1. Kejadin si luar biasa kai pagi si terjadi bas Pemerentahen Seribu Tahun?

 LUAR BIASA kel pagi sanga kalak mate mulai ipekeke bas doni enda bas Pemerentahen Seribu Tahun Kristus! Pasti tedeh ateta man temanta ntah pe keluargata si enggo mate. Jahwe pe bage perasanNa. (Jop 14:15) Emaka, sanga ipekeke pagi kalak e, kerina kalak pasti ermeriah ukur. Bagi si enggo sibahas bas artikel sebelumna, “kalak si benar,” eme kalak si tertulis gelarna bas buku kegeluhen, ‘ipekeke pagi guna nggeluh si rasa lalap.’ (Perb. 24:15; Joh. 5:29) Banci saja, enterem pagi kalak si keleng ateta si ipekeke la ndekah kenca Harmagedon. * Selain si e, “kalak si la benar,” bagi kalak si lenga sempat nandai Jahwe ras ngelayani Ia sope mate, ‘ipekeke pagi guna ihakimi.’

2-3. (a) Sesuai ras Jesaya 11:9, 10, kai pagi si iajarken bas program pendidiken si luar biasa si nandangi terjadi? (b) Kai kari sibahas bas artikel enda?

² Kerina kalak si ipekeke perlu pagi iajari. (Jes. 26:9;  61:11) Emaka, iban me pagi program pendidiken si luar biasa si nandangi terjadi. (Baca Jesaya 11:9, 10.) Kai saja si perlu ipelajari kalak e? Kalak si la benar perlu pagi erlajar kerna Jesus Kristus, Kerajan Dibata, ras tebusen. Perlu ka kalak e erlajar kerna engkai maka penting kel gelar Jahwe ras engkai maka Ia ngenca si lit hakNa merentah. Kalak si benar pe perlu denga pagi erlajar terdauhen kerna sura-sura Dibata man doni enda, si enggo ipebetehkenNa sedekah enda alu ertahap. Piga-piga arah kalak si setia e enggo mate sope lit Pustaka si lengkap. Jelas me, mbue denga si perlu ipelajari kalak si benar ras kalak si la benar.

³ Bas artikel enda, sibahas kari penungkunen-penungkunen penting enda: Uga pagi program pendidiken si mbelinna e ilakoken? Kai pagi si terjadi man kalak si ndalanken kai si pelajarina? Kai pagi si terjadi man kalak si la ndalanken kai si pelajarina? Perlu siteh jawapen arah penungkunen-penungkunen e. Emaka, mari sipelajari piga-piga nubuat si menarik bas buku Daniel ras Ketangkasen. Nubuat e nampati kita gelah tepat pengangkanta kerna kai pagi si terjadi sanga kalak mate ipekeke. Gundari, mari sibahas lebe kejadin-kejadin si inubuatken bas Daniel 12:1, 2.

4-5. Menurut Daniel 12:1, kai pagi si terjadi bas pendungi jaman?

⁴ Baca Daniel 12:1. Arah buku Daniel banci siteh uruten kejadin si nandangi terjadi bas pendungi jaman. Contohna, bas Daniel 12:1 ikataken maka Mikael, eme Jesus Kristus, ertindak pagi guna umat Dibata. Nubuat e enggo terjadi bas tahun 1914, sanga Jesus ilantik jadi Raja bas Kerajan Dibata i surga.

⁵ Inubuatken Daniel ka maka “ertindak” pagi Jesus bas “masa kesusahen si lenga pernah terjadi mulai kenca lit bangsa-bangsa seh ngasa waktu e.” “Masa kesusahen” e eme “kiniseran si mbelin” si icatat bas Matius 24:21. Bas pendungi masa kesusahen e, bas Harmagedon, ertindak pagi Jesus guna mbela umat Dibata. Bas buku Ketangkasen ikataken maka kalak si ibela e igelari “kelompok jelma si enterem . . . si selamat ngelewati kiniseran si mbelin.”​—Ket. 7:9, 14.

6. Kai pagi si terjadi kenca kelompok jelma si enterem selamat arah kiniseran si mbelin? Jelasken. (Nen ka “Penungkunen Si Mbaca” si mbahas kerna kekeken guna nggeluh i doni bas majalah enda.)

⁶ Baca Daniel 12:2, bage pe cataten i teruh. Kai pagi si terjadi kenca kelompok jelma si enterem selamat arah kiniseran si mbelin? Sange siakap nubuat bas Daniel 12:2 maksudna eme kekeken ku surga ntah pe kekeken secara rohani si terjadi man umat Dibata bas wari-wari pendungi. Tapi gundari enggo siteh maka ayat e maksudna eme kekeken bas doni si mbaru. Engkai maka banci bage ninta? Bas bahasa aslina, kata “abu” si ipake bas cataten i teruh Daniel 12:2, ipake ka bas Jop 17:16. Janah bas Jop 17:16, kata “abu” ipake guna ngertiken “Kuburen.” Emaka, nubuat bas Daniel 12:2 pasti maksudna kekeken kalak mate si terjadi pagi kenca enggo dung wari-wari pendungi ras perang Harmagedon. *

7. (a) Ise pagi si “nggeluh rasa lalap”? (b) Engkai maka ikataken e “kekeken si terulin”?

 ⁷ Bas Daniel 12:2 ikataken maka lit pagi kalak si ipekeke guna “nggeluh rasa lalap.” Kalak e eme kalak si terus rusaha nandai Jahwe ras Jesus janah tetap patuh sedekah Pemerentahen Seribu Tahun. (Joh. 17:3, ctt.) Kekeken kalak e eme “kekeken si terulin” asangken kekeken si terjadi mbarenda. (Heb. 11:35) Engkai? Perban kalak si ipekeke mbarenda dungna mate mulihi.

8. Kai maksudna lit pagi kalak si “ipermelaken ras ihina seh rasa lalap”?

⁸ Tapi labo pagi kerina kalak si ipekeke nggit ngaloken program pendidiken arah Jahwe. Bas nubuat si ipeseh Daniel ikataken maka arah kalak si ipekeke e lit pagi si “ipermelaken ras ihina seh rasa lalap.” Perban kalak e la nggit patuh, gelar kalak e la itulis bas buku kegeluhen janah la banci dat kalak e kegeluhen si rasa lalap. Kalak e “ihina seh rasa lalap” ntah pe ikernepken. Maksud kata-kata bas Daniel 12:2 eme kai pagi si dungna terjadi man kerina kalak si ipekeke. Si nentukenca eme perbahanen kalak e kenca ipekeke. * (Ket. 20:12) Lit pagi si nggeluh rasa lalap, lit ka si lang.

9-10. Kai nari si terjadi pagi kenca kiniseran si mbelin, janah ise nge si “ersinar pagi bagi langit si terang”?

⁹ Baca Daniel 12:3. Kai deba nari si terjadi pagi kenca kiniseran si mbelin? Bali bagi Daniel 12:2, bas ayat 3 pe lit keterangen kerna kai pagi si terjadi kenca kiniseran si mbelin.

¹⁰ Ise nge si “ersinar pagi bagi langit si terang”? Arah kata-kata Jesus bas Matius 13:43 banci siteh ise kalak e, nina, “Paksa si e, kalak si benar ersinar pagi bagi matawari terangna bas Kerajan Bapakna.” Bas ayat enda, Jesus sangana ngerana kerna “kalak si masuk pagi ku bas Kerajan surga,” eme kalak si merentah pagi ras Jesus bas Kerajan surga. (Mat. 13:38) Emaka, kata-kata bas Daniel 12:3 pasti maksudna kalak si ipilih ku surga ras kai pagi si ilakoken kalak e bas Pemerentahen Seribu Tahun.

11-12. Kai pagi si ilakoken 144.000 kalak si ipilih ku surga bas Pemerentahen Seribu Tahun?

¹¹ Uga pagi kalak si ipilih ku surga nampati “enterem kalak guna ngikutken kebenaren?” Kerja sama pagi kalak e ras Jesus Kristus guna nikapken program pendidiken bas doni sedekah Pemerentahen Seribu Tahun. Si 144.000 e labo saja merentah pagi jadi raja-raja, tapi ngelayani ka kalak e jadi imam-imam. (Ket. 1:6; 5:10; 20:6) Emaka, ikut pagi kalak e guna “mpepalem bangsa-bangsa,” eme nampati jelma gelah alu ertahap banci jadi sempurna. (Ket. 22:1, 2; Esek. 47:12) Pasti meriah kel pagi ukur kalak si ipilih ku surga ndalanken tugas e!

¹² Ise saja si termasuk bas “enterem kalak” si ibaba ku bas kebenaren? Kalak e eme kalak si ipekeke, kalak si selamat arah Harmagedon, bage pe anak-anak si banci saja lahir bas doni si mbaru. Bas pendungi Pemerentahen Seribu Tahun e, kerina kalak bas doni enggo sempurna  pagi. Ndigan nge gelar kalak e tempa-tempa itulis bas buku kegeluhen alu nggunaken tinta, labo alu pensil?

13-14. Kai nge pagi si perlu ibuktiken kalak si enggo sempurna gelah banci kalak e nggeluh seh rasa lalap?

¹³ Perlu siinget maka kalak si enggo sempurna labo pasti alokenna kegeluhen si rasa lalap. Cuba ukuri kerna Adam ras Hawa. Kalak e sempurna, tapi perlu buktiken kalak e maka ia patuh man Dibata Jahwe sope banci datna kegeluhen si rasa lalap. Tapi sayang kel, gagal kalak e patuh man baNa.​—Rom. 5:12.

¹⁴ Bas pendungi Pemerentahen Seribu Tahun kerina kalak enggo sempurna pagi. Kerina nge pagi kalak si sempurna e tuhu-tuhu ndukung pemerentahen Jahwe seh rasa lalap? Ntah, lit nge pagi si bali bagi Adam ras Hawa, si la setia amin pe sempurna? Perlu siteh jawapen penungkunen-penungkunen e. Tapi uga cara metehsa?

15-16. (a) Ndigan nge kerina jelma dat kesempaten mbuktiken kesetianna man Jahwe? (b) Uga nge pagi hasil ujin si terakhir e?

¹⁵ Ipenjaraken pagi Setan 1.000 tahun dekahna. Paksa si e, la banci tipuna ise pe. Tapi bas pendungi Pemerentahen Seribu Tahun e, ibebasken pagi  Setan arah inganna ipenjaraken. Usahakenna pagi nipu jelma si sempurna. Bas ujin si terakhir e, kerina jelma lit pagi kesempatenna mbuktiken alu jelas maka ergaina gelar Dibata ras dukungna pemerentahen Dibata. (Ket. 20:7-10) Si nentuken itulis ntah lang gelar kalak e alu tinta bas buku kegeluhen eme perbahanen kalak e paksa si e.

¹⁶ Bas Pustaka ikataken maka lit pagi kalak si la setia, bali bagi Adam ras Hawa. Mberontak pagi kalak e man pemerentahen Jahwe. Kai pagi si terjadi man kalak e? Bas Ketangkasen 20:15 bagenda nina, “Ise pe si gelarna la tertulis bas buku kegeluhen, ibenterken ku danau api.” Emaka, kerina kalak si mberontak e ikernepken pagi seh rasa lalap. Tapi teremen pagi kalak si sempurna si berhasil ngadapi ujin si terakhir e. Gelar kalak e itulis pagi bas buku kegeluhen seh rasa lalap.

17. Kai si ikataken sada malekat man Daniel kerna jamanta? (Daniel 12:4, 8-10)

¹⁷ Luar biasa kel siakap ngukuri kerna kai si nandangi terjadi! Tapi lit ka keterangen si penting si ikataken malekat  man Daniel kerna jamanta, eme kerna “pendungi jaman” enda. (Baca Daniel 12:4, 8-10; 2 Tim. 3:1-5) Nina malekat e man Daniel, “Mbue kel pagi pemeteh si benar.” E ertina, bas pendungi jaman reh jelasna pagi angkai umat Dibata kerna nubuat Daniel. Ikataken malekat e ka maka bas jamanta “kalak jahat ngelakoken si jahat pagi, janah la lit kalak jahat si ngangkaisa.”

18. Kentisik nari kai si terjadi man kalak jahat?

¹⁸ Gundari, tempa-tempa kalak jahat la ihukum perban kejahatenna. (Mal. 3:14, 15) Tapi lanai ndekah, ihakimi Jesus me kalak si bali bagi kambing janah pisahkenna arah kalak si bali bagi biri-biri. (Mat. 25:31-33) Kalak jahat e la pagi selamat bas kiniseran si mbelin janah kalak e la pagi ipekeke bas doni si mbaru. Gelar kalak e la pagi icatat bas “buku peringet-ingeten” si itulis bas Maleaki 3:16.

19. Kai si perlu silakoken gundari ras engkai? (Maleaki 3:16-18)

¹⁹ Gundari me waktuna guna mbuktiken maka kita labo kalak jahat. (Baca Maleaki 3:16-18.) Dibata Jahwe sangana mpepulung kerina kalak si anggapNa ‘jangNa si istimewa’ guna jadi umatNa. Pasti merhat kita ikut jadi bagin umat Jahwe si istimewa.

20. Kai janji Dibata man Daniel, janah engkai maka merhat kel kita ngidah janji e terjadi?

²⁰ Melala kejadin si luar biasa si terjadi bas jamanta. Tapi si nandangi terjadi ndauh lebihen asangken si e. Lanai ndekah siidah me kalak jahat ikernepken. Kenca si e, siidah ka pagi janji Jahwe man Daniel terjadi, si isina: “Keke pagi kam guna ndatken baginndu bas pendungina.” (Dan. 12:13) Merhat nge kam ngidah Daniel bage pe kalak si keleng atendu keke pagi mulihi? Pasti merhat kam. Adi bage, teruslah kam setia gelah gelarndu tetap lit bas buku kegeluhen.