Cuba bayangken lit sekalak bapak si sangana ngerana man anakna si umurna pitu tahun. Nina, “Mbarenda, mbarenda kel, ciptaken Dibata doni enda ras kerina isina. CiptakenNa ka matawari, bulan, ras bintang-bintang.” Rukur anak e kentisik, kenca si e nina, “Jadi Pak, ise si nciptaken Dibata?”

Nina bapakna, “La lit si nciptaken Dibata. Mbarenda nari Ia enggo lit janah lalap lit.” Paksa si e, enggo puas anak e nandangi jawapen bapakna e. Tapi kenca reh belinna ia, lalap denga ia tersungkun-sungkun. La kapna mungkin la lit si nciptaken Dibata. Perban alam semesta saja pe lit si nciptakenca. Emaka tersungkun-sungkun denga ia, ‘Uga nge tangtangna maka lit Dibata?’

Kai nina Pustaka si Badia? Situhuna seri ka nge bagi si kataken perbapan ndai. Itulis Musa, “O [Jahwe], . . . ope denga ijadikenNdu deleng-deleng, ope denga ijadikenNdu doni enda Kam kap Dibata si rasa lalap.” (Masmur 90:1, 2) Nabi Jesaya pe ngataken, “La kin ietehndu? La kin pernah ibegindu, maka [Jahwe] e, Ia me kap Dibata si rasa lalap?” (Jesaya 40:28) Selain si e, surat si itulis Judas pe ngataken maka Dibata enggo lit “nai-nai nari.”​—Judas 25.

Arah ayat-ayat ndai, siteh maka Dibata eme “Raja si rasa lalap,” bali bagi si ikataken Rasul Paulus bas 1 Timotius 1:17. Enda maksudna, la soal piga tahun ku pudi pe kita mundur, Dibata enggo lit. Janah ku lebena pe, Ia pasti lalap lit. (Ketangkasen 1:8) Emaka, salah sada sipat dasar Dibata Si Madakuasa eme lit Ia rasa lalap.

Engkai maka mesera siakap ngangkai kerna si e? Masa geluhta terbatas. Emaka, kai si banci sibayangken kerna waktu beda kel ras Jahwe. Dibata lit rasa lalap, emaka seribu tahun e bali akapNa bagi sada wari. (2 Petrus 3:8) Cuba ukuri contoh enda. Labang, umurna 50 wari ngenca. Pasti la mungkin angkaina geluhta si dekahna 70 seh ku 80 tahun. Bas Pustaka si Badia ijelasken maka kita bali bagi labang adi ibandingken ras Penciptata si Mulia. Selain si e, cara rukurta pe terbatas adi ibandingken ras Dibata. (Jesaya 40:22; 55:8, 9) Emaka la ateta mamang adi lit si la banci siangkai kerna Jahwe.

Aminna pe mesera siakap ngangkai maka Dibata e lit seh rasa lalap, tapi situhuna e masuk akal. Adi lit si nciptaken Dibata berarti ia me Pencipta. Tapi ijelasken Pustaka si Badia, Jahwe me si “njadikenca kerina si nasa lit.” (Ketangkasen 4:11) Selain si e, siteh maka alam semesta enda tangtangna labo lit. (Kejadin 1:1, 2) Jadi ja nari rehna? Arus lit lebe Penciptana. Pencipta e pe leben lit sope lit mahluk-mahluk si pentar, bagi AnakNa si tonggal ras malekat-malekat. (Jop 38:4, 7; Kolose 1:15) Emaka, Ia me sisada si tangtangna lit. La mungkin Ia iciptaken. Labo lit ise pe sope Ia. Jadi labo lit si nciptaken Ia.

Kerina si lit bas alam semesta enda termasuk kita, mbuktiken maka lit nge Dibata si rasa lalap e. Mbarenda nari pasti Ia enggo lit sebap alam semesta enda teratur janah banNa hukum-hukum alam si ngendaliken kerinana. Ia ngenca si banci erban kerinana nggeluh.​—Jop 33:4.