1 Johanes 3:1-24
3 Nenlah uga kelengna ate Bapak man banta seh maka kita igelari anak-anak Dibata! Kita memang anak-anakNa, tapi la itandai doni enda kita perban doni enda la nandai Dibata.
2 O turang senina si kukelengi, gundari kita anak-anak Dibata kap. Tapi, lenga siteh uga kita pagi. Tapi siteh maka sanga icidahken Dibata pagi diriNa, bali me kita bagi Ia perban tuhu-tuhu siidah me Ia pagi.
3 Tiap kalak si bage pengarapenna man Ia,* arus ipebadiakenna dirina sebap Ia* badia kap.
4 Ise pe si terus erban dosa, ilanggarna kap undang-undang, sebap dosa eme ngelanggar undang-undang.
5 Iteh kena ka maka icidahkenna dirina guna masapken dosa-dosata, janah la lit dosa i bas dirina.
6 Tiap kalak si tetap ersada ras ia, lanai terus erban dosa. Kalak si terus erban dosa, la kap idahna ia ntah pe nandai ia.
7 Anak-anak si kukelengi, ula pediat ise pe erban kena papak. Kalak si terus ngelakoken kai si benar, ia kap kalak si benar, bali bagi Jesus pe benar.
8 Kalak si terus erban dosa, anak Iblis kap, perban mulai kin tangtangna nari nggo ilakoken Iblis dosa. Erkiteken si e me, icidahken Anak Dibata dirina guna ngkernepken pendahin Iblis.
9 Kerina anak Dibata lanai erban dosa, sebap kesah Dibata* lit i bas kalak e. Lanai banci iban kalak e dosa perban kalak e anak-anak Dibata.
10 Enda me bedana anak-anak Dibata ras anak-anak Iblis: Ise pe si la terus ngelakoken kai si benar, ia labo anak Dibata, bage ka pe si la ngkelengi turang seninana.
11 E me berita si nggo ibegi kena tangtangna nari: Kita arus sikeleng-kelengen.
12 Ula min kita bagi Kain. Ia anak si jahat* janah ibunuhna agina. Engkai maka ibunuhna agina? Perban perbahanenna sendiri nggo salah, tapi perbahanen agina benar.
13 O turang senina, ula kena sengget adi segat ate doni enda man kena.
14 Siteh mbarenda maka kita nggo mate, tapi gundari kita nggeluh sebap keleng ateta turang seninata. Kalak si la keleng atena turang seninana tetap ia i bas kematen.
15 Tiap kalak si segat atena turang senina, pemunuh kap. Iteh kena maka pemunuh la banci ndatken kegeluhen si rasa lalap.
16 Siteh kerna kekelengen erkiteken nggo ibereken Jesus Kristus geluhna man banta, janah kita pe arus nggit mereken geluhta man turang seninata.
17 Adi lit kalak si la kekurangen janah idahna turang seninana merluken penampat, tapi la atena mekuah, uga ia banci ngkelengi Dibata?
18 O anak-anakku, kekelengenta ula min terjeng biber saja ntah pe i bas cakap saja ngenca. Tapi arus teridah arah perbahanen si rehna i bas pusuh nari.
19 Alu bage, siteh maka asalta i bas kebenaren nari. Janah tek kita maka ikelengi Dibata kita,
20 aminna pe pusuhta nalahken kita i bas kai pe, perban belinen kap Dibata asangken pusuhta janah kai pe itehNa.
21 Turang senina si kukelengi, adi la isalahken pusuhta kita, banci kita bebas ngerana man Dibata.
22 Janah kai pe sipindo pasti iberekenNa, sebap sidalanken perentahNa janah silakoken kai si erban meriah ukurNa.
23 Si iperentahkenNa: Arus kita erkiniteken man gelar AnakNa eme Jesus Kristus, janah arus kita sikeleng-kelengen, bagi si nggo iperentahkenNa man banta.
24 Selain si e, kalak si ndalanken perentahNa tetap ersada ras Ia, janah Ia ersada ras kalak e. Janah erkelangken kesah si badia si iberekenNa man banta, siteh maka tetap Ia ersada ras kita.
Cataten i teruh
^ Enda banci saja maksudna man Jesus ntah pe man Dibata.
^ Enda banci saja maksudna man Jesus ntah pe man Dibata.
^ As. “benihNa.”
^ Maksudna, Iblis.
