1 Johanes 5:1-21
5 Ise pe si tek maka Jesus eme Kristus, ia kap anak Dibata. Janah ise pe si ngkelengi Bapak, ikelengina ka kap AnakNa e.
2 Bagenda me carana gelah siteh maka sikelengi anak-anak Dibata: Sikelengi Dibata ras sipatuhi perentahNa.
3 Engkelengi Dibata ertina patuh man perentah-perentahNa. Janah, perentahNa e labo mberat,
4 sebap kerina anak-anak Dibata nggo naluken doni enda. Sitaluken doni enda alu kinitekenta.
5 Ise kin si banci naluken doni enda? La kin kalak si erkiniteken maka Jesus e me Anak Dibata?
6 Jesus Kristus reh alu lau ras dareh, tapi labo ngenca alu lau saja, tapi alu lau ras dareh. Ibere kesah si badia kesaksin kerna si e, perban kesah si badia e kebenaren kap.
7 Lit telu saksi:
8 kesah, lau, ras dareh. Janah seri teluna kesaksinna.
9 Adi kesaksin manusia saja pe sialoken, apai ka kesaksin Dibata si ndauh gegehen. Sebap, Dibata nge si mereken kesaksin e, iberekenNa kesaksin kerna AnakNa.
10 Kalak si erkiniteken man Anak Dibata, nggo ialokenna kesaksin si ibereken Dibata e i bas pusuhna. Kalak si la erkiniteken man Dibata, ibanna Dibata e perbual, sebap la ia erkiniteken man kesaksin si ibereken Dibata kerna AnakNa.
11 Enda me kesaksin e: Ibere Dibata man banta kegeluhen si rasa lalap janah kegeluhen e sialoken erkelangken AnakNa.
12 Ise pe si ngaloken Anak e, ialokenna nge kegeluhen e. Tapi ise pe si la ngaloken Anak e, labo ialokenna kegeluhen e.
13 Kutulisken kerna si enda man kena si erkiniteken man gelar Anak Dibata, gelah iteh kena maka ialoken kena kap kegeluhen si rasa lalap.
14 Tek kita maka kai pe sipindo man baNa adi sue ras peratenNa, ibegikenNa kap kita.
15 Janah adi siteh maka ibegikenNa kai pe si nggo sipindo man baNa, tek kita maka sidatken nge kai pe si nggo sipindo e, sebap nggo sipindo i bas Ia nari.
16 Adi lit si ngidah turang seninana erban dosa, tapi labo dosa si erban ia patut mate, arus itotokenna turang seninana e, janah ibereken Dibata me man bana kegeluhen. Payo, man kalak si dosana la erban ia patut mate. Tapi lit dosa si erban kalak patut mate, janah la kupindo man ise pe guna notoken kalak si bage dosana.
17 Kerina perbahanen si salah dosa kap, tapi lit dosa si la erban kalak patut mate.
18 Siteh maka kerina kalak si jadi anak-anak Dibata, lanai ngelakoken dosa. Tapi, kalak e ijaga Anak Dibata* janah si jahat* lanai banci ngelakoken kai pe man kalak e.
19 Siteh maka asalta i bas Dibata nari, tapi kerina doni enda lit i bas kuasa si jahat.*
20 Aminna pe bage, siteh maka Anak Dibata nggo reh, janah nggo iberekenna kita kepentaren,* alu bage siteh kerna Dibata si benar. Kita pe ersada ras Dibata si benar erkelangken AnakNa, Jesus Kristus. Ia me Dibata si benar janah sumber kegeluhen si rasa lalap.
21 O anak-anak si kukelengi, pedauhlah dirindu i bas berhala nari.
Cataten i teruh
^ Maksudna, Jesus Kristus.
^ Maksudna, Setan.
^ Maksudna, Setan.
^ As. “kengasupen guna ngangkai.”
