1, 2. (a) Turiken perumpaman Jesus kerna si mada kebun anggur. (b) Uga perumpaman e njelasken kerna sifat melumbar ras lias ate si la metungging ialoken?

ERPAGI-PAGI si lampas, sekalak si mada kebun anggur lawes ku tiga guna ndarami si erdahin. Ipebetehkenna asa kai upahna, janah piga-piga dilaki setuju guna erdahin i bas kebunna. Tapi erkiteken kurang denga si erdahinna, lawes ka ia ku tiga guna nambahi si erdahin. Ia erjanji igalarina kari kalak e alu upah si cocok. Paksa nggo ben, ipepulungna si erdahin guna mereken gajina. Iberekenna upah si seri la soal nggo sada warin ia erdahin ntah pe sada jam ngenca. Tapi, jungut-jungut dilaki si sada warin erdahin. Emaka nina si mada kebun e, ’La kin kena nggo setuju ras upah si nggo kukataken? La kin hakku nggalari si erdahinku asakai pe ateku kubereken? Ntah cian kin atendu ngidah aku melumbar?’​—Matius 20:1-15.

² I bas kisah enda, Jesus ngajari kita sada hal si penting kerna lias ate Dibata si la metunggung ialoken. ^[1] (Nehen penjelasen tambahen) (Oge 2 Korinti 6:1.) Lit si erpengakap maka dilaki si erdahin sada warin arusna lebih mbue upahna. Tapi, si mada kebun ncidahken lias atena man kalak si erdahin piga-piga jam saja. Menurut sekalak ahli, kata lias ate si la metunggung  ialoken si icatat bas Pustaka banci ngertiken hadiah si ibereken alu la mindo balasen janah la metunggung ialoken sekalak jelma, ntah pe kai si ibereken man sekalak jelma si la metunggung ngalokenca.

3, 4. Engkai ras uga Jahwe ncidahken lias ateNa man kerina jelma?

³ Pustaka si Badia mpebetehken man banta maka lias ate Dibata si la metunggung ialoken eme ”pemereNa” si la nggalar. (Epesus 3:7) Erkiteken kita rusur gagal patuh man Jahwe, la kita metunggung ngaloken lias ateNa. Janah, kita arusna mate. Nina Raja Solomo, ”I bas pertibi enda labo lit kalak serta, si katawari pe mehuli perbahanenna dingen la pernah ersalah.” (Pengerana 7:20) I bas pudi wari, ikataken rasul Paulus ka maka ”kerina manusia enggo erdosa janah enggo ndauh sirang ras sura-sura Dibata si mejile” janah ”sabap upah dosa eme kematen”.​—Roma 3:23; 6:23a.

⁴ Erkiteken keleng kal ate Jahwe manusia, iutusNa ”anakNa si tonggal” gelah mate guna banta. Enda me bukti lias ate Dibata si seh kal mbelinna. (Johanes 3:16) Ikataken Paulus maka Jesus gundari ”ipehaga alu kiniulin dingen pujin erkiteken kematen si enggo inanamina” janah ”gelah arah lias ate Dibata inanamina kiniseran kematen guna kerina manusia”. (Heber 2:9) Payo, ”pemere si ibereken Dibata man banta e me kegeluhen si rasa lalap i bas persadan ras Kristus Jesus”.​—Roma 6:23b.

5, 6. Kai hasilna adi kita ikuasai (a) dosa? (b) lias ate Dibata?

⁵ Uga maka kita banci erdosa ras mate? Isuratken Pustaka si Badia maka ”erkiteken dosa sekalak jelma, kematen enggo ngerajai kerina jelma”. Emaka, erkiteken kita kesusuren Adam, kita la sempurna janah dungna mate. (Roma 5:12, 14, 17) Tapi, banci sipilih gelah ula ikuasai, ntah pe ikendaliken, dosa. Uga carana? Perlu kita erkiniteken man tebusen Kristus emaka banci sidatken manfaat i bas lias ate Jahwe nari. Nina Pustaka si Badia, ”Tapi i ja reh buena dosa, i je me pe ndauh reh belinna lias ate Dibata. Dage, bagi nai dosa erkuasa desken sekalak raja si maba manusia ku bas kematen, bage me pe lias ate Dibata genduari enggo erkuasa desken sekalak raja si ngerambakken manusia kempak Dibata, janah mabai kita ku bas kegeluhen si tuhu-tuhu si rasa lalap arah Jesus Kristus Tuhanta.”​—Roma 5:20, 21.

⁶ Amin gia kita erdosa denga, ula sipediat dosa ngkuasai kita. Emaka, paksa kita erbahan salah, sipindo pengalemen i bas Jahwe nari. Paulus mpersingeti kita, nina, ”Dosa lanai erkuasa nandangi kam, sabap kam lanai nggeluh i teruh kuasa Undang-undang, tapi i teruh lias ate Dibata”. (Roma 6:14) Adi bage, uga carana gelah banci sidatken manfaat i bas lias ate Dibata? Ijelasken Paulus, ”Sabap nggo ipetangkas Dibata lias ateNa . . . ngajari kita nadingken kegeluhen si la ngena ate Dibata ras sura- sura doni, gelah nggeluh kita ngkuasai dirinta, bujur dingen sisembah Dibata alu kegeluhenta i doni enda.”​—Titus 2:11, 12.

7, 8. Kai ertina lias ate Jahwe si icidahken alu cara ”si pelain-lain”? (Nehen gambar pemena artikel.)

⁷ Isuratken rasul Petrus, ”Sekalak-sekalak, selaku pengurus si mehuli i bas pemere Dibata si pelain-lain e, si iberekenNa erpalasken lias ateNa, arus nggunaken pemere e guna kiniulin kalak si deban.” (1 Petrus 4:10) Kai maksudna lias ate Jahwe icidahken alu cara ”si pelain-lain”? Ertina, kai pe perbebenta, lalap ibereken Jahwe kai si iperluken gelah kita banci  megenggeng janah ngatasi kerina masalahta.​—1 Petrus 1:6.

⁸ Isuratken rasul Johanes, ”Erkiteken Ia dem perkuah ate, ipasu-pasuNa kita kerina, iberekenNa man banta lias ate si la erkeri-kerin.” (Johanes 1:16) Erkiteken icidahken Jahwe lias ateNa alu erbage cara, melala pasu-pasu sialoken. Kai piga-piga pasu-pasu e?

9. Kai salah sada pasu-pasu i bas lias ate Jahwe? (b) Uga kita banci ncidahken pengatan bujurta nandangi pasu-pasu e?

⁹ Dosanta ialemi Jahwe. Erkiteken lias ate Jahwe, dosa-dosanta banci ialemi, adi kita ertobat janah terus erjuang i bas ngelawan sura-sura si salah. (Oge 1 Johanes 1:8, 9.) Ijelasken Paulus man kalak si iminaki i bas jamanna uga Jahwe ngalemi dosa, ”Kita enggo ipulahi Dibata i bas kuasa si gelap nari. IbabaNa kita ku bas Kinirajan Anak kekelengenNa. Erkiteken anakNa maka kita enggo itebusi, dosa-dosanta nggo ialemi Dibata.” (Kolose 1:13, 14) Bujur kal sikataken nandangi perkuah ate Dibata, emaka sipuji ateta Ia. Janah erkiteken Jahwe ngalemi dosanta, melala pasu-pasu luar biasa si deban si banci sidatken.

10. Kai ka pasu-pasu si banci sidatken erkiteken lias ate Dibata?

¹⁰ Banci kita erdame ras Dibata. Erkiteken la sempurna, mulai tubuhta nari kita nggo jadi musuh Dibata. Amin gia bage, ikataken Paulus, ”Gelgel nari kita imbang Dibata, tapi enggo iperiahken Dibata kita ras diriNa arah kematen anakNa.” (Roma 5:10) Ertina, banci kita erdame ras Dibata janah jadi temanNa erkiteken tebusen. Ijelasken Paulus enda janah kai hubungenna ras lias ate Dibata man turang seninana si iminaki, ”Erkiteken kita enggo rembak ras Dibata erkiteken kinitekenta, emaka kita nggeluh i bas perdamen ras Dibata arah Tuhanta Jesus Kristus. Jesus Kristus me si maba kita bengket ku bas lias ate Dibata erkiteken kinitekenta. Janah i bas lias ate Dibata e me kita nggeluh dingen ringan.” (Roma 5:1, 2) Ngata bujur kal kita erkiteken banci erdame ras Jahwe!

11. Uga terpuk si iminaki maba ’biri-biri si deban’ guna ndalanken kai si benar?

¹¹ Kita banci jadi kalak si bujur i lebe-lebe Dibata. Isuratken nabi Daniel maka i bas wari-wari pendungi pagi, kalak ”si pentar”, eme terpuk si iminaki, maba ”enterem kalak ndalanken kai si benar”. (Oge Daniel 12:3.) Uga carana? Iberitakenna berita si meriah janah iajarkenna hukum Jahwe man jutan ’biri-biri si deban’. (Johanes 10:16) Alu bage, biri-biri si deban banci ikataken jadi kalak si bujur i lebe-lebe Dibata. Enda banci terjadi erkiteken lias ate Jahwe ngenca. Ijelasken Paulus, ”Tapi arah pemere Dibata erpalasken lias ateNa, kerina manusia irembakken Dibata kempak diriNa, arah pertebusen si ibahan Kristus Jesus.”​—Roma 3:23, 24.

12. Kai hubungen pertoton ras lias ate Dibata?

¹² Banci kita rembak ras Dibata i bas pertoton. Erkiteken lias ate Jahwe, banci kita ertoto man baNa. Ikataken Paulus tahta Jahwe eme tahta si dem alu lias ate. Iundang Paulus ka kita gelah ndeheri tahta Jahwe e ”alu la biar-biaren”. (Heber 4:16a) Ndigan pe banci kita ertoto erkelangken Jesus. Enda sada kinihamaten si mbelin man banta! Nina Paulus, ”Erkiteken tek kita man baNa lit hakta guna ngadap ku lebe-lebe Dibata alu la biar-biaren.”​—Epesus 3:12.

13. Erkiteken lias ate Dibata, uga kita banci ndatken ”penampat i bas paksa si iperluken kita”?

¹³ Banci sidatken penampat i bas waktu si tepat. Paulus nuruh kita gelah  ertoto tiap kenca kita perlu penampat, maka ”sialoken perkuah ate ras lias ate gelah dat kita penampat i bas paksa si iperluken kita”. (Heber 4:16b) Tiap kita ngadapi kesuliten, banci sipindo penampat Jahwe. Janah, ijabapNa pertotonta amin gia la wajip ilakokenNa. Rusur igunakenNa turang seninanta guna nampati kita. Jahwe njabap pertotonta ”emaka melciklah ukurta ngatakenca, ’[JAHWE] kap si nampati aku. Emaka labo aku mbiar. Kai kin banci ibahan kalak man bangku?’”—Heber 13:6.

14. Uga lias ate Jahwe ngapuli pusuhta?

¹⁴ Pusuhta banci terapul. Jahwe lalap ngapuli kita paksa kita putus asa. Enda pasu-pasu si mbelin! (Masmur 51:19) Paksa kalak Kristen i Tesalonika ianiaya, isuratken Paulus, ”Tuhanta Jesus Kristus, ras Dibata bapanta, si ngkelengi kita arah lias ateNa enggo mereken pengapul si tetap ras pengarapen si paguh man banta, ipetetapNa min ukurndu janah ipegegehiNa kam”. (2 Tesalonika 2:16, 17) Erkiteken sieteh Jahwe ngkelengi janah mperdiateken kita, terapul kal kita!

15. Erkiteken lias ate Dibata, kai arapenta?

¹⁵ Lit arapenta nggeluh si rasa lalap. Erkiteken erdosa, la lit arapenta. (Oge Masmur 49:8, 9.) Tapi, ipebetehken Jahwe man banta wari si pepagi si luar biasa. Kai e? Ikataken Jesus, ”Sura-sura BapangKu, e me kap: gelah kerina si ngidah Anak e dingen si tek man bana ngaloken kegeluhen si tuhu-tuhu si la erkeri-kerin.” (Johanes 6:40) Emaka, lit arapenta nggeluh si rasa lalap erkiteken lias ate Jahwe. Nina Paulus, ”Sabap enggo ipetangkas Dibata lias ateNa guna keselamaten kerina manusia.”​—Titus 2:11.

16. Uga piga-piga kalak Kristen i bas abad si pemena nalahgunaken lias ate Dibata?

¹⁶ Melala pasu-pasu sialoken erkiteken lias ate Jahwe. Tapi, ula sempat sisalahgunaken guna ngelakoken dosa. Lit piga-piga kalak Kristen i bas abad si pemena  ncubaken ”mutarbalikken berita kerna lias ate Dibata . . . guna mbenarken perbahanen-perbahanenna si nggesuh”. (Judas 4) Mungkin iakap kalak e banci ilakokenna dosa erkiteken Jahwe lalap ngalemi. Iupayakenna ka ngiahken turang seninana ngelakoken perbahanen si seri. Ngasa gundari ise pe si ngelakoken perbahanen si bage ”megombang nandangi kesah Dibata si melias man ia”.​—Heber 10:29.

17. Nasehat si tegas kai si ibereken Petrus?

¹⁷ Gundari, Setan nggo berhasil nipu piga-piga kalak Kristen alu erbahan kalak e erpengakap maka banci ia ngelakoken dosa erkiteken Jahwe pasti ngalemi. Memang, Jahwe banci ngalemi kalak si erdosa si ertobat. Tapi, ateNa gelah silawan sura-sura si salah. Jahwe nuruh Petrus guna nuratken, ”Tapi kam o teman-temanku, enggo kap leben iangkandu si enda. Emaka metengetlah gelah ula kam papak ibahan kesalahen-kesalahen kalak si la meteh aturen e, jenari ndabuh kam i bas inganndu si nteguh nari. Tapi tetaplah kam ertambah-tambah i bas lias ate Dibata bage pe ertambahna pemetehndu kerna Tuhan ras Singkelini kita, Jesus Kristus.”​—2 Petrus 3:17, 18.

18. Erkiteken lias ate Jahwe, kai tanggung jabapta?

¹⁸ Ngata bujur kal kita nandangi lias ate Jahwe. Emaka, wajip sigunaken kerina pasu-pasu e lako mpebadiaken Jahwe ras nampati kalak si deban. Uga carana? Nina Paulus, ”E maka sipergunakenlah kengasupenta si pelain-lain e si enggo ibereken Dibata man banta rikutken lias ateNa . . . Adi man banta ibereken Dibata kengasupen guna nampati kalak, sisampatilah ia. Adi man banta ibereken Dibata kengasupen ngajar, ngajarlah kita. Adi man banta ibereken Dibata kengasupen petetap ukur kalak silakokenlah e . . . kalak si ngasup ncidahken perkuah ate man kalak si deban, arus ibahanna e alu ukur meriah.” (Roma 12:6-8) Emaka, erkiteken nggo icidahken Jahwe lias ateNa, lit tanggung jabapta guna ergiah-giah i bas pelayanen, ngajarken Pustaka si Badia, mpegegehi turang seninanta, janah ngalemi kalak si deban.

19. Tanggung jabap kai sibahas i bas artikel seterusna?

¹⁹ Enggo sialoken melala pasu-pasu erkiteken lias ate Jahwe. Mari kita ergiah-giah ”mberitaken berita si meriah kerna lias ate Dibata”. (Perbahanen 20:24) I bas artikel seterusna banci sibahas terbuen kerna tanggung jabapta.