ANCAMEN: Melala peminpin politik bage pe agama la sentudu perbahanenna ras Pustaka. Rusur kal igunakenna kekuasanna i bas ngambati kalak ndatken, erban, ntah pe nerjemahken Pustaka. Contohna:

• Kira-kira tahun 167 SM: Raja Antiokhus Epifanes i bas dinasti Seleukus nari, si maksa kalak Jahudi ndalanken agama Junani, merentahken gelah Kitap-Kitap Heber ikernepken. Itulis sejarawan Heinrich Graetz maka pejabat-pejabat Anthiokus ”ncigatken ras nutung kerina gulungen Undang-Undang si idatna ras munuh ise pe si tereteh ndarami pengapul ras gegeh i bas Pustaka nari”.

• Abad Pertengahen: Piga-piga peminpin agama Katolik merawa erkiteken jelma si enterem mpebetehken kai nina Pustaka labo ajaren Katolik. Sesat iakapna kalak si lit buku-buku Pustakana, selain buku Masmur i bas cakap latin. Salah sada dewan gereja merentahken suruhenna ”si banci terteki gelah tutus atena ndarami kalak si sesat . . . mereksa kerina rumah ras ruangan teruh taneh si icurigaina . . . adi idat, rumah e pasti i sontarken”.

Adi berhasil musuh ngkernepken Pustaka, isina pasti bene.

UGA MAKA PUSTAKA SI BADIA BANCI TETAP LIT: Aminna pe Raja Antiokhus terus ndalanken rencanana i Israel, enggo lit terpuk kalak Jahudi i negeri si deban. Janah menurut kalak si ahli, i bas abad pemena Masehi, lit lebih 60 persen kalak Jahudi la tading i Israel. Kalak Jahudi nimpan salinen Pustaka i rumah pertoton. Salinen e igunaken kalak Kristen ka i bas pudi wari.​—Perbahanen 15:21.

I bas Abad Pertengahen, kalak si ngkelengi Pustaka la mbiar ngadapi peniksan, janah terus nerjemahken ras erban salinen Pustaka. Banci saja nggo lit bagin-bagin Pustaka i bas 33 cakap paksa pertengahen abad 15 ope denga lit mesin cetak si hurupna banci iganti-ganti. Kenca si e, reh meterna Pustaka si Badia iterjemahken ras iban.

ASILNA: Aminna lit ancaman arah raja si erkuasa ras peminpin agama si erban sesat, Pustaka eme buku si mbuena iterjemahken ras icetak i bas sejarah. Pustaka nggo mpengaruhi Undang-Undang i bas piga-piga negeri, cakap, ras kegeluhen jutan kalak.