1 Korinti 1:1-31
1 Surat enda i bas Paulus nari si jadi rasul Kristus Jesus sue ras peraten Dibata, bage pe arah turang seninata Sostenes.
2 Surat enda man runggun Dibata i Korinti si nggo ipebadiaken guna ersada ras Kristus Jesus, janah ilebuh jadi kalak si badia, bage pe man kerina kalak i japa pe si erlebuh man gelar Tuan Jesus Kristus, eme Tuan kalak e bage pe Tuanta.
3 Mbera ialoken kena lias ate si mbelin bage pe kedamen i bas Dibata nari eme Bapakta, janah i bas Tuan Jesus Kristus nari.
4 La erngadi-ngadi kukataken bujur man Dibata, erkiteken iberekenNa man kena lias ateNa si mbelin arah Kristus Jesus.
5 Erkiteken kena nggo ersada ras Kristus emaka ipebayak Dibata kena i bas kai pe, termasuk i bas kengasupen ngerana bage pe i bas pemeteh si lengkap,
6 perban kesaksin kerna Kristus nggo iban nteguh i tengah-tengah kena.
7 Alu bage, sanga itima-timai kena kel Tuanta Jesus Kristus ncidahken kuasana, la kena kurang kai pe.
8 Iban Dibata ka kena tetap paguh seh ku kedungenna, gelah i bas wari Tuanta Jesus Kristus la lit si banci nuduh kena.
9 Dibata setia kap, janah ilebuhNa kena gelah ersada ras AnakNa, Jesus Kristus Tuanta.
10 O turang senina, i bas gelar Tuanta Jesus Kristus, mindo aku gelah sada min kata kena kerina janah la lit perpecahen i tengah-tengah kena. Arus tuhu-tuhu seperukuren kena janah sada pendapat kena.
11 O turang senina, lit piga-piga i bas keluarga Klue ngataken man bangku maka lit perjengilen i tengah-tengah kena.
12 Maksudku bagenda, lit si ngataken, “Aku pengikut Paulus.” Sada nari ngataken, “Adi aku pengikut Apolos.” Lit ka si ngataken, ”Aku pengikut Kepas.”* Si debanna ka ngataken, “Aku pengikut Kristus.”
13 Terbagi-bagi kin runggun Kristus e? Paulus kin si ibunuh i tiang?* Ntah, i bas gelar Paulus kin kena iperidiken?
14 Bujur kukataken man Dibata perban labo sekalak pe kena kuperidiken selain Krispus ras Gayus.
15 Alu bage ise pe la banci ngataken maka kena iperidiken i bas gelarku.
16 Selain si e, kuperidiken ka kalak si lit i bas rumah tangga Stepanas. Si kuinget, kalak e ngenca si kuperidiken.
17 Aku isuruh Kristus guna mberitaken berita si meriah, labo guna mperidiken kalak, labo ka guna make kata-kata kalak si lit sekolahna,* gelah kematen Kristus i bas tiang siksan* la sia-sia.
18 Man kalak si nandangi ikernepken, berita kerna tiang siksan* Kristus e kebodohen kap, tapi man banta si iselamatken, e bukti kuasa Dibata.
19 Sebap lit tertulis, “Kepentaren kalak si pentar Kumasapken me, janah pemeteh kalak si beluh Kutulak me.”
20 I ja kin kalak si pentar? I ja kin ahli Undang-Undang Musa? I ja kin kalak si beluh njawapi i bas doni* enda? La kin nggo iban Dibata kepentaren doni enda jadi kebodohen?
21 Kepentaren doni enda la banci erban kalak nandai Dibata, tapi igunaken Dibata berita si iakap kalak kebodohen guna nelamatken kalak si tek man berita e. I je nari teridah me alu jelas kepentaren Dibata.
22 Kalak Jahudi ndarami mukjizat janah kalak Junani ndarami kepentaren,
23 tapi kita mberitaken kerna Kristus si ibunuh i tiang.* Berita e bali bagi batu si erban kalak Jahudi tertuktuk, janah berita e iakap bangsa-bangsa sada kebodohen.
24 Aminna pe bage, man kalak si ilebuh, eme kalak Jahudi bage pe kalak Junani, Kristus kap bukti kuasa ras kepentaren Dibata.
25 Sebap kai si ianggap manusia si jadi kebodohen Dibata, situhuna e pentaren asangken kepentaren manusia, janah kai si ianggap manusia si jadi kelemahen Dibata, situhuna e gegehen asangken gegeh manusia.
26 O turang senina, sanga kena ilebuh Dibata labo piga i bas kena nari si menurut manusia kalak si pentar, kalak si erkuasa, bage pe kalak si rehna i bas keluarga terpandang nari.
27 Tapi ipilih Dibata kai si ianggap doni enda kebodohen guna mpemelaken kepentaren doni enda. Ipilih Dibata kai si lemah i doni enda guna mpemelaken kai si megegeh.
28 Ipilih Dibata kai si la penting, si la erguna, janah si isepeleken, guna ngkernepken kai si erguna.
29 Alu bage, ise pe la banci ermegah i lebe-lebe Dibata.
30 Erkiteken Dibata me maka kena gundari ersada ras Kristus Jesus. Kristus jadi bukti kepentaren Dibata man banta, erban kita ianggap benar ras badia, janah ibebasken kita alu tebusen.
31 Emaka, enda sue ras ayat si ngataken, “Adi kalak ermegah, ermegahlah ia erkiteken Jahwe.”
Cataten i teruh
^ Igelari ka Petrus.
^ Ntah “kayu.”
^ Ntah “kalak si pentar.”
^ Nen Kamus.
^ Nen Kamus.
^ Nen Kamus.
^ Ntah “kayu.”
