1. Kai bedana keperlun ras sura-sura?

GELAH tetap nggeluh, la melala siperluken. Siperluken eme pangan, paken, ras ingan tading ngenca. Tapi, sura-suranta la lit batasna. Janah, nterem kalak la isedarina maka melala sura-surana e lenga tentu iperlukenna.

2. Kai saja sura-sura nterem jelma?

² Sura-sura kalak si tading i negeri si musil banci jadi ndauh bedana ras kalak si tading i negeri si makmur. I piga-piga negeri, kalak ersura-sura gelah lit handphone-na, keretana, ntah pe selembar juma saja. I negeri si deban, kalak ersura-sura gelah melala bajuna si meherga, rumah si tergalangen, ntah pe kendaran si termewahen. Tapi, la soal i ja kita tading ntah pe asa buena senta, banci saja mulai kita ersura-sura gelah reh buena barangta. Situhuna kerina e la siperluken ntah pe la ngasup kita nukursa.

3. Kai ertina materialisme?

³ Kai materialisme e? Eme sifat si pentingen iakapna erta benda asangken hubungenna ras Dibata. Aminna gia  keperlun sekalak jelma enggo tercukupi, ia la pernah puas. Lalap atena terbuen. Janah kalak si mesera pe ntah si la merhat nukur barang si meherga banci kena siding materialisme. Akibatna, lanai ipelebena Kinirajan Dibata i bas kegeluhenna.​—Heber 13:5.

4. Uga Setan mpengaruhi kalak alu ”kai si idah”?

⁴ Siarapken Setan eme gelah kita erpengakap maka adi reh buena barangta banci reh riahna kegeluhenta. Emaka, igunakenna donina enda ras ”kai si idah” gelah lalap kita ersura-sura ndatken terbuen barang. (1 Johanes 2:15-17; Kejadin 3:6; Kua 27:20) I ja pa pe, siidah ras sibegiken iklan si erusaha mpengaruhi kita gelah nukur barang si mbaru. Pernah nge itukurndu barang erkiteken terpengaruh nandangi penampilenna si lit i bas toko ntah pe iklan? Pernah nge i bas pudi wari isedarindu maka labo tuhu-tuhu iperlukenndu barang e? Adi terus situkur barang si la siperluken, banci latih siakap. Barang-barang e erban kita lanai bulat ukur ngelayani Jahwe. Contohna, lanai lit waktunta erlajar Pustaka, nikapken ras reh ku perpulungen, janah erberita alu ratur. Ingetlah, Johanes mpersingeti, ”Doni ras kerina isina masap kap pagi.”

5. Kai akibatna adi kita sibuk ndarami terbuen sen ras barang?

⁵ Setan ersura-sura gelah sigunaken gegehta ndarami terbuen sen ras barang asangken ndarami Jahwe. (Matius 6:24) Tapi, adi sipuasken saja ngenca ateta dirinta, kegeluhenta banci sia-sia. Kita banci jadi stres ntah pe ngadapi masalah sen. Si terkelekken, banci bene kinitekenta man Jahwe ras KinirajanNa. (1 Timotius 6:9, 10; Ketangkasen 3:17) Jesus ngatakenca maka ”sura-sura si deban” eme bagi peren duri si banci erban benih lanai turah ntah pe erbuah.​—Markus 4:14, 18, 19.

6. Kai si banci si pelajari i bas Baruh nari?

⁶ Perdiateken Baruh, sekretaris nabi Jeremia. Sanga mulai idaramina ’kemulian man dirina’, Jahwe mpersingeti ia maka lanai dekah Jerusalem ikernepken. Tapi, Jahwe erjanji maka iselamatkenNa pagi kegeluhen Baruh. (Jeremia 45:1-5) Arusna la iarapken Baruh lebihen asa si e. Jahwe la nelametken erta benda. (Jeremia 20:5) Kentisik nari doni Setan ikernepken. Emaka, gundari labo waktuna nambahi barang-barang. Janah, ula siarapken maka kai si lit i bas kita gundari, aminna gia seh kal ergana, lit denga kenca kiniseran si mbelin.​—Kua 11:4; Matius 24:21, 22; Lukas 12:15.

7. Kai si nandangi sibahas, janah engkai?

⁷ Emaka, uga kita banci ncukupi keperlunta ras keluarga, janah tetap mpelebe kai si pentingna i bas kegeluhenta? Uga carana gelah la kena siding materialisme? Janah, uga gelah la aru kal ateta i bas ncukupi keperlunta? I bas Khotbah i Deleng, ibere Jesus kita pedah si mehulina kerna si e. (Matius 6:19-21) Mari sioge ras sibahas Matius 6:25-34. Alu bage, banci kita tek maka arus terus sidarami Kinirajan Dibata, labo erta benda.​—Lukas 12:31.

8, 9. (a) Engkai maka la perlu aru kal ateta nandangi keperlunta? (b) Kai si ieteh Jesus kerna manusia ras keperlunna?

⁸ Oge Matius 6:25. Ieteh Jesus maka aru ate murid-muridna nandangi kai si  ipanna, iinemna, ras ipakena. Emaka, i bas khotbah i Deleng, nina Jesus, ’Ola aru atendu kerna kai si iperlukenndu’. Ate Jesus gelah iangkai kalak e engkai maka la perlu aru atena kerna kerina si e. Ietehna adi aru kal ate kalak e, janah kerna keperlunna tep-tep wari, banci lanai ipelebena kai si pentingna i bas kegeluhen. Erkiteken ermediate kal ia man ajar-ajarna, lit lima kali ipersingeti Jesus kalak e kerna bahaya enda i bas khotbahna.​—Matius 6:27, 28, 31, 34.

⁹ Tapi, engkai maka isuruh Jesus gelah ula aru ateta nandangi keperlunta tep-tep wari? La kin siperluken pangan ras paken? Ue payo! Janah adi la bias senta nukursa, pasti aru ateta. Iangkai Jesus kerna si enda. Ietehna kai saja keperlun manusia. Ietehna maka ”i bas wari-wari pendungi”, ajar-ajarna nggeluh i bas masa si sulit. (2 Timotius 3:1) Situhuna, nterem kalak gundari mesera iakapna ndarami dahin janah kerinana reh ergana. I melala negeri, pendudukna seh kal musilna, alu bage maun-maun la man. Tapi, ieteh Jesus ka maka ”ergan nge kesah asangken nakan janah ergan nge kula asangken uis.”

10. Sanga iajari Jesus ajar-ajarna cara ertoto, menurutna, kai nge si pentingna i bas kegeluhen?

¹⁰ Sope si e, iajari Jesus ajar-ajarna gelah mindo kai si iperlukenna man Bapana si i surga. Banci itotokenna, ”Bereken min kami nakan cukup i bas wari si sendah enda.” (Matius 6:11) I bas kesempaten si deban, iajari Jesus kalak e gelah notoken, ”Bereken min man kami nakan cukup tep-tep wari.” (Lukas 11:3) Tapi, e labo ertina maka arus lalap siukuri uga carana ncukupi keperlunta. Sebalikna, iajari Jesus juak-juakna maka notoken gelah reh Kinirajan Dibata pentingen asangken notoken keperlunna. (Matius 6:10; Lukas 11:2) Gelah lanai aru ate ajar-ajarna, ipersingeti Jesus kalak e uga Jahwe ncukupi keperlun kerina tinepaNa.

11, 12. Kai si banci sipelajari arah cara Jahwe mperdiateken perik-perik? (Nehen gambar i bas pemena artikel.)

¹¹ Oge Matius 6:26. Perlu ’siperdiateken perik-perik si kabang’. Aminna gia kitik, melala ipanna buah, biji, labang, ras cacing. Adi perik e seri galangna ras manusia, mbuen ipanna asangken manusia. Tapi, la perlu ia merdang ras rani. Isikapken Jahwe kerina si iperlukenna. (Masmur 147:9) Memang ia la isuapi Jahwe! Arus ia lawes janah ndarami nakanna sisada. Tapi, kerinana enggo isikapken.

¹² Jesus tek maka adi perik saja iperdiateken Jahwe, terlebih ka manusia. ^[1] (Nehen penjelasen tambahen.) (1 Petrus 5:6, 7) Tentu saja kita la banci kisat. Perlu kita erdahin, bagi nuan-nuan ntah pe ndarami sen guna nukur nakan. Pasti ipasu-pasu Jahwe usahanta. Janah, adi la bias senta ntah pe nakanta, Jahwe tetap nikapken keperlunta. Contohna, keperlunta banci saja ibereken kalak si deban. Jahwe pe nikapken ingan tading man perik. IbereNa kalak e kiningasupen guna erban asarna. Jahwe pe banci nampati kita ndatken ingan tading si cocok man keluarganta.

13. Kai buktina maka ergan kita asangken perik?

¹³ Kenca ipersingeti Jesus ajar-ajarna maka Jahwe mere man perik-perik, nina Jesus, ”Ergan kap kam asa cip-cip”. (bandingken Lukas 12:6, 7.) Sanga  ikataken Jesus kerna si enda, banci saja enggo ieteh Jesus maka lanai ndekah iberekenna kegeluhenna guna manusia. Jesus mate labo guna perik ntah pe rubia-rubia si deban. Ia mate guna kita gelah banci kita nggeluh si rasa lalap.​—Matius 20:28.

14. Engkai maka la lit gunana aru ateta?

¹⁴ Oge Matius 6:27. Ikataken Jesus maka kalak si aru atena la ngasup nambahi umurna, kai ertina enda? Kearunate nandangi keperlunta la banci erban reh gedangna geluhta. Tapi sebalikna, adi stres kal kita banci erban kita sakit janah mate.

15, 16. (a) Kai sipelajari arah cara Jahwe mperdiateken bunga ncole? (Nehen gambar i bas pemena artikel.) (b) Penungkunen kai si perlu siukuri, janah engkai?

¹⁵ Oge Matius 6:28-30. Meriah ukurta make uis si mejile, khususna sanga kita erberita, reh ku perpulungen, ntah pe ndahi kebaktin. Tapi, perlu nge aru ateta nandangi pakenta? Ipersingeti Jesus mulihi ajar-ajarna kerna uga Jahwe ncukupi keperlun tinepaNa. Igunaken Jesus contoh ”bunga ncole si turah i  mbalbal”. Maksud Jesus banci saja erbage bunga si mirip ras bunga ncole. Kerina bunga e la perlu ertenun tapi mejile kal ia. Ikataken Jesus maka ”Raja Salomo si bayak nai pe la lit pakenna bagi bunga ncole e jilena.”!

¹⁶ Perdiateken kai nina Jesus seterusna, ”O kalak si kurang kiniteken! Adi dukut-dukut . . .  bage jilena ibahan Dibata, apai ka kam.” Tapi, iperluken ajar-ajar Jesus terbuen kiniteken. (Matius 8:26; 14:31; 16:8; 17:20) Kalak e perlu tek maka Jahwe nggit janah pasti ncukupi keperlunna. Uga kita? Tek nge kita maka Jahwe pasti ncukupi keperlunta?

17. Kai si banci ncedai hubungenta ras Jahwe?

¹⁷ Oge Matius 6:31, 32. Nterem kalak si la nandai Jahwe ndarami sen ras nambahi barang saja ngenca dahinna. Adi kita bali bagi kalak e, hubungenta ras Jahwe banci ceda. Sieteh maka Jahwe eme Bapa si ngkelengi kita. Janah, tek kita adi silakoken peratenNa ras sipelebe KinirajanNa, pasti ibereNa kerina keperlunta janah lebih. Sieteh ka maka kita tuhu-tuhu banci ermeriah ukur adi  rembak kita ras Jahwe. Alu bage, adi lit ’nakan, uis, ras inganta tading’ saja pe enggo puas siakap.​—1 Timotius 6:6-8.

18. Kai saja si ieteh Jahwe kerna kita, janah kai si pasti ilakokenNa?

¹⁸ Oge Matius 6:33. Adi sipelebe Kinirajan Dibata, pasti ibereken Jahwe kerina keperlunta. Ijelasken Jesus engkai maka banci kita tek man janji e. Nina, ”Ieteh Dibata nge maka kerina enda perlu man bandu.” Jahwe meteh keperlunndu ope denga isedarindu. (Pilipi 4:19) IetehNa baju ras pangan kai si iperlukenndu. Janah, ietehNa maka kam ras keluargandu merluken ingan tading. Pasti ibereken Jahwe kai si tuhu-tuhu iperlukenndu.

19. Engkai maka la perlu aru kal ateta kerna wari si pepagi?

¹⁹ Oge Matius 6:34. Sekali nari ikataken Jesus man ajar-ajarna, ”Ola aru atendu.” Pasti icukupi Jahwe keperlunta tep-tep wari. Emaka, la perlu aru kal ateta kerna wari si pepagi. Adi aru kal ateta, banci saja mulai kita ernalem man dirinta, si dungna banci ncedai hubungenta ras Jahwe. Kita perlu tuhu-tuhu tek man baNa.​—Kua 3:5, 6; Pilipi 4:6, 7.

20. (a) Cita-cita rohani kai si banci ibanndu? (b) Kai si banci ilakokenndu gelah sederhana kegeluhenndu?

²⁰ Seh kal sayangna adi sigunaken gegehta i bas nambahi erta, alu bage lanai silayani Jahwe alu bulat ukur! Searusna sibereken si mehulina man Jahwe. Contohna, banci nge kam pindah ku runggun si merluken terbuen perberita? Banci nge kam jadi perintis? Ntah pe, adi kam enggo jadi perintis, ukurindu nge uga gelah kam banci ngikuti Sekolah bagi Penginjil Kerajaan? Banci nge igunakenndu piga-piga wari seminggu guna nampati i Betel ntah pe i kantor penerjemahen? Ntah, kam banci saja jadi sukarelawan i bas bagin Rancang/Bangun Setempat ras nggunaken piga-piga waktundu guna ikut i bas pembangunen Balai Kinirajan. Ukuri kai saja si banci ilakokenndu gelah kegeluhenndu sederhana, alu bage lit reh buena waktu ras gegehndu guna pendahin Kinirajan. Perdiateken pedah si lit i bas kotak ” Cara Erban Kegeluhenndu Sederhana”. Ertotolah mindo penampat Jahwe sanga erban keputusen. Kenca si e, banlah perubahen si iperlukenndu.

21. Kai si banci erban kam reh rembakna ras Jahwe?

²¹ Jesus ngajari kita gelah ndarami lebe Kinirajan. Alu bage, lanai aru kal ateta nandangi keperlunta. Kita banci reh rembakna ras Jahwe erkiteken tek kita maka pasti ijagaNa kita. Kita erlajar engkuasai diri janah ula kerina sura-suranta ntah pe si itawarken doni enda arus situkur, aminna gia kita ngasup nukursa. Adi sisederhanaken kegeluhenta gundari nari, banci kita tetap setia man Jahwe janah ’ndatken kegeluhen situhu-tuhu’ si enggo ijanjikenNa.​—1 Timotius 6:19.