1 Johanes 1:1-10
1 Itulis kami man kena kerna kata si mereken kegeluhen. Enggo lit ia nai nari, nggo idah kami alu mata kami, nggo iperdiateken kami, janah nggo idadap kami alu tan kami.
2 (Kegeluhen si rasa lalap e nggo jelas man kami. Enggo idah kami, janah gundari ibere kami kesaksin ras iceritaken kami kerna si e man kena. Kegeluhen si rasa lalap e rehna i bas Bapak nari, janah si e nggo jadi jelas man kami.)
3 Ikataken kami man kena kai si nggo idah kami ras si ibegi kami, gelah kena pe banci ersada ras kami. Alu bage, kena ersada ras Bapakta bage pe ras AnakNa, Jesus Kristus.
4 Itulisken kami kerina enda gelah sempurna keriahen ukurta.
5 Enda me berita si ibegi kami arah ia, janah gundari ipebetehken kami man kena: Dibata e sumber terang kap, janah la lit sitik pe si gelap i bas Ia.*
6 Adi ninta, “Ersada kita ras Dibata,” tapi kita tetap erdalan i bas gelap, erbual kap kita e janah la silakoken kai si benar.
7 Tapi adi erdalan kita i bas terang, bali bagi Dibata si lit i bas terang, ersada kap kita kerina. Janah banci kita ibersihken i bas kerina dosa nari alu dareh AnakNa, Jesus.
8 Adi ninta, “La lit dosata,” sitipu kap dirita, janah la lit kebenaren i bas dirita.
9 Adi siakui dosata, iampuni Dibata me dosata janah ibersihkenNa arah kerina perbahanen si la benar, erkiteken Ia setia ras adil.
10 Adi ninta, “La kap pernah silakoken dosa,” siban kap Dibata e perbual janah kataNa la lit i bas dirita.
Cataten i teruh
^ Ntah “i bas persadan ras Ia.”
