1 Korinti 11:1-34
11 Usihlah aku, bali bagi aku ngusih Kristus.
2 Kupujiken kena sebap rusur inget kena aku janah ikutken kena kerina si nggo kuajarken.
3 Tapi ateku min gelah iteh kena maka takal tiap dilaki eme Kristus, takal tiap diberu eme dilaki, janah takal Kristus eme Dibata.
4 Adi dilaki ertoto ntah ernubuat janah make tutup takal, ipemelakenna kap takalna.
5 Adi diberu ertoto ntah ernubuat tapi la ipakena tutup takalna, ipemelakenna kap takalna sebap seri saja ia ras diberu si bukna icukur.
6 Adi diberu la make tutup takal, ulin ipotongna bukna. Tapi adi mela ia bukna ipotong ntah icukur, arus ipakena tutup takal.
7 Sekalak dilaki la patut make tutup takal sebap iciptaken Dibata dilaki seri ras DiriNa janah iciptakenNa dilaki guna jadi kemulianNa, tapi diberu kap kemulian dilaki.
8 Sebap dilaki labo iciptaken i bas diberu nari, tapi diberu nge si iciptaken i bas dilaki nari.
9 Bage pe labo guna diberu maka dilaki iciptaken, tapi diberu iciptaken guna dilaki.
10 Erkiteken si e me janah erkiteken malekat-malekat, maka arus ipake diberu tutup takal si jadi tanda maka ia patuh man takalna.
11 Aminna pe bage, i bas runggun Tuan, dilaki perlu nge diberu, janah diberu perlu nge dilaki.
12 Sebap diberu iciptaken i bas dilaki nari, janah dilaki lahir i bas diberu nari, tapi kerinana Dibata si nciptakenca.
13 Tiap kalak arus iukurina: Cocok kin adi diberu ertoto man Dibata alu la make tutup takal?
14 La kin iteh kena maka tangtangna nari adi sekalak dilaki gedang bukna, si e jadi hal si hina man bana,
15 tapi adi diberu gedang bukna sada kemulian man bana? Bukna e ibereken man bana jadi tutup takalna.
16 Tapi adi lit si la setuju janah ikutkenna atena kebiasan si deban, siteh maka labo lit kebiasan si deban i bas kita bage pe i bas kerina runggun Dibata.
17 Sanga kubereken petunjuk-petunjuk enda, labo kupujiken kena, sebap adi kena pulung, lalan si la mehuli si ihasilken kena asangken si mehuli.
18 Tangtangna, kubegi maka sanga kena pulung i bas runggun, lit perpecahen i tengah-tengah kena. Tek aku maka lit perpayona kerna si e.
19 Pasti lit nge pagi sekte-sekte i tengah-tengah kena, alu bage teridah me alu jelas ise kalak i bas tengah-tengah kena nari si ialoken Dibata.
20 Sanga kena pulung i bas sada ingan, situhuna tujun kena labo man berngi guna mperingeti Tuan.
21 Sanga ipan kena, piga-piga i bas kena nari nggo leben man berngi, dungna lit piga-piga i bas kena nari si melihe janah lit ka si mabuk.
22 La kin lit rumah kena ingan kena man ras minem? Ihina kena kin ate kena runggun Dibata? Ipemelaken kena kin ate kena kalak si mesera? Uga dage ningku man kena? Arus kin kena kupujiken? I bas si e labo kupujiken kena.
23 Kuajarken man kena kai si nggo iajarken Tuanta man bangku, eme: I bas berngi sanga Tuan Jesus nandangi ihianati, ibuat Jesus roti,
24 ertoto ia ngata bujur, jenari icepik-cepikkenna janah nina, “Enda ngertiken dagingku, si ibereken guna kepentingen kena. Teruslah lakoken enda jadi peringet-ingeten man bangku.”
25 Bage ka me ilakokenna nandangi calung* e kenca kalak e man berngi, nina, “Calung* enda ngertiken perjanjin baru si isahken alu darehku. Teruslah lakoken enda, tiap inem kena e, si e jadi peringet-ingeten man bangku.”
26 Tiap ipan kena roti e janah minem kena alu calung* e, imomoken kena kap kematen Tuan seh asa ia reh.
27 Emaka ise pe si man roti e janah minem alu calung* Tuan padahal la ia cocok guna ngelakoken si e, ersalah me ia sebap la ihamatina daging ras dareh Tuan.
28 Emaka ope lenga roti e ipan janah minem alu calung* e, tiap kalak arus ipastikenna lebe dirina cocok ntah lang guna ngelakoken si e.
29 Sebap ise pe si man ras minem tapi la iangkaina erti daging e, ibanna kap dirina iukum.
30 Eme sebapna nterem i bas kena nari si lemah, sakit, janah medem i bas kematen.*
31 Tapi adi nggo sipastiken lebe dirita cocok, kita labo ihakimi.
32 Tapi adi kita ihakimi, kita idisiplin Jahwe gelah la iukum radu ras doni enda.
33 Emaka turang senina, adi kena pulung guna man, sitimanlah kena.
34 Janah adi lit si melihe, manlah ia lebe i rumah, gelah sanga kena pulung la iban kena diri kena iukum. Kerna persoalen-persoalen si deban, kudungi kari sanga aku nggo seh i jena.
Cataten i teruh
^ Ntah “cangkir.”
^ Ntah “Cangkir.”
^ Ntah “cangkir.”
^ Ntah “cangkir.”
^ Ntah “cangkir.”
^ Maksudna, mate secara rohani.
