Kitik-kitikku nari aku pencinta alam. Keluarga kami rusur gawah-gawah ku hutan ras danau si mejile si lit i deher kota kami i Jyväskylä, Finlandia Tengah. Keleng ka ateku binatang-binatang. Sanga kitik denga aku, kudakep ateku kerina kucing ras biang si kuidah. Kenca reh galangna aku, segat ateku ngidah isiksa kalak binatang-binatang. Dungna, gabung aku ras sada organisasi si mbela hak binatang. I je jumpa aku ras kalak si keleng atena binatang-binatang.

Aktif kel kami ndukung hak binatang-binatang. Segat ate kami adi uis arah bulu binatang idayaken, ntah pe adi binatang igunaken jadi percoban. Emaka bagiken kami informasi kerna si e janah demo ka kami guna nentangsa. Bentuk kami ka sada organisasi perlindungen binatang-binatang. Perban kami rusur nuntut perubahen, emaka rusur ka ermasalah kami ras pemerentah. Lit piga-piga kali aku itangkap ras ibaba ku pengadilen.

Selain masalah binatang-binatang, terganggu ka aku ngidah masalah si deban si lit bas doni enda. Gabung ka aku ras piga-piga organisasi termasuk Amnesty International ras Greenpeace. Semangat kel aku ndukung kegiaten kalak e. Erjuang aku mbela hak kalak mesera, kalak si kelihen, ras si debanna.

Tapi, reh dekahna reh jelasna kuidah maka labo banci kuubah doni enda. Amin pe lit masalah-masalah si kitik si banci idungi organisasi e, tapi masalah-masalah si mbelin malah reh parahna. Tempa-tempa lit kuasa jahat si engkuasai doni enda, janah la lit kalak si peduli. Lanai kuakap lit si banci kulakoken.

Sedih kel aku perban la lit si banci kulakoken. Dungna, mulai kuukuri kerna Dibata ras Pustaka. Mbarenda pernah aku erlajar Pustaka ras Saksi-Saksi Jahwe. Amin gia kuergai kel perban Saksi Jahwe mehuli janah ermediate man bangku, tapi paksa si e lenga aku siap ngubah kebiasanku. Tapi gundari lanai bage.

Kubuat me Pustaka janah mulai kubaca. Emaka malem kel dungna pusuhku. Melala kudat ayat-ayat bas Pustaka si ngajarken gelah sikap siban binatang-binatang. Contohna, bas Kuan-kuanen 12:10, nina, “Kalak bujur, ikelengina kap biri-birina.” Kupelajari ka maka situhuna labo Dibata si erban masalah-masalah terjadi bas doni enda. Justru reh parahna masalahta, perban teremen kalak si la nggit patuh man perentah Dibata. Kena kel ku pusuhku sanga kupelajari kerna kekelengen ras kesabaren Jahwe.​—Masmur 103:8-14.

Dungna, kudat formulir guna mindo buku Kai Nina Pustaka si Badia? kenca si e kukirimken formulir e. La ndekah kenca si e, reh sepasang Saksi ku rumahku janah ajakna aku erlajar Pustaka, nggit aku erlajar. Reh ka aku ku perpulungen bas Bale Kerajan. Mulai me keleng ateku si kupelajari arah Pustaka.

Kuasa arah Pustaka, erban aku ngasup erban perubahen. Ngadi aku ngisap ras minem-minem. Kupekena penampilenku ras caraku ngerana. Janah kusesuaiken ka perbahanenku man pemerentah. (Roma 13:1) Gundari, enggo kutadingken kerina perbahanen si la mehuli si pernah kulakoken.

Si meserana kuakap eme ngubah cara rukurku kerna organisasi kemanusian ras lingkungen. Perubahen e labo terjadi bas sada berngi. Tangtangna, kuakap adi ndarat aku arah organisasi e, tempa erhianat aku man kalak e. Tapi dungna tek kel aku maka Kerajan Dibata ngenca si banci mereken arapen si pasti man doni enda. Ertekad aku guna ndukung Kerajan e alu semangat janah nampati kalak si deban erlajar kerna si e.​—Matius 6:​33.

Mbarenda, sanga aktif denga aku ndukung organisasi kemanusian e, kuanggap kerina kalak lit bas dua kelompok​—si mehuli ntah jahat​—janah mis kulawan adi kuanggap kalak e jahat. Tapi kenca erlajar Pustaka, lanai segat ateku ngidah kalak si deban. Malahen kucidahken ateku kekelengen Kristen man kerina kalak. (Matius 5:​44) Salah sada carana ncidahken kekelengen eme alu mberitaken berita si meriah kerna Kerajan Dibata. Meriah kel ukurku perban pendahin e banci erban kalak erdame, ermeriah ukur, ras erpengarapen.

Perban tek kel aku man Jahwe, perukurenku jadi tenang. Tek kel aku, perban Ia Pencipta, pasti la ipediatNa manusia ras binatang itindas rasa lalap. Janah labo ka ipediatNa doni enda ihancurken. Tapi arah KerajanNa, lanai ndekah ipesikapNa kerina si enggo ceda. (Jesaya 11:​1-9) Meriah kel ukurku perban banci kuteh kebenaren janah banci ka kusampati kalak si deban tek man kebenaren e. Lanai kuakap arus kuubah doni enda.