1. Engkai maka la teta mamang enterem kalak si mesera kapna tek man kalak si deban?

 BAS doni si ikuasai Setan enda, enterem kalak mesera kapna tek man kalak si deban. Enda terjadi perban enggo kecewa kalak e iban peminpin politik, peminpin agama, ras pengusaha. Lit ka si la tek man temanna, tetanggana, ras man keluargana. Labo teta mamang ngidah si e. Bas Pustaka enggo inubuatken maka ‘bas wari-wari pendungi, manusia pagi la setia, tukang pitnah, ras jadi penghianat.’ Sipat kalak si bage enggo bali bagi Setan ntah pe dibata doni enda, la terteki.​—2 Tim. 3:1-4; 2 Kor. 4:4.

2. (a) Man ise kita banci tuhu-tuhu tek? (b) Penungkunen kai saja si lit bas ukurta?

² Selaku kalak Kristen, siteh maka banci kita tuhu-tuhu tek man Jahwe. (Jer. 17:7, 8) Tek kita maka keleng ate Jahwe kita, ras ‘la pernah tadingkenNa’ temanNa. (Ms. 9:10) Banci ka kita tek man Kristus Jesus, perban enggo berekenna geluhna guna kita. (1 Pet. 3:18) Selain si e, enggo sigejapken maka pedah Pustaka erguna ras terteki. (2 Tim. 3:16, 17) Sitik pe la kita sangsi maka Jahwe, Jesus, bage pe Pustaka banci terteki. Tapi banci saja tersungkun-sungkun kita, ‘Uga kerna turang senina bas runggun? Banci nge aku tek man kalak e? Kai nge alasenna banci aku tek man kalak e?’

3. Hak istimewa kai si ibereken Jahwe man banta? (Markus 10:29, 30)

³ Enggo pilih Jahwe kita jadi bagin keluargaNa i sebelang doni. Janah melala kel gunana e man banta. (Baca Markus 10:29, 30.) I sebelang doni, lit turang seninata si engkelengi Jahwe ras rusaha ngikutken patokenNa. Amin  pe beda bahasata, budayata, ras peruista, banci kita mis kompak sanga tangtangna kita jumpa ras kalak e. Selain si e, meriah kel ukurta banci ras-ras muji ras nembah Bapakta si i surga.​—Ms. 133:1.

4. Engkai maka perlu kita penampat turang seninata?

⁴ Lebihen asangken si enggo-enggona, perlu kita tetap ersada ras turang seninata. Sebap mon-mon, sanga lit masalahta perlu kita penampat kalak e. (Rom. 15:1; Gal. 6:2) Banci ka iahken kalak e kita gelah tetap semangat ngelayani Jahwe ras tetap rembak ras Jahwe. (1 Tes. 5:11; Heb. 10:23-25) Adi la isampati turang seninata kita, pasti mesera siakap ngelawan musuhta Setan si Iblis ras doni si jahat enda. Lanai ndekah iserang Setan ras pengikutna me umat Dibata. Paksa si e, pasti ngata bujur kel kita perban isampati turang seninata kita!

5. Engkai maka mon-mon lit si mesera kapna tek man turang seninana?

⁵ Tapi, mon-mon lit si mesera kapna tek man turang senina. Enda banci saja terjadi perban lit turang senina si mbocorken rahasiana ntah la tepat janji man bana. Ntah, banci saja ceda ukurna perban ranan ntah perbahanen turang senina. Pengalamen si bage banci erban mesera siakap tek man turang seninata. Tapi, kai si banci nampati kita tek man turang seninata?

6. Uga kekelengen banci nampati kita tek man turang seninata? (1 Korinti 13:4-8)

⁶ Arus lit kekelengen bas kita gelah banci kita tek man turang seninata. Bas 1 Korinti pasal 13 lit ituriken kerna piga-piga sipat kalak si perkeleng. Sipat-sipat e banci nampati kita tek man  turang seninata. (Baca 1 Korinti 13:4-8.) Contohna, bas ayat 4 ikataken maka “kekelengen e sabar ras mehuli.” Sabar Jahwe man kita amin pe silakoken kesalahen. Emaka, kita pe perlu sabar man turang seninata amin pe ceda ukurta perban ranan ntah pe perbahanenna. Bas ayat 5 ikataken maka kalak si perkeleng “la nukah merawa” ras “la ngkira kesalahen kalak.” E ertina la siinget-inget kesalahen turang seninata. Pengerana 7:9 ngataken, “Ula meter tersinggung.” Sidalankenlah nasehat bas Epesus 4:26, si ngataken, “Ula sempat kena merawa sada warin”!

7. Uga prinsip bas Matius 7:1-5 nampati kita gelah tek man turang senina?

⁷ Banci ka reh nukahna kita tek man turang seninata adi siusih uga perukuren Jahwe nandangi kalak e. Keleng ate Jahwe kalak e janah labo lalap ingetNa kesalahen kalak e. Kita pe bage ka min. (Ms. 130:3) Sidaramilah sipat-sipat si mehuli arah turang seninata ras siukurilah kai si mehuli si banci kari lakokenna. (Baca Matius 7:1-5.) Tek kita man turang seninata perban kalak si perkeleng “tek man kai pe.” (1 Kor. 13:7) Tapi, labo ate Jahwe asal tek saja kita man turang seninata. Ate Jahwe, tek kita man kalak e perban enggo buktikenna ia terteki. *

8. Uga carana gelah banci kam tek man turang seninandu?

⁸ Perlu waktu ras usaha gelah banci tek man sekalak jelma. Uga carana gelah banci kam tek man turang seninandu? Perlu tuhu-tuhu tandaindu kalak e. Ngeranalah kam ras kalak e bas perpulungen. Aturken waktundu erberita ras kalak e. Sabarlah kam man kalak e, bereken kesempaten man kalak e guna mbuktiken maka ia banci terteki. Tangtangna banci saja la banci mis turikenndu kerna perasanndu man kalak si mbaru denga tandaindu. Tapi kenca kena reh deherna, reh nukahna kapndu nuriken perasanndu. (Luk. 16:10) Tapi, uga adi lit turang senina si erban kam kecewa? Ula mis lanai atendu erteman ras ia. Selain si e, ula pediat perbahanen sekalak turang senina erban lanai kam tek man turang senina si deban. Mari sibahas piga-piga usihen arah umat Dibata si setia si tek man kalak si deban amin pe pernah ia kecewa.

9. (a) Kai buktina tetap Hanna tek man pengaturen Jahwe amin pe idahna kelemahen kalak si ilantik Jahwe? (b) Pelajaren kai si banci datndu arah Hanna? (Nen gambar.)

⁹ Pernah nge kam kecewa iban kalak si lit tanggung jawapna bas runggun? Adi pernah, banci usihndu Hanna. Paksa si e, Imam si Mbelin Eli me si minpin kalak Israel nembah Jahwe. Tapi, keluargana labo jadi usihen. Anak-anakna, si ngelayani jadi imam, lalap ngelakoken perbahanen si erban mela ras si la mehuli. Tapi la tegas Eli mpersingeti kalak e. Labo mis ipengadi Jahwe Eli jadi imam. Amin pe bage, Hanna tetap tek man pengaturen Jahwe. Tetap ia reh ku kemah ingan ersembah, amin pe sanga si e Eli si ngelayani jadi imam si mbelin. Bas sada wari, sedih kel Hanna, janah ertoto ia man Jahwe. Tapi sanga idah Eli ia, akapna  Hanna sangana mabuk. Labo pastiken Eli lebe uga situhuna, mis persingetina diberu si sangana ceda kel ukurna e. (1 Sam. 1:12-16) Amin gia bage, tetap itepati Hanna janjina guna mereken anakna ngelayani bas kemah ingan ersembah, amin pe e ertina Eli si ngurus anakna e. (1 Sam. 1:11) Ipediat nge bage lalap perbahanen anak-anak Eli e? Lang. Dungna ihukum Jahwe kalak e. (1 Sam. 4:17) Tapi Hanna dat pasu-pasu. Bereken Dibata man bana sekalak anak dilaki eme Samuel.​—1 Sam. 1:17-20.

10. Kai buktina tetap Raja Daud tek man teman-temanna amin pe pernah ia ihianati?

¹⁰ Pernah nge kam ihianati teman kompakndu? Adi pernah, cuba perdiateken pengalamen Raja Daud. Lit teman kompakna si gelarna Ahitopel. Tapi, sanga usahaken Absalom, anak Daud guna jadi raja, ikut Ahitopel bas pemberontaken e. Pasti ceda kel ukur Raja Daud perban ihianati anakna bage pe temanna ia. Tapi, tetap Daud tek man teman-temanna si deban. Contohna man Usai. Tetap Usai setia man Daud ras la ikut mberontak radu ras Absalom. Usai terbukti jadi teman si mehuli man Daud. Mate pe ia nggit guna nampati Daud.​—2 Sam. 17:1-16.

11. Kai buktina pelayan Nabal tek man Abigail?

¹¹ Cuba perdiateken usihen arah sekalak pelayan Nabal. Nabal eme kalak Israel, ia kalak bayak. Sange, pernah lindungi Daud ras anak buahna pelayan-pelayan Nabal. Bas pudi wari, pindo Daud gelah bereken Nabal pangan ntah kai pe si banci berekenna man anak buah Daud. Pemindon Daud e situhuna labo lebihsa, tapi la nggit Nabal merekenca. Emaka, merawa Daud janah bunuhna atena kerina dilaki bas rumah tangga Nabal. Lit sekalak pelayan Nabal si ngelapor kerna kai si terjadi man Abigail, diberu Nabal. Teh pelayan e maka Abigail banci nampati kalak e gelah selamat. Tek pelayan e man Abigail perban ia itandai diberu si pentar. Emaka, la melariken diri pelayan e. Abigail terbukti banci terteki. Alu perpang, usahaken Abigail gelah la  sehken Daud sura-surana e. (1 Sam. 25:2-35) Tek Abigail maka pasti kari iban Daud keputusen si tepat.

12. Kai buktina tek Jesus man murid-muridna amin pe la kalak e sempurna?

¹² Tek Jesus man murid-muridna amin pe piga-piga kali lakoken kalak e kesalahen. (Joh. 15:15, 16) Contohna, pernah pindo Jakup ras Johanes gelah bereken Jesus keduduken si penting bas Kerajan Dibata. Tapi, e labo erban Jesus curiga nandangi alasen kalak e nembah Jahwe janah labo pengadina kalak e jadi rasul. (Mrk. 10:35-40) Bas pudi wari, sanga Jesus itangkap, kerina murid-muridna nadingken ia. (Mat. 26:56) Amin pe bage, tetap Jesus tek man kalak e. Iteh Jesus kelemahen kalak e, tapi “seh ku kedungenna pe tetap tena keleng” man kalak e. (Joh. 13:1) Kenca Jesus ipekeke, berekenna tugas si penting man 11 rasulna si setia guna minpin dahin erban murid ras ngurus biri-birina si meherga. (Mat. 28:19, 20; Joh. 21:15-17) Rasul-rasul si la sempurna e terbukti terteki perban kerina kalak e setia ngelayani Jahwe seh ngasa kalak e mate. Jelas me, Hanna, Daud, pelayan Nabal, Abigail, ras Jesus eme usihen si mehuli guna tek man kalak si la sempurna.

13. Kai si banci erban mesera siakap tek man turang senina?

¹³ Pernah nge turikenndu kerna masalah pribadindu man turang seninandu, tapi dungna katakenna man kalak si deban? Adi pernah, pasti sakit hati kam. Bage me pengalamen sekalak turang senina si diberu. Turikenna masalah pribadina man sekalak pertua. Kepeken, iceritaken pertua e ka man diberuna. Paginna, itelpon diberu pertua e ia guna mpegegehi ia. Pasti kecewa turang senina e janah lanai kapna ia banci tek man pertua e. Amin pe bage, daramina penampat arah pertua si deban, janah isampati pertua e ia gelah tek mulihi man pertua-pertua.

14. Kai si nampati sekalak turang senina gelah tek mulihi man dua pertua si pernah erban ia kecewa?

¹⁴ Lit sekalak turang senina si enggo ndekah kecewa man dua pertua si la kapna banci terteki. Tapi ukurina kai si ikataken sekalak turang senina si iergaina. Kata-kata e sederhana tapi kena ku pusuhna, isina: “Setan nge musuhta, labo turang seninata.” Ukuri turang senina e kata-kata e janah ertoto ia. Dungna, banci ia erdame ras dua pertua ndai.

15. Engkai maka banci saja perlu waktu guna tek mulihi man turang senina? Bereken contohna.

¹⁵ Pernah nge icabut tugas tambahenndu bas runggun? Adi pernah, pasti ceda kel ukurndu. E me si igejapken Grete. Grete ras mamakna setia ngelayani Jahwe bas Jerman bas tahun 1930-en. Sanga si e, Jerman ikuasai Nazi janah pendahinta ilarang. Meriah akap Grete ndatken tugas erban salinen Sora Ermomo guna ipake turang seninana. Tapi, sanga teh turang seninana maka bapakna nentang kebenaren, lanai bere kalak e lakokenna tugasna. Mbiar turang senina e, bocorken bapakna kari informasi kerna runggun man penentang. Tapi lit denga ka masalah si deban si arus iadapi Grete. Sanga Perang Doni si Peduaken, lanai bere turang senina salinen Sora Ermomo man kalak e, janah sanga jumpa bas dalan pe la cakapi turang senina kalak e. Kecewa janah  sakit hati kel Grete! Perban cedana ukurna, ikataken Grete maka ndekah maka banci ampunina turang seninana ras tek mulihi man kalak e. Tapi dungna, iteh Grete maka Jahwe pe ngampuni kalak e, emaka ia pe arus nggit ngampuni. *

16. Adi pernah kita kecewa iban turang seninata, engkai maka perlu siusahaken gelah banci tek mulihi man kalak e?

¹⁶ Adi pernah kam kecewa man turang senina, usahakenlah gelah tek mulihi man kalak e. Banci saja perlu waktu ras usaha, tapi si e labo sia-sia. Contohna, adi pernah mesui beltekta perban salah perpan, pasti ku lebena lebih hati-hati kita milih pangan. Tapi, ngadi nge kita man? Pasti lang. Bage ka pe, adi pernah kita kecewa perban sekalak turang senina, ula min e erban lanai kita tek man kerina turang seninata. Siteh maka kerina kita labo sempurna. Adi siusahaken gelah tek mulihi man turang seninata, reh riahna me ukurta. Reh nukahna ka siakap erban turang seninata bas runggun siteken.

17. Engkai maka seh kel pentingna tek man turang senina, ras kai si man bahasenta bas artikel seterusna?

¹⁷ Bas doni si ikuasai Setan enda, enterem kalak la siteken. Tapi, banci kita tek man turang seninata, perban kita sikeleng-kelengen. Adi tek kita man turang seninata, meriah ukurta janah tetap kita ersada. E pe banci jadi perlindungen man banta sanga mesera pagi situasina. Uga adi pernah kita kecewa iban turang senina si tek kita man bana? Siusihlah cara rukur Jahwe bas ngenen turang seninata e, sidalankenlah prinsip-prinsip Pustaka, sipebelinlah kekelengenta man turang seninata, janah sipelajarilah contoh-contoh arah Pustaka. Dungna, pasti lanai kita kecewa man turang seninata janah tek kita mulihi man kalak e. Adi silakoken e, melala sidat “teman si deheren asangken si ersenina.” (Kua. 18:24) Tapi, selain tek man turang seninata, perlu ka siusahaken gelah kita pe terteki. Sibahas pagi kerna si e bas artikel seterusna.