ANCAMEN: Aminna gia Pustaka si Badia banci ceda ras ndatken melala tentangen, Pustaka tetap lit. Tapi, lit si nulis ras si nerjemahken Pustaka erusaha ngubah isina. Maun-maun, iusahakenna gelah Pustaka ndukung ajarenna labo isesuaikenna ajarenna e ras Pustaka. Perdiateken contoh enda:

• Ingan eribadat: Kelang-kelang abad peempatken ras peduaken SM, si nulis Pentateukh Samaria nambahken kata-kata i Keluaren 20:17 eme ”i Deleng Gerisim. Ije kam arus mbangun batar-batar persembahen.” Kalak Samaria ersura-sura gelah ayat e banci ndukung pembangunen rumah pertoton i Deleng Gerisim.

• Ajaren Si Telu Sada: La seh 300 tahun kenca Pustaka dung itulis, sekalak si tek man ajaren Si Telu Sada, nambahken kata-kata i bas 1 Johanes 5:7 eme ”i bas surga, Bapa, Kata Dibata, ras Kesah si Badia: janah teluna sada.” Kata-kata enda la lit i bas naskah si asli. Bruce Metzger, sekalak si ahli i bas Pustaka si Badia ngatakenca, ”Mulai abad peenemken ras seterusna, kata-kata enda reh usurna idat i bas naskah Latin Kuno ras [Latin] Vulgata.”

• Gelar Dibata: Enterem penerjemah Pustaka ibanna takhyul kalak Jahudi jadi palas guna meneken gelar Dibata i bas Pustaka nari. Igantina gelar Dibata jadi penggelaren bagi ”Dibata” ntah pe ”Tuhan”. Penggelaren e igunaken labo ngenca man si Nepa tapi man manusia pe, patung gana-gana, janah man Iblis.​—Johanes 10:34, 35; 1 Korinti 8:5, 6; 2 Korinti 4:4. *

UGA MAKA PUSTAKA SI BADIA BANCI TETAP LIT: Si pemena, aminna pe lit penulis Pustaka si melantar janah la jujur, enterem ka si beluh  janah megermet. Kalak Masoret erban salinen Kitab-Kitab Heber kelang-kelang abad peenemken ras pesepuluhken Masehi si igelari teks Masoret. Menurut keterangen, ikira kalak e jumlah kata ras huruf guna mastiken gelah la lit kesalahen i bas penulisen. Igunakenna ka cataten pinggir guna ncatat keterangen si nuduhken perubahen kai pe si banci saja iban i bas naskah. Kalak Masoret la nggit ngubah naskah Pustaka. Profesor Goshen-Gottstein ngatakenca, ”Menurut kalak Masoret, ngubah isi alu sengaja eme sada perbahanen si seh kal jahatna.”

Peduaken, buena jumlah naskah si lit gundari situhuna banci nampati ahli-ahli Pustaka i bas ndatken kesalahen. Contohna, ratusen tahun dekahna, iakap pemimpin agama maka Pustaka terjemahen cakap Latin si lit i bas ia sentudu ras naskah aslina. Tapi, i bas 1 Johanes 5:7, itama kalak e kata-kata si salah bagi si enggo ituriken i bas pemena artikel. Kesalahen e mpengaruhi King James Version cakap Inggris! Tapi sanga idat naskah si deban, kai si tereteh? Itulisken Bruce Metzger, ”Bagin [i bas 1 Johanes 5:7] la lit i bas kerina naskah kuno (Siria, Koptik, Armenia, Etiopia, Arab, Slavia) selain cakap Latin.” Erkiteken si e, edisi King James Version ras Pustaka si debanna lanai ipakena kata-kata si salah e.

Payo nge e naskah si tertuan mbuktiken maka isi Pustaka asli denga? Sanga idat Gulungen Laut Mati i bas 1947, dungna ahli-ahli banci mbandingken teks Masoret Heber ras gulungen Pustaka si itulis lebih seribu tahun sope si e. Sekalak anggota tim i bas Gulungen Laut Mati nari ngatakenca maka sada gulungen saja enggo ”mbuktiken adi penulisen naskah Pustaka si dekahna lebih seribu tahun si itulis kalak Jahudi tuhu-tuhu benar dingen tepat”.

Menam kerina papirus Kitab-Kitab Junani Kristen banci inen i bas Perpustakaan Chester Beatty i Dublin, Irlandia. Enda termasuk naskah i bas abad peduaken Masehi nari si iban kira-kira 100 tahun kenca Pustaka dung itulis. Nina The Anchor Bible Dictionary, ”selain mereken melala keterangen si mbaru kerna penjelasen naskah, papirus enda pe ncidahken maka proses penulisen naskah Pustaka tuhu-tuhu tepat dingen benar.”

ASILNA: Naskah si metua janah melala jumlahna e labo ngubah isi Pustaka, tapi mbuktiken maka isina tuhu-tuhu benar. Nina Sir Frederic Kenyon, ”Tangtangna nari enggo melala kal bukti si ndukung naskah Pustaka, la lit buku si deban si bali ras si e. Janah ahli-ahli si jujur la mersoken maka naskah e enggo melala kal i bas kita gundari.” Bage pe kerna Kitab-Kitab Heber, sekalak ahli si gelarna William Henry Green ngatakenca, ”Pustaka si Badia saja ngenca buku si isina la pernah berubah nai nai nari.”