Bas 1 Korinti 15:8, bagenda nina Paulus, “Si terakhir, cidahkenna dirina man bangku, si tempa-tempa bagi anak si ilahirken sope waktuna.” Mbarenda, siakap maksud Paulus bas ayat e eme pengenehenen si erban ia jadi kalak Kristen. Bas pengenehenen e idah Paulus Jesus si enggo lit i surga. Tempa-tempa Paulus enggo ilahirken ntah pe ipekeke selaku mahluk roh ndauh sope kekeken ku surga imulai. Tapi, kenca ipelajari terdauhen kerna ayat e, kepeken pengangkanta e perlu isesuaiken.

Memang, bas ayat e Paulus sangana nceritaken kejadin si erban ia jadi kalak Kristen. Tapi, engkai maka peseri Paulus dirina ras “anak si ilahirken sope waktuna”? Lit piga-piga kemungkinenna.

Perubahen Paulus sanga ia jadi kalak Kristen e rempet janah erban sengget. Biasana bayi si lahir sope waktuna banci erban kita sengget. Bage me si terjadi man Saul (si dungna igelari Paulus). Sanga Paulus bas perdalanen ku Damaskus guna nyiksa kalak Kristen si lit i je, la sangkana idahna Jesus bas sada pengenehenen. Perubahen Paulus jadi kalak Kristen pe erban sengget pengikut Jesus i Damaskus. Selain si e, pengalamen e pe erban Paulus seh kel senggetna ras sempat lanai banci ngidah.​—Perb. 9:1-9, 17-19.

Paulus jadi kalak Kristen bas “waktu si la iarapken.” Terjemahen Pustaka si deban eme The Jerusalem Bible nerjemahken ayat e bagenda, “Tempa-tempa aku lahir bas waktu si la iarapken.” Bas ayat-ayat sebelumna, kataken Paulus maka kenca Jesus ipekeke, enterem kalak ngidah Jesus sope ia naik ku surga. (1 Kor. 15:4-8) Tapi Paulus la idahna si e, perban lenga ia jadi kalak Kristen. Bas pudi wari, sanga Jesus enggo i surga, la isangka-sangka Paulus ibereken Jesus sada pengenehenen man bana. Sanga si e me dat Paulus kesempaten ngidah Jesus si enggo ipekeke, amin pe e tempa-tempa bas “waktu si la iarapken.”

Pake Paulus istilah e guna mpeteruk bana. Menurut piga-piga pakar, istilah “anak si ilahirken sope waktuna” mon-mon ipake guna mpeteruk bana. Adi memang kin sangana peteruk Paulus bana, berarti maksudna labo kapna ia cocok jadi sekalak rasul. Bas ayat-ayat berikutna pe bagenda nina, “Aku si rendahna i antara rasul-rasul, janah la aku cocok igelari rasul perban enggo kusiksa mbarenda runggun Dibata. Banci aku bagenda gundari perban kiniulin Dibata si luar biasa.”​—1 Kor. 15:9, 10.

Emaka, banci saja ipeseri Paulus dirina ras anak si ilahirken sope waktuna perban piga-piga alasen enda: (1) La arapna rempet icidahken Jesus dirina man bana, (2) Paulus jadi kalak Kristen bas “waktu si la iarapken,” ntah (3) la kapna ia metunggung ngaloken pengenehenen si luar biasa e. La soal kai alasen Paulus, jelas kel teridah maka ergaina kel pengenehenen e. Si e erban ia tek maka Jesus enggo ipekeke. E me sebapna rusur ceritaken Paulus pengalamenna e sanga beritakenna kerna kekeken Jesus.​—Perb. 22:6-11; 26:13-18.