu kel kalak e ikelengi ras ipegegehi. (Heb. 10:24, 25) Mon-mon, turang senina si lit keluargana ipecat nggejapken maka lit piga-piga turang senina bas runggun lanai nggit ngerana ras kalak e. Tempa-tempa kalak e pe enggo ipecat. Ula pediat si e terjadi. Arus sipuji ras sipegegehi anak muda si orang tuana lanai nembah Jahwe. Maria, si itadingken dilakina si enggo ipecat ngataken, “Piga-piga temanku arah runggun reh ku rumahku janah tanggerken kalak e pangan man bangku. Selain si e, sampatina aku erlajar ras anakku. Ikut kalak e nggejapken uga suina pusuhku janah ngandung kalak e ras aku. Sanga lit ranan kalak si la tuhu kerna aku, ibela kalak e aku. Mbelin kel penampat kalak e man bangku!”​—Rom. 12:13, 15.

17. Uga pertua-pertua banci ngapuli kalak si sangana kitik ukurna?

¹⁷ Pertua-pertua, rusurlah pegegehi turang senina si lit keluargana ipecat. Lit tanggung jawapndu si khusus guna ngapuli kalak si lit keluargana lanai nembah Jahwe. (1 Tes. 5:14) Ercakap-cakaplah ras kalak e sope lenga perpulungen ras kenca perpulungen guna mpegegehi kalak e. Dahilah kalak e ku rumahna janah ertotolah ras kalak e, erberitalah ras kalak e, ntah pe sekali-sekali undang kalak ikut bas ibadah keluargandu. Perlu kel iperdiatekenndu  kalak si sangana kitik ukurna, janah perlu icidahkenndu kekelengen ras perkuah ate man bana.​—1 Tes. 2:7, 8.

18. Menurut 2 Petrus 3:9, kai si arapken Dibata arah kalak si lanai nembah Ia?

¹⁸ ‘Ate Jahwe labo sekalak pe ikernepken tapi gelah kerina min ertobat.’ (Baca 2 Petrus 3:9.) Amin pe sekalak jelma banci saja ngelakoken kesalahen si serius, kegeluhenna tetap meherga bas Dibata. Cuba ukuri uga ergana tebusen si enggo igalari Jahwe alu kegeluhen anak si ikelengiNa. Perban Jahwe perkeleng, isampatiNa ateNa kalak si lanai nembah Ia gelah mulihken man baNa. Si e me si enggo sipelajari arah perumpaman Jesus kerna anak si bene. (Luk. 15:11-32) Enterem kalak si nadingken kebenaren dungna mulihken nembah Jahwe. Turang senina pe meriah kel ukurna ngalo-ngalo kalak e. Elizabeth si ituriken ndai, nggejapken keriahen ukur si bage sanga anakna mulihken nembah Jahwe. Bagenda nina, “Tuhu-tuhu kuergai kel pergegeh si enggo ibereken turang senina gelah tetap aku erpengarapen.”

19. Engkai maka banci tetap kita tek man Jahwe?

¹⁹ Banci kita tetap tek man Jahwe. Petunjuk si berekenNa labo pernah erban kita cilaka. Jahwe e Bapak si nggit mere ras perkuah janah keleng kel ateNa kerina kalak si engkelengi Ia ras nembah Ia. Teklah kam maka labo pernah tadingken Jahwe kam sanga susah akapndu. (Heb. 13:5, 6) Bagenda nina Mark si ituriken ndai, “Labo pernah tadingken Jahwe kami. Lalap isampatiNa kami sanga susah akap kami.” Pasti lalap ibereken Jahwe ‘kengasupen si luar biasa’ man bandu. (2 Kor. 4:7) Payo, banci kam tetap setia ras erpengarapen sanga lit kalak si keleng atendu lanai nembah Jahwe.