1, 2. Uga Rasul Paulus ncidahken pengataken bujurna nandangi lias ate Dibata?

ALU bulat ukur ikataken Paulus maka, ’Lias ate Dibata si la metunggung kualoken e labo sia-sia.’ (Oge 1 Korinti 15:9, 10.) Erkiteken isiksa Paulus mbarenda kalak Kristen, isedarina maka la ia metunggung ngaloken lias ate Dibata.

² Nandangi kematenna, Paulus nuratken man Timotius, ”Kukataken bujur man Kristus Jesus Tuhanta, si enggo mereken gegeh man bangku i bas aku ndahiken dahinku. Kukataken bujur man bana sabap metunggung iakapna aku, itangkuhkenna aku jadi si erdahinna.” (1 Timotius 1:12-14) Dahin kai? Ipebetehken Paulus man pertua i runggun Epesus, ’Tapi labo persoalen man bangku kerna diringku, gelah min banci aku seh ku ujung perlumban dingen kudungi dahin si ibereken Tuhan Jesus man bangku, eme meritaken berita si meriah kerna lias ate Dibata si la metunggung ialoken.’​—Perbahanen 20:24.

3. Tugas istimewa kai si ibereken man Paulus? (Nehen gambar i bas pemena artikel.)

 ³ ”Berita si meriah” kai si iberitaken Paulus? Janah, uga berita e njelasken kerna lias ate Jahwe? Nina Paulus man kalak Kristen i Epesus, ”Enggo ibegindu uga Dibata ngangkat aku jadi serayanNa guna nehken lias ateNa guna kepentingenndu.” (Epesus 3:1, 2) Jesus nuruh Paulus mberitaken man kalak si labo Jahudi maka kalak e gundari banci ikut merentah ras Kristus i bas Kinirajan Dibata. (Oge Epesus 3:5-8.) Paulus erberita alu ergiah-giah janah jadi usihen man kalak Kristen si gundari. Jadi icidahkenna maka lias ate Dibata e man bana ”labo sia-sia”.

4, 5. Engkai banci sikataken maka ”berita si meriah kerna Kinirajan” seri ras ’berita si meriah kerna lias ate Dibata si la metunggung ialoken’?

⁴ I bas wari-wari perpudi, umat Jahwe itugasken mberitaken ”Berita si meriah kerna Kinirajan . . . man manusia i belang-belang doni enda, jadi saksi man kerina bangsa.” (Matius 24:14) Berita si meriah kerna Kinirajan e pe banci ikataken ”berita si meriah kerna lias ate Dibata si la metunggung ialoken.” Engkai? Erkiteken kerina pasu-pasu si ibereken Kinirajan Dibata eme ulih lias ate Jahwe. (Epesus 1:3) Paulus erberita alu ergiah-giah guna ncidahken pengataken bujurna nandangi lias ate Jahwe. Siusih nge Paulus e?​—Oge Roma 1:14-16.

⁵ I bas artikel peteluken pelajaren enda, sieteh maka aminna gia kita erdosa, sidat manfaat arah lias ate Jahwe alu erbage cara. Erkiteken si e, kita ertanggung jabap ngajari kalak si deban kerna uga Jahwe ncidahken kekelengenNa ras uga kalak e banci ndatken manfaatna. Uga kita banci nampati kalak si deban gelah ngergai lias ate Dibata?

6, 7. Sanga sijelasken kerna tebusen, engkai maka banci ikataken maka kita pe mberitaken kerna lias ate Dibata?

⁶ Gundari, nterem kalak la salah iakapna erban dosa. Emaka, la iangkaina engkai manusia merluken tebusen. Selain si e, reh teremna kalak meteh maka cara geluhna la erban ia ermeriah ukur. Kenca ngerana ras Saksi Jahwe, maka ieteh kalak e kai erti dosa, kai akibatna man manusia, janah kai si perlu ilakoken gelah lanai jadi budak dosa. Sanga iangkai kalak si meteruk ukur kai erti dosa, bujur kal ikatakenna man Jahwe erkiteken enggo iutusna anakNa ku doni guna mbebasken kita i bas dosa ras kematen nari. Enda ilakoken Jahwe erkiteken kekelengen ras lias atena si luar biasa.​—1 Johanes 4:9, 10.

⁷ Perdiateken kata-kata Paulus kerna Anak Jahwe: ”Sabap erkiteken Kristus enggo kita itebusi, eme dosa-dosanta enggo ialemi Dibata. Seh kal belinna kiniulin Dibata.” (Epesus 1:7) Korban tebusen Jesus eme bukti kekelengen Dibata si mbelinna man banta janah bukti lias ate Jahwe si luar biasa. Meriah ukurta kenca meteh maka adi kita erkiniteken man tebusen Jesus, dosanta banci ialemi janah bersih pusuh peratenta! (Heber 9:14) Enda tuhu-tuhu berita si meriah si arus simbarken!

8. Engkai manusia si erdosa perlu idameken ras Dibata?

⁸ Menurut Dibata, kalak si la erkiniteken man korban Jesus eme musuh. Emaka, kita ertanggung jabap guna mpebetehken man kalak e adi ia banci jadi teman Dibata. Isuratken Johanes, ”Ise tek man Anak e ialokenna me kegeluhen si tuhu-tuhu si la  erkeri-kerin. Tapi si ngelawan Anak e asa ndigan pe la ngaloken kegeluhen si rasa lalap e, janah ia lalap iteruh ukumen Dibata.” (Johanes 3:36) Meriah ukurta erkiteken korban tebusen Jesus, kita banci erteman ras Dibata. Nina Paulus, ”I bas sada paksa nai, sirang kam ras Dibata. Kam jadi imbangNa erkiteken perbahanen ras perukurenndu si jahat. Tapi genduari, erkiteken kematen kula AnakNa, iperdameken Dibata kam ras DiriNa.”​—Kolose 1:21, 22.

9, 10. (a) Tanggung jabap kai si ibereken Kristus man terpuk si iminaki? (b) Uga ”biri-biri si deban” nampati terpuk si iminaki?

⁹ Ibere Kristus dahin man terpuk si iminaki si lit i doni. Eme ”dahin guna njadiken musuhNa jadi temanNa.” Paulus mpebetehken man kalak e, ”Kerina si enda Dibata erbahanca, maka arah Kristus, kita si gel-gel nari ermusuhen ras Ia, enggo ibahanNa jadi temanNa. Janah man kami iberekenNa dahin guna njadiken musuhNa jadi temanNa. Alu kata si deban: Dibata enggo nai reh i bas Kristus; enggo ijadikenNa manusia jadi teman Dibata. Dibata la mperkiraken kelepaken manusia. Janah man kami enggo iendeskenNa berita perdamen e. Dage kami enda me utusen-utusen Kristus, bali ras Dibata jine si mindo man bandu arah kami. I bas gelar Kristus ipindo kami alu mesangat man bandu: bere min maka kam si gel-gel nari ermusuhen ras Dibata banci ibahan Dibata jadi temanNa!”​—2 Korinti 5:18-20.

¹⁰ ”Biri-biri si deban” ndatken kinihamaten guna nampati terpuk si iminaki i bas pendahin enda. (Johanes 10:16) Selaku utusen Kristus, mbelin kal tanggung jabap ”biri-biri si deban” i bas mberitaken berita si meriah. Iajarkenna kebenaren janah isampatina kalak si deban erteman ras Jahwe. Enda bagin si penting i bas mberitaken berita si meriah kerna lias ate Dibata.

11, 12. Engkai ngajari kalak si deban kerna toto bali bagi mberitaken berita si meriah?

¹¹ Nterem kalak ertoto gelah tenang iakapna. Tapi, kalak e la tuhu-tuhu tek maka Dibata mbegiken totona. Perlu ietehna maka Jahwe eme Dibata ”Si megiken pertoton.” Isuratken Daud, ”Kam kap si megiken pertoton. Erkiteken enggo erdosa, kerina kalak reh man baNdu. Mberat kal dosa-dosa kami tapi keri kal ialemiNdu.”​—Masmur 65:3, 4.

¹² Ipebetehken Jesus man ajar-ajarna, ”Ntah kai gia ipindondu i bas gelarku, kubereken nge.” (Johanes 14:14) Erti ”kai gia” banci sitotoken si sentudu ras peraten Jahwe. Isuratken Rasul Johanes, ”La kita mbiar i bas adep-adepen Dibata sabap ibegikenNa kita adi sipindo man baNa kai si sentudu ras peratenNa.” (1 Johanes 5:14) Meriah kal siakap banci nampati kalak si deban ngangkai maka toto labo ngenca erban tenang pusuhta, tapi banci ka erban kita rembak ras Jahwe ”si dem alu lias ate”! (Heber 4:16) Siajari kalak si deban ertoto alu cara si benar, man pribadi si tepat, ras mindo kai pe si sentudu ras peraten Jahwe. Alu bage, kalak e banci jadi teman Jahwe janah terapul paksa ngalami kesusahen.​—Masmur 4:2; 145:18.

13, 14. (a) Kai kinihamaten si mbelin si ialoken terpuk si iminaki i bas wari si pepagi? (b) Hal luar biasa kai si pagi ialoken terpuk si iminaki man manusia?

¹³ Icidahken Jahwe pagi terbuen lias ateNa i bas doni si mbaru. Uga carana? 144.000 si merentah pagi ras Kristus i surga ndatken kinihamaten si luar biasa. Nina Paulus, ”Tapi perkuah ate Dibata la ersibar, janah mbelin kal keleng ateNa man banta.  Seh maka asum kita mate i bas pertendin erkiteken salahta, ipegeluhNa kita mulihi radu ras Kristus. Erkiteken lias ate Dibata nge maka kam enggo terkelin. I bas persadanta ras Kristus Jesus, ipekeke Dibata kita ras Kristus, janah ipekundulNa kita ras Ia i bas ingan si meganjang. Si enda ibahan Dibata gelah seh rasa lalap icidahkenNa KiniulinNa si lanai kal lang-lang belinna, e me lias ateNa man banta i bas Kristus Jesus.”​—Epesus 2:4-7.

¹⁴ Jahwe nikapken melala hal si luar biasa man terpuk si iminaki sanga kalak e pagi merentah ras Kristus i surga. Enda la terbayangken kita. (Lukas 22:28-30; Pilipi 3:20, 21; 1 Johanes 3:2) Icidahken Jahwe pagi lias ateNa si mbelin si la metunggung ialoken man terpuk si iminaki alu cara si istimewa. Kalak e jadi ”Jerusalem si Mbaru”, ntah pe penganten Kristus. (Ketangkasen 3:12; 17:14; 21:2, 9, 10) Kalak e pagi ras Kristus ”pepalem bangsa bangsa.” Isampatina manusia gelah bebas i bas dosa ras kematen nari janah dungna jadi sempurna.​—Oge Ketangkasen 22:1, 2, 17.

15, 16. Uga Jahwe ncidahken lias ateNa man ”biri-biri si deban” i bas wari si pepagi?

¹⁵ I bas Epesus 2:7 ikataken maka icidahken Dibata pagi lias atena ”seh rasa lalap”. Paksa si e, kerina kalak si lit i doni pasti nggejapken lias ate Dibata si mbelin si la metunggung ialoken. (Lukas 18:29, 30) Ipekeke Jahwe pagi kalak si mate. E salah sada hal si hebatna si ilakoken Jahwe guna ncidahken lias ateNa. (Jop 14:13-15; Johanes 5:28, 29) Ise pagi si ipekeke? Dilaki ras diberu si setia si mate ope denga Kristus mate jadi korban ras ”biri-biri si deban” si tetap setia seh asa mate sanga wari-wari pendungi enda. Kerina pagi kalak e ipekeke mulihi gelah terus ngelayani Jahwe.

¹⁶ Selain si e, jutan manusia si mate ope denga nandai Dibata ipekeke ka pagi. Isuratken Johanes, ”Jenari kuidah kalak si  enggo mate, subuk si mbelin bage pe si kitik, tedis i lebe-lebe kursi Kinirajan e. Kitap-kitap italangi. Jenari italangi ka sada Kitap nari, e me Kitap Kegeluhen. Kenca bage kalak si enggo mate iadili rikutken kai si enggo ibahanna, bagi lit isuratken i bas Kitap-Kitap e. Emaka lawit ngendesken kalak mate si lit i bas ia. Kematen ras doni kematen pe ngendesken kalak mate si lit i bas ia, janah iadili me kerina rikutken perbahanenna sekalak-sekalak.” (Ketangkasen 20:12, 13) Kalak si ipekeke enda lit kesempatenna erlajar kerna Jahwe janah ngakui pemerentahenNa. Kalak e arus erlajar ras ngikuti prinsip-prinsip Pustaka bage pe perentah si mbaru si lit i bas ”Kitap-Kitap”. Perentah si mbaru e pe salah sada cara Jahwe ncidahken lias ateNa.

17. Kai si perlu siinget paksa erberita?

¹⁷ Gundari, mberitaken berita si meriah kerna Kinirajan reh pentingna perban kedungen e nggo ndeher! (Markus 13:10) Perlu siinget tujunta erberita eme nghamati Jahwe. Emaka, perlu sipebetehken man kalak si deban adi kerina pasu-pasu i bas doni si mbaru banci inanami perban lias ate Jahwe ngenca.

18, 19. Uga kita muji lias ate Jahwe?

¹⁸ Paksa erberita banci sijelasken maka sanga Kinirajan Kristus merentah, manusia banci ndatken manfaat arah tebusen janah alu manjar-anjar jadi serta. Nina Pustaka, ”Sabap i bas sada wari pagi ibebasken Dibata me kerina si enggo ijadikenNa e i bas perbudaken si erbahanca ia kernep, gelah ia merdeka janah ngenanami kebebasen dingen kemulian ras kerina anak-anak Dibata.” (Roma 8:21) E banci terjadi erkiteken lias ate Jahwe ngenca.

¹⁹ Sidat kinihamaten guna mpebetehken man kalak si deban kerna janji si lit i bas Ketangkasen 21:4, 5, ”Iapusi Dibata me kerina iluh anak-anakNa e. Lanai pagi lit kematen, ceda-ate, tangis ntah pe si mesui. Sabap si pemena enggo lepas.” Kenca si e, Jahwe, pribadi si kundul i bas kursi Kinirajan e ngatakenca, ”Nehenlah, genduari Kubahan kerina jadi mbaru!” Nina ka, ”Suratkenlah enda, sabap kata enda tuhu janah terteki kap.” Sanga siberitaken enda alu ergiah-giah, sipuji lias ate Jahwe!