1. Ban contoh engkai arus sieteh waktu ras keadan si lit i sekelewetta. (Nehen gambar i bas pemena artikel.)

KEBAKTIN nandangi ibenaken. Ketua acara enggo lit i panggung janah ngalo-ngalo si pulung. Musik nandangi iputar. Si pulung meteh maka enda me waktuna kundul guna megiken musik. Itimai-timaina ka khotbah si nandangi ipeseh kenca si e. Tapi, banci saja lit piga-piga kalak la mperdiateken ketua acara ntah pe musik si enggo iputar. Emaka, la isedarina adi kebaktin enggo ibenaken. Erdalan-dalan denga ia ntah pe ngerana-ngerana. Enda ncidahken kai si banci terjadi adi la sieteh waktu ras keadan si lit i sekelewetta. E jadi pelajaren si penting man banta erkiteken kentisik nari kejadin si ndauh terhebatan nandangi terjadi, janah kita arus ersikap-sikap. Kejadin kai?

2. Engkai maka isuruh Jesus ajar-ajarna gelah ”erjaga-jaga”?

² Jesus Kristus mpersingeti ajar-ajarna gelah tetap erjaga-jaga ras ersikap guna ngadapi ”kedungen jaman enda”. Ikatakenna man kalak e, ”Metenget janah erjaga-jagalah kam, sabab la ietehndu ndigan paksana.” Kenca si e, mulih-ulih ikatakenna, ”E maka erjaga-jaga kam.” (Matius 24:3;  oge Markus 13:32-37.) Buku Matius pe ncidahken maka Jesus mpersingeti ajar-ajarna kerna si enda. Nina, ”E maka erjaga dingen ersikaplah, sabab la ietehndu ndigan Tuhanndu reh.” Janah ipersingetina mulihi kalak e, ”E maka kam pe erjaga-jagalah, sabab Anak Manusia si isuruh Dibata e reh i bas paksa si la iarapndu.” Kenca si e iulihina ka, ”Dage ersikap-sikaplah sabab la ietehndu warina ntah pe jamna Tuhan reh.”​—Matius 24:42-44; 25:13.

3. Engkai maka siperdiateken peringeten si ibereken Jesus?

³ Saksi-Saksi Jahwe tuhu-tuhu mperdiateken peringeten si ibereken Jesus. Sieteh maka kita nggeluh i bas ”pendungi doni enda” ras ’kiniseran si mbelin’ si nandangi terjadi! (Daniel 12:4; Matius 24:21) Bagi si inubuatken Jesus, umat Jahwe mberitaken Kinirajan Dibata i belang-belang doni. Paksa si e pe, perang, pinakit, taneh linuren, ras kelihen terjadi i japa pe. Masalah agama, kejahaten, ras kekerasen reh kelekna (Matius 24:7, 11, 12, 14; Lukas 21:11) Gundari, sitimai kal kerehen Jesus guna erban peraten Bapana terjadi i doni.​—Markus 13:26, 27.

4. (a) Engkai maka sikataken adi gundari enggo ieteh Jesus ndigan Armagedon ibenaken? (b) Amin gia la sieteh ndigan kiniseran si mbelin ibenaken, kai si banci siteki?

⁴ Paksa kebaktin, sieteh ndigan acarana ibenaken. Tapi, la banci sieteh ndigan ibenaken kiniseran si mbelin. Nina Jesus paksa ia i doni, ”Kerna warina ntah jamna kejadin e la lit kalak si metehsa. Malekat-malekat si i Surga pe lang, janah Anak e pe lang; Bapa ngenca metehsa.” (Matius 24:36) Tapi, erkiteken Jesus si pagi mimpin perang Armagedon, mbelin kemungkinenna gundari enggo ietehna ndigan perang e ibenaken. (Ketangkasen 19:11-16) Tapi, tetap la sieteh wari ntah jam sanga kedungen e reh. Emaka, kita arus terus erjaga-jaga. Enggo itentukan Jahwe ndigan kiniseran si mbelin ibenaken. Waktuna reh deherna janah ”labo ipedekah-dekah!” (Oge Habakuk 2:1-3.) Engkai maka tek kal kita?

5. Contoh kai si ncidahken maka nubuat Jahwe lalap terjadi tepat i bas waktuna?

⁵ Nubuat Jahwe lalap terjadi tepat i bas waktuna! Contohna, i bas tanggal 14 Nisan 1513 SM, Jahwe mbebasken umatna i bas Mesir nari. I bas pudi wari, isuratken Musa kerna si e, ”I bas wari pendungi si 430 tahun e, kerina suku-suku bangsa [Jahwe] nadingken Mesir.” (Keluaren 12:40-42) 430 tahun e ibenaken sanga isahken perjanjin si iban Jahwe ras Abraham, i bas 14 Nisan 1943 SM. Isi perjanjinna eme ipasu-pasu Jahwe pagi kesusuren Abraham. (Galati 3:17, 18) Kenca si e, nina Jahwe man Abraham, ”Sinusurndu jadi perlajang denggo i negeri kalak; jadi budak pagi ia i je, janah mesui kal atena ibahan kalak 400 tahun dekahna.” (Kejadin 15:13; Perbahanen 7:6) 400 tahun e ibenaken i bas tahun 1913 SM sanga la mehuli perbahanen Ismael man Isak. Janah, 400 tahun e dung sanga Jahwe mbebasken bangsa Israel i bas Mesir nari. (Kejadin 21:8-10; Galati 4:22-29) Emaka, ratusen tahun sope si e, enggo itetapken Jahwe ndigan ibebaskenna bangsa Israel!

6. Engkai kita tek maka Jahwe banci nelamatken umatNa?

⁶ Josua eme salah sada kalak Israel si ibebasken i bas Mesir nari. Ertahun-tahun  kenca si e, ipersingetina bangsana, ”Sekalak-sekalak kam meteh i bas ukurna ras i bas tendina maka [Jahwe] Dibatandu enggo mereken man banndu kerina si mehuli si enggo ipadankenNa. Kerina si ipadankenNa la lit sada pe si la seh, kerina enggo itepatiNa.” (Josua 23:2, 14) Jahwe erjanji maka iselamatkenNa pagi umatNa i bas kiniseran si mbelin nari janah iberekenNa kegeluhen si rasa lalap i doni si mbaru. Banci kita tek maka janjiNa pasti itepati. Emaka, adi ateta nggeluh i bas doni si mbaru, arus kita erjaga-jaga.

7, 8. (a) Kai tugas penjaga i bas jaman si nai, janah kai pelajarenna man banta? (b) Ban contoh kerna kai si banci terjadi adi penjaga terpedem sanga ertugas.

⁷ Kita banci erlajar arah penjaga-penjaga kota i bas jaman si nai. Melala kota, bagi Jerusalem, ikeleweti tembok si meganjang gelah musuh la banci masuk ku kota. Lit penjaga si cinder i datas tembok guna ngawasi daerah si lit i sekelewet kota. Si debanna erjaga-jaga i gerbang kota. Penjaga-penjaga e arus erjaga-jaga suari ras berngi. Adi lit musuh si reh, arus ipersingetina penduduk kota. (Jesaya 62:6) Isedari kalak e maka tuhu-tuhu penting kal gelah tetap erjaga-jaga janah ngawasi alu megermet keadan si lit i sekelewetna. Adi lang, nterem penduduk banci mate.​—Esekiel 33:6.

⁸ Josepus, ahli sejarah Jahudi, njelasken uga maka kalak Romawi banci nerang Jerusalem i bas tahun 70 M. Piga-piga penjaga i bas kota e terpedem. Akibatna, tentera Romawi banci masuk. Itutungna rumah pertoton janah ikernepkenna kota Jerusalem. Eme bagin pendungi arah kiniseran si mbelinna si iadapi bangsa Jahudi.

9. Kai si la isedari nterem jelma gundari?

⁹ Gundari buen pemerentahen njaga perbatasen negarana alu pasuken militer ras sistem keamanan si canggih. Tapi, pemerentahen e ngasup njaga keamanen negarana i bas ancamen musuh si lit i doni e ngenca. La isedarina maka lit pemerentahen si ndauh gegehen si lit i surga si ipimpin Jesus Kristus. Kentisik nari, Jesus erperang ngelawan kerina pemerentahan i doni. (Jesaya 9:6, 7; 56:10; Daniel 2:44) Sitimai-timai kal wari e janah siarapken gelah kita ngasup ngadapisa. Erkiteken si e, siperdiateken kal nubuat Pustaka si Badia janah terus ngelayani Jahwe alu setia.​—Masmur 130:6.

10, 11. (a) Nandangi kai kita perlu metenget, janah engkai? (b) Engkai maka kam tek adi Iblis berhasil erban nterem kalak la mperdiateken nubuat Pustaka?

¹⁰ Bayangken sekalak penjaga si enggo erjaga sada berngin. Paksa nandangi dung tugasna, latih kal iakapna. Alu bage, reh serana iakapna erjaga-jaga. Bage ka kita gundari, reh deherna kita ku kedungen doni enda, reh serana siakap erjaga-jaga. Seh kal sayangna adi la terus kita erjaga-jaga! Mari sibahas telu hal si banci erban kita lanai erjaga-jaga.

¹¹ Iblis nipui jelma. Ia me ”penguasa doni”. Ope denga Jesus mate, lit telu kali ipersingetina ajar-ajarna kerna si e. (Johanes 12:31; 14:30; 16:11) Ipake Iblis agama palsu guna nipu kalak. Eme sababna nterem kalak la mperdiateken nubuat Pustaka si jelas-jelas ncidahken maka kedungen doni enda enggo seh kal deherna. (Sepanya 1:14) Setan enggo ’mpepentang  perukuren kalak si la tek’. (2 Korinti 4:3-6) Akibatna, sanga sikataken man kalak e kerna kedungen doni enggo deher ras Kristus enggo merentah, teremen la nggit megikensa. Kalak e la tertarik man beritanta.

12. Engkai kita la nggit itipu Iblis?

¹² Aminna gia nterem kalak la tertarik man nubuat Pustaka, ula sempat kitik ukurta. Sieteh engkai maka erjaga-jaga e penting. Nina Paulus man turang seninana, ”Sabab kam pe tangkas ietehndu maka wari [Jahwe] e reh bagi penangko si reh asum berngi”. (Oge 1 Tesalonika 5:1-6.) Ipersingeti Jesus kita, ”Tetaplah min erjaga-jaga sabab Anak Manusia si isuruh Dibata reh i bas paksa si la arapndu.” (Lukas 12:39, 40) Kentisik nari, Setan nipu nterem kalak gelah tek maka kerinana ”tenang dingen aman” i doni. Kenca si e, rempet reh wari Jahwe janah sengget kal ia kerina. Uga kita? Adi ateta ngasup ngadapi wari e janah la tertipu bagi kalak si deban, kita arus ”metenget dingen jore ukurta.” Erkiteken si e, perlu sioge Pustaka si Badia tep-tep wari janah ngukuri kai si ipebetehken Jahwe man banta.

13. Uga biak doni enda mpengaruhi nterem kalak, janah uga carana gelah la kita terpengaruh biak doni enda?

¹³ Biak doni mpengaruhi cara rukur kalak. Gundari lanai iakap kalak perlu nandai Dibata. (Matius 5:3) Emaka, igunakenna menam kerina waktu ras tenagana guna ndarami kai si itawarken doni enda. (1 Johanes 2:16) Selain si e, reh buena jenis hiburen si erbanca kalak ndarami kesenangen ras kepuasen dirina saja ngenca. (2 Timotius 3:4) Kerinana enda erban kalak lanai mperdiateken kai si pentingna. La diatena Dibata. Eme sababna maka ipersingeti Paulus kalak Kristen guna tetap ”medak” gelah la sibuk ndarami kepuasenna saja.​—Roma 13:11-14.

14. Peringeten kai si lit i bas Lukas 21:34, 35?

¹⁴ Ateta gelah caranta rukur ipengaruhi kesah si badia, labo biak doni. Alu kesah si badia, isampati Jahwe kita gelah tuhu-tuhu ngangkai kerina si terjadi. (1 Korinti 2:12) ^[1] (Nehen penjelasen tambahen.) Aminna pe bage, perlu kita metenget. Kai si biasa-biasa saja siakap banci erban kita lanai mereken si mehulina man Jahwe. (Oge Lukas 21:34, 35.) Kalak si deban banci saja iakapna kita motu erkiteken kita tek maka kita nggeluh i bas wari-wari pendungi. (2 Petrus 3:3-7) Tapi, ula sempat ibanna kitik ukurta. Siidah melala bukti si jelas maka kedungen e nandangi reh. Gelah kesah si badia mpengaruhi kita, arus kita reh ku perpulungen alu ratur.

15. Kai si ialami Rasul Petrus, Jakup, ras Johanes, janah uga e banci terjadi man banta?

 ¹⁵ Kelemahenta banci erban mesera siakap erjaga-jaga. Iangkai Jesus maka manusia la serta janah lit kelemahenna. Ukuri kai si terjadi berngi ope denga ia mate. Aminna pe Jesus serta, ietehna maka perlu ia ertoto mindo penampat Bapana gelah tetap setia. Jesus nuruh Rasul Petrus, Jakup, ras Johanes gelah tetap erjaga-jaga asum ia ertoto. Tapi, la isedari rasul-rasul uga pentingna toto e. Latih iakapna janah terpedem. Jesus pe latih iakapna, tapi tetap ia erjaga-jaga janah ertoto. Arusna rasul-rasul pe ertoto paksa si e.​—Markus 14:32-41.

16. Menurut Lukas 21:36, pedah kai si ibereken Jesus gelah tetap kita erjaga-jaga?

¹⁶ Kai si banci nampati kita ’tetap erjaga-jaga’ janah ngasup ngadapi wari Jahwe? Perlu mbelin kal sura-suranta ngelakoken kai si mehuli. Tapi, e saja la bias. Piga-piga wari sope Jesus mate, ipebetehkenna man ajar-ajarna maka kalak e perlu terus ertoto mindo penampat Jahwe. (Oge Lukas 21:36.) Gelah tetap erjaga-jaga i bas pendungi jaman enda, kita pe arus lalap ertoto man Jahwe.​—1 Petrus 4:7.

17. Kai saja si arus silakoken gelah ngasup ngadapi kedungen doni enda?

¹⁷ Nina Jesus maka wari e pasti reh ”i bas paksa si la iarapndu” (Matius 24:44) Emaka, kita arus lalap ersikap. Gundari labo waktuna ndarami kegeluhen si menurut doni enda banci erban kita ermeriah ukur, sabab e labo tuhu. Arah Pustaka, Jahwe ras Jesus mpebetehken man banta uga carana gelah tetap erjaga-jaga. Emaka, mari siperdiateken uga nubuat-nubuat Pustaka enggo terjadi gundari. Mbera reh rembakna kita ras Jahwe janah sipelebe Kinirajan Dibata i bas kegeluhenta. Alu bage, kita pasti ngasup ngadapi wari e. (Ketangkasen 22:20) Kerinana enda nentuken kegeluhen ntah pe kematenta!