1. Menurut Maleaki 3:16, buku kai nge si itulis Jahwe, ras kai isina?

 LIT buku Jahwe si istimewa. Bas buku e, itulisNa gelar-gelar umatNa si setia, mulai arah Abil nari. * (Luk. 11:50, 51) Kenca si e, lalap itambahken Jahwe gelar umatNa bas buku e, janah gundari enggo lit jutan gelar i je. Bas Pustaka, buku e igelari “buku peringet-ingeten” ntah pe “buku kegeluhen.” Tapi bas artikel enda, sikataken saja buku e “buku kegeluhen.”​—Baca Maleaki 3:16; Ket. 3:5; 17:8.

2. Gelar ise saja nge si itulis bas buku kegeluhen, ras uga carana gelah gelarta pe itulis i je?

² Bas buku si istimewa e lit gelar kerina umat Jahwe si mbiar man baNa ras si ngergai gelarNa. Kalak e banci pagi nggeluh seh rasa lalap. Gundari, gelarta pe banci itulisken bas buku e adi rembak kita ras Jahwe. Si e banci silakoken perban lit korban tebusen AnakNa, Jesus Kristus. (Joh. 3:16, 36) Pasti kerina kita merhat gelah gelarta itulis bas buku e, la soal arapenta nggeluh i surga ntah pe i doni.

3-4. (a) Pasti nge kita nggeluh seh rasa lalap adi gelarta enggo itulisken bas buku kegeluhen e? Jelasken. (b) Kai kari sibahas bas artikel enda ras artikel seterusna?

³ Adi gelarta enggo itulis bas buku kegeluhen e, enggo nge pasti kita nggeluh seh rasa lalap? Lenga tentu.  Cuba siperdiateken kata-kata Jahwe man Musa si icatat bas Keluaren 32:33. Nina Jahwe, “Ise pe si erdosa man bangKu, pasti Kuhapus gelarna arah bukuKu.” Emaka, gelar-gelar si gundari enggo itulis bas buku e banci denga ihapus. Gelar e tempa-tempa itulis Jahwe alu pensil. (Ket. 3:5) Adi tetap kita setia, gelarta banci tetap lit bas buku e, tempa-tempa itulis alu tinta.

⁴ Banci saja lit piga-piga penungkunenta. Contohna, kai nina Pustaka kerna kalak si gelarna itulis bas buku e bage pe kerna kalak si gelarna la itulis i je? Ndigan nge kalak si gelarna itulis bas buku e ndatken kegeluhen si rasa lalap? Uga kerna kalak si mate sope lit kesempatenna guna nandai Jahwe? Banci nge gelar kalak e itulis bas buku e? Penungkunen-penungkunen e ijawap kari bas artikel enda ras artikel seterusna.

GELAR ISE SAJA NGE SI ITULIS BAS BUKU E?

5-6. (a) Bagi si ituriken bas Pilipi 4:3, gelar ise saja nge si itulis bas buku kegeluhen e? (b) Ndigan nge gelar kalak e tempa-tempa itulis alu tinta?

⁵ Gelar ise saja nge si itulis bas buku kegeluhen e? Guna njawap penungkunen e, sibahas kari kerna lima kelompok kalak. Arah lima kelompok e, lit kelompok si gelarna itulis bas buku e lit ka si lang.

⁶ Kelompok si pertama eme kalak si ipilih guna merentah ras Jesus i surga. Itulis nge gelar kalak e bas buku kegeluhen e? Ue. Menurut kata-kata Rasul Paulus man ‘temanna’ i Pilipi, gelar kalak si ipilih guna nggeluh i surga enggo itulis bas buku kegeluhen e. (Baca Pilipi 4:3.) Tapi arus kalak e setia, gelah gelar kalak e tetap lit bas buku e. Dat kalak e pagi meterai si terakhir sope kalak e mate ntah pe sope kiniseran si mbelin  imulai. Paksa si e me gelar kalak e tempa-tempa itulis alu tinta janah ndigan pe la pernah ihapus.​—Ket. 7:3.

7. Ndigan nge gelar kelompok jelma si enterem arah biri-biri si deban tempa-tempa itulis alu tinta? (Ketangkasen 7:16, 17)

⁷ Kelompok si peduaken eme kelompok jelma si enterem arah biri-biri si deban. Enggo nge gelar kalak e itulis bas buku kegeluhen? Enggo. Tetap nge lit gelar kalak e bas buku e kenca kalak e selamat arah Harmagedon? Ue payo. (Ket. 7:14) Ikataken Jesus maka kalak si bagi biri-biri e ‘alokenna pagi kegeluhen si rasa lalap.’ (Mat. 25:46) Tapi, labo mis aloken kalak e kegeluhen si rasa lalap kenca selamat arah Harmagedon. Gelar kalak e memang enggo itulis bas buku e, tapi tempa-tempa alu pensil denga. Bas Pemerentahen Seribu Tahun, ‘permakani Jesus pagi kalak e, janah babana pagi kalak e ku sumber lau kegeluhen.’ Kalak si patuh man Kristus ras si setia man Jahwe seh asa penghakimen si terakhir, tempa-tempa itulis pagi gelarna alu tinta bas buku e.​—Baca Ketangkasen 7:16, 17.

8. Gelar ise saja si la itulis bas buku kegeluhen e, ras kai pagi si terjadi man kalak e?

⁸ Kelompok si peteluken eme kalak si igambarken bagi kambing, si ikernepken pagi bas Harmagedon. Gelar kalak e la itulis bas buku kegeluhen e. Ikataken Jesus maka “mate pagi kalak e rasa lalap.” (Mat. 25:46) Itulis Rasul Paulus maka “ihukum Tuan pagi kalak e. Hukumenna ikernepken seh rasa lalap.” (2 Tes. 1:9; 2 Pet. 2:9) Mbarenda nari, lit kalak si erdosa man kesah si badia. Amin pe teh kalak e sura-sura Jahwe, tapi sengaja ilawanna. Kalak e pe labo pagi nggeluh seh rasa lalap tapi ikernepken seh rasa lalap. Emaka, labo pagi kalak e ipekeke. (Mat. 12:32; Mrk. 3:28, 29; Heb. 6:4-6) Mari sibahas terdauhen kerna dua kelompok kalak si ipekeke pagi i doni.

KALAK SI IPEKEKE PAGI

9. Bas Perbahanen Rasul-Rasul 24:15 lit dua kelompok kalak si ipekeke guna nggeluh i doni. Kai gelar kelompok e, ras kai bedana?

⁹ Bas Pustaka lit ituriken kerna dua kelompok kalak si ipekeke pagi janah lit kesempatenna nggeluh rasa lalap i doni. Kalak e eme “kalak si benar” ras “kalak si la benar.” (Baca Perbahanen Rasul-Rasul 24:15.) “Kalak si benar” eme kalak si setia ngelayani Jahwe sanga ia nggeluh denga. “Kalak si la benar” eme kalak si la ngelayani Jahwe. Buen arah kalak si la benar e, sitik pe la mehuli perbahanenna. Jadi, perban duana kelompok e ipekeke, banci nge sikataken maka duana gelar kalak e enggo itulis bas buku kegeluhen? Guna njawap penungkunen e, mari sibahas kerna duana kelompok e sada per sada.

10. Engkai maka “kalak si benar” ipekeke pagi, janah kai pagi tugas piga-piga arah kalak e? (Nen ka “Penungkunen Si Mbaca” si mbahas kerna kekeken i doni bas majalah enda.)

¹⁰ Kelompok si peempatken eme “kalak si benar.” Sope kalak e mate, gelarna enggo itulis bas buku kegeluhen. Sanga kalak e mate, ihapus nge gelarna arah buku kegeluhen? Lang, kalak e tetap “nggeluh” bas ingeten Jahwe. Jahwe “labo Dibata kalak mate, tapi Dibata kalak si nggeluh. Sebap menurut Dibata, kerina kalak e nggeluh.” (Luk. 20:38) Enda ertina, sanga kalak si benar ipekeke i doni, gelar kalak e tetap lit bas buku kegeluhen amin pe tempa-tempa itulis alu “pensil” denga. (Luk. 14:14) Piga-piga arah kalak si ipekeke e, datna pagi  tugas ngelayani jadi “peminpin i belang-belang doni.”​—Ms. 45:16.

11. Kai pagi si perlu ipelajari “kalak si la benar” gelah gelar kalak e banci itulis bas buku kegeluhen?

¹¹ Kelompok si pelimaken eme “kalak si la benar.” Sanga ia nggeluh denga, la lakokenna kai si benar, banci saja perban la tehna undang-undang Jahwe. Emaka, gelar kalak e la itulis bas buku kegeluhen. Tapi, sanga kalak e ipekeke, ibere Jahwe man kalak e kesempaten gelah gelarna banci itulis bas buku e. Mbue kel pagi penampat si iperluken kalak e. Sope mate, piga-piga arah kalak e seh kel jahatna. Emaka, perlu kalak e iajari uga carana ndalanken undang-undang Jahwe. Guna ngelakoken si e, iban Kerajan Dibata pagi program pendidiken si luar biasa si lenga pernah ilakoken bas doni enda.

12. (a) Ise pagi si ngajari kalak si la benar? (b) Kai pagi si terjadi man kalak si la nggit ndalanken kai si pelajarina?

¹² Ise pagi si ngajari kalak si la benar? Si ngajari kalak e eme kelompok jelma si enterem bage pe kalak si benar si enggo ipekeke. Gelar kalak si la benar banci itulis bas buku kegeluhen, adi rembak kalak e ras Jahwe janah ibaktikenna dirina man baNa. Jesus Kristus ras kalak si ipilih ku surga mperdiateken uga tanggapen kalak si la benar nandangi kai si ipelajarina. (Ket. 20:4) Kalak si la nggit ndalanken kai si ipelajarina ikernepken pagi, amin pe banci saja enggo 100 tahun umurna. (Jes. 65:20) Jahwe ras Jesus banci tehna isi pusuh jelma, janah labo pagi ipediatna ise pe si ncedai bas doni si mbaru.​—Jes. 11:9; 60:18; 65:25; Joh. 2:25.

IPEKEKE GUNA NGGELUH SEH RASA LALAP RAS IPEKEKE GUNA IHAKIMI

13-14. (a) Mbarenda, uga nge pengangkanta kerna kata-kata Jesus bas Johanes 5:29? (b) Kai si perlu siperdiateken arah kata-kata Jesus e?

¹³ Pernah ka ituriken Jesus kerna kalak si ipekeke pagi bas doni. Nina, “Reh me  waktuna maka kerina kalak si lit bas kuburen megi sorana pagi, jenari ndarat. Kalak si mehuli perbahanenna ipekeke guna nggeluh si rasa lalap, tapi kalak si jahat perbahanenna ipekeke guna ihakimi.” (Joh. 5:28, 29) Kai nge maksud kata-kata Jesus e?

¹⁴ Mbarenda, siakap perbahanen si ikataken Jesus e eme perbahanen kalak kenca ia ipekeke, lit pagi si ngelakoken si mehuli janah lit ka si ngelakoken si jahat. Cuba siperdiateken mulihi kata-kata Jesus ndai. Labo lit ikataken Jesus maka ipekeke pagi kalak si mehuli perbahanenna. Ntah pe, ihakimi pagi kalak si jahat perbahanenna. Emaka, enda labo kerna kai pagi si ilakokenna, tapi kerna si enggo ilakokenna. Jadi, maksud Jesus i jenda eme perbahanen si mehuli ntah pe perbahanen si jahat si ilakoken kalak e sope ia mate. Penjelasen e masuk akal perban bas doni si mbaru, labo pagi ipediat Jahwe ise pe ngelakoken perbahanen si jahat. Emaka, kai nge maksud Jesus kerna “ipekeke guna nggeluh si rasa lalap” ras “ipekeke guna ihakimi”?

15. Ise pagi si “ipekeke guna nggeluh si rasa lalap,” ras engkai?

¹⁵ Kalak si mehuli perbahanenna, “ipekeke guna nggeluh si rasa lalap” perban gelarna enggo itulis bas buku kegeluhen. Emaka, “kalak si mehuli perbahanenna” si icatat bas Johanes 5:29 seri maksudna ras “kalak si benar” si icatat bas Perbahanen Rasul-Rasul 24:15. Memang, sesuai ras Roma 6:7, sanga kalak e mate, enggo bebas ia arah dosana. E ertina enggo ilupaken Jahwe dosana. Tapi, perbahanenna si setia segedang geluhna tetap inget Jahwe. (Heb. 6:10) Amin gia bage, kalak si benar si ipekeke perlu terus setia gelah gelarna tetap lit bas buku kegeluhen.

16. Kai ertina “ipekeke guna ihakimi”?

¹⁶ Uga kerna kalak si jahat perbahanenna sope ia mate? Amin pe sanga kalak e mate kalak e enggo ibebasken arah dosana, tapi lenga pernah kalak e ngelayani Jahwe. Labo lit gelar kalak e itulis bas buku kegeluhen. Emaka, “kalak si jahat perbahanenna” si icatat bas Johanes 5:29 seri maksudna ras “kalak si la benar” si icatat bas Perbahanen Rasul-Rasul 24:15. Kalak e me pagi si “ipekeke guna ihakimi.” * E ertina, iperdiateken ras ipereksa Jesus me pagi perbahanen kalak e. (Luk. 22:30) Kenca piga-piga waktu, iputusken Jesus me cocok ntah lang gelar kalak e itulis bas buku kegeluhen. Adi nggit kalak e nadingken perbahanenna si jahat janah baktikenna dirina man Jahwe, itulis me gelarna bas buku kegeluhen.

17-18. Kai si perlu ilakoken kalak si ipekeke guna nggeluh i doni pagi, janah kai maksudna “perbahanen” si icatat bas Ketangkasen 20:12, 13?

¹⁷ Bas Pemerentahen Seribu Tahun, ibuka pagi gulungen-gulungen si mbaru. Bas gulungen e lit undang-undang, janah kerina kalak si ipekeke arus matuhi undang-undang e, la soal ia kalak si benar ntah pe kalak si la benar. E me si idah Rasul Johanes bas sada pengenehenen. Nina, “Kuidah kalak si enggo mate, kalak si biasa-biasa saja bage pe kalak si penting tedis i lebe-lebe tahta. Jenari ibuka  gulungen-gulungen. Gulungen si deban pe ibuka, eme buku kegeluhen. Kalak si mate ihakimi menurut kai si tertulis bas gulungen-gulungen e, menurut perbahanen kalak e.”​—Ket. 20:12, 13.

¹⁸ Kai nge si jadi dasar penghakimen man kalak si ipekeke pagi? ‘Perbahanenna’ sope ia mate nge dasarna? Lang! Bagi si enggo sibahas, kalak e enggo ibebasken arah dosana kenca ia mate. Emaka, istilah “perbahanen” bas ayat e maksudna eme perbahanen kalak e kenca iajari bas doni si mbaru. Umat Dibata si setia bagi Nuah, Samuel, Daud, ras Daniel pe arus pagi erlajar kerna Jesus Kristus janah tek man tebusen Jesus. Adi kalak e saja pe mbue si arus pelajarina, apai ka kalak si la benar!

19. Uga nge kedungen kalak si la nggit ngaloken kesempaten si luar biasa e?

¹⁹ Uga nge kedungen kalak si la nggit ngaloken kesempaten si luar biasa e? Bas Ketangkasen 20:15 ikataken, “Ise pe si gelarna la tertulis bas buku kegeluhen, ibenterken ku danau api.” Ertina, ikernepken pagi kalak e seh rasa lalap. Emaka perlu siusahaken gelah gelarta lit bas buku kegeluhen ras tetap lit i je!   

20. Program si luar biasa kai nge pagi si ilakoken bas Pemerentahen Seribu Tahun? (Nen gambar sampul.)

²⁰ Tertima-tima kel kita nandangi Pemerentahen Seribu Tahun! I je lit pagi program pendidiken si luar biasa si lenga pernah ilakoken bas doni enda. Tapi i je pe, iperdiateken ras ipereksa pagi perbahanen kalak si benar ras kalak si la benar. (Jes. 26:9; Perb. 17:31) Uga nge pagi program pendidiken e? Artikel berikutna nampati kita ngangkai ras ngergai program si luar biasa e.