1 Korinti 10:1-33
10 O turang senina, ateku teh kena min maka kerina nini bulangta erdalan i teruh embun janah isebrangi kalak e lawit.
2 Kerina kalak e jadi pengikut Musa sanga kalak e erdalan i teruh embun janah sanga isebrangi kalak e lawit.
3 Kerina kalak e man pangan rohani si seri,
4 janah kerina minem arah inemen rohani si seri. Biasana kalak e minem arah batu rohani si nemani kalak e, eme Kristus.
5 Aminna pe bage, teremen i bas kalak e nari la ngena ate Dibata. Buktina, kalak e ibunuh i taneh mesawang.*
6 Kerina e jadi pelajaren man banta, gelah la kita bagi kalak e si ngarapken kai si la mehuli.
7 Ula nembah berhala, bagi si ilakoken piga-piga i bas kalak e nari. Lit tertulis, “Man ras minem kalak e, jenari ersenang-senang.”
8 Ula silakoken perbahanen seks si salah* bagi si ilakoken piga-piga arah kalak e nari, si erban 23.000 arah kalak e nari mate i bas sada wari.
9 Ula sicubai Jahwe bagi si mbarenda ilakoken piga-piga i bas kalak e nari si erbanca kalak e itagut nipe.
10 Ula jungut-jungut bagi piga-piga i bas kalak e nari, si dungna ibunuh malekat.
11 Kerina si terjadi man kalak e jadi pelajaren janah itulis guna jadi persinget man banta si nggeluh i bas wari-wari pendungi doni enda.
12 Kalak si erpengakap maka ia paguh pertedisna, hati-hatilah maka ula ia ndabuh.
13 Kerina percuban si iadapi kena situhuna percuban si biasa nge iadapi kerina kalak. Tapi Dibata e setia kap, janah labo ipediatNa kena icubai lebih asa gegeh kena. Sanga lit percuban, ibereNa kena jalan keluar gelah banci kena megenggeng ngadapisa.
14 Emaka, turang senina si kukelengi, kiamlah arah penembahen berhala nari.
15 Ngerana aku man kena bagi ngerana man kalak pentar. Ukuri kenalah kai si kukataken e.
16 La kin calung* pengatan bujur si nggo sibagiken kenca ngata bujur man Dibata ngertiken dareh Kristus? La kin roti si nggo sicepik-cepikken janah nggo sibagiken ngertiken daging Kristus?
17 Roti e sada kap ngenca, janah kerina kita man roti e. Emaka aminna pe kita nterem, kita sada daging.
18 Ukurilah kerna kalak Israel*: La kin kalak si man korban si ipersembahken i batar-batar persembahen tempa-tempa man ras Dibata?
19 Adi bage, kai kin si kumaksud? Lit kin ertina persembahen man berhala e ntah lit kin ertina berhala e?
20 Tentu lang. Maksudku, kalak si nembah berhala mereken persembahen man malekat-malekat jahat labo man Dibata, janah la ateku kena man ras malekat-malekat jahat.
21 La kena banci minem i bas calung* Jahwe nari janah i bas calung* malekat-malekat jahat nari, ntah pe man i bas “meja Jahwe” nari janah man i bas meja malekat-malekat jahat nari.
22 Entah, ‘siban kin ateta Jahwe cemburu’? Me labo kita gegehen asangken Ia?
23 Kerina banci ilakoken tapi labo kerina erguna. Kerinana banci ilakoken, tapi labo kerinana mpegegehi kita.
24 Tiap kalak arus min ngukuri kepentingen kalak si deban, labo kepentingenna saja.
25 Panlah kai pe si idayaken i bas pajak daging, janah ula padah isungkuni kena erkiteken pusuh peraten kena,
26 erkiteken “Jahwe kap si mpuna doni ras kerina isina.”
27 Adi iundang kalak si la sada kiniteken kena janah idahi kena ate kena, panlah kai pe si isikapkenna i je. La perlu isungkun kena erkiteken pusuh peraten kena.
28 Tapi adi lit si ngataken, “Pangan enda nggo ipersembahken man berhala,” emaka ula panndu guna kalak si ngatakenca e janah guna pusuh peraten.
29 Maksudku labo pusuh peraten kena, tapi pusuh peraten kalak si ngatakenca e. Labo ateku kebebasenku e erban aku ihakimi pusuh peraten kalak si deban.
30 Aminna pe kupan janah kukataken bujur kerna pangan e, arus kin kupan pangan e adi si e erbanca aku ihina?
31 Emaka, la soal kena man ntah pe minem ntah ngelakoken kai pe, lakokenlah guna kemulian Dibata.
32 Ula sempat kena bali bagi batu si erban kalak Jahudi tertuktuk, kalak Junani, bage pe runggun Dibata.
33 Bali bagi aku, usahakenlah erban kerina kalak senang i bas kerina keadan, labo ngukuri kepentingenku saja, tapi ngukuri kepentingen nterem kalak gelah kalak e iselamatken.
Cataten i teruh
^ Taneh si mbelang si jarang iingani.
^ Bahasa Junani, porneia. Nen Kamus.
^ Ntah “cangkir.”
^ As. “kalak Israel secara manusia.”
^ Ntah “cangkir.”
^ Ntah “cangkir.”
