1 Korinti 12:1-31
12 Gundari, o turang senina, ateku min gelah iteh kena kerna pemere-pemere i bas Dibata nari.
2 Iteh kena maka sanga kena nggeluh denga bali bagi bangsa-bangsa si deban,* kena ipengaruhi janah itipu guna nembah berhala si la banci ngerana, janah ikutken kena kalak e ku japa pe kena ibaba.
3 Gundari, ateku min gelah iteh kena maka kalak si ngerana alu penegu-negu kesah Dibata labo ngataken, “Isumpahi me Jesus!” janah kalak si itegu-tegu kesah si badia ngenca si banci ngataken, “Jesus kap Tuan!”
4 Lit erbage-bage pemere, tapi kerinana e ibereken arah kesah si badia si seri.
5 Lit erbage-bage pelayanen, tapi kerinana ilakoken guna sada Tuan.
6 Lit erbage-bage pendahin, tapi sada kap ngenca Dibata si erban kerina kalak ngelakoken erbage-bage pendahin e.
7 Tapi jelas kap teridah penampat arah kesah si badia i bas tiap kalak, janah si e ibereken Dibata gelah erguna man kerinana.
8 Lit si ndatken pemere guna ngerana alu kepentaren erkiteken kesah si badia e, lit si ndatken pemere guna ngerana alu pemeteh erkiteken kesah si badia si seri,
9 lit si erkiniteken perban kesah si badia si seri, lit si ndatken pemere guna mpepalem erkiteken kesah si badia si seri e ka,
10 lit si ngelakoken perbahanen si dem alu kuasa, lit si ernubuat, lit si mastiken kerna kata-kata si rehna i bas Dibata nari ntah lang, lit si banci ngerana i bas erbage-bage bahasa, janah lit si nerjemahken bahasa-bahasa.
11 Kerina pemere e ilakoken kesah si badia si seri janah ibagiken man tiap kalak sue ras peraten Dibata.
12 Bali bagi sada daging, lit melala anggotana, bage ka me Kristus e, amin gia melala anggotana, tapi sada daging kap.
13 Alu kesah si badia si seri, kerina kita iperidiken guna jadi sada daging, la soal kita kalak Jahudi ntah Junani, budak ntah kalak bebas, janah kerina kita nggo ngaloken kesah si badia si seri.
14 Sebap melala kap anggota daging, labo sada ngenca.
15 Adi nina nahe, “Erkiteken aku labo tan, aku labo anggota i bas daging nari,” si e labo erban nahe la jadi anggota i bas daging nari.
16 Bage ka pe adi nina cuping, “Erkiteken aku labo mata, aku labo anggota i bas daging nari,” si e labo erban cuping la jadi anggota i bas daging nari.
17 Adi kerina dagingta e mata, alu kai kita erpemegi? Adi kerina cuping, alu kai kita nganggeh?
18 Tapi nggo itama Dibata tiap anggota dagingta i bas inganna, bali bagi si ngena ateNa.
19 Adi kerina anggota daging e seri, uga jadina daging e?
20 Memang lit melala anggota, tapi daging sada kap ngenca.
21 Labo banci nina mata man tan, “Aku la perlu kam.” Bage ka pe takal labo banci nina man nahe, “Aku la perlu kam.”
22 Tapi anggota-anggota daging si tempa lemah pe iperluken nge,
23 janah anggota daging si kurang mehaga siakap, anggota e me si lebih sipehaga, alu bage anggota si kurang mejile jadi lebih meherga,
24 tapi anggota si nggo mejile lanai merluken kai pe. Enggo iban Dibata bage daging e gelah anggota si kurang meherga jadi meherga,
25 alu bage la lit perpecahen i bas daging e, janah tiap anggota daging mperdiateken anggota daging si deban.
26 Adi sada anggota suin, kerina anggota si deban pe ikut suin. Janah adi sada anggota ipujiken, kerina anggota si deban pe ikut senang.
27 Kerina kena anggota Kristus kap, janah tiap kalak i bas kena nari anggotana kap.
28 Enggo itetapken Dibata gelah lit i bas runggun: pertama rasul-rasul, peduaken nabi-nabi, peteluken guru-guru, kenca si e perbahanen si dem alu kuasa, jenari pemere guna mpepalem, pemere guna mereken penampat, kengasupen guna minpin, bage pe kengasupen ngerana i bas bahasa-bahasa si deban.
29 Me labo kerina kalak e rasul? Me labo kerina nabi-nabi? Me labo kerina guru? Me labo kerina ngelakoken perbahanen si dem kuasa?
30 Me labo kerina ngaloken pemere guna mpepalem? Me labo kerina banci ngerana i bas bahasa-bahasa si deban? Me labo kerina penerjemah?
31 Emaka teruslah usahaken alu tutus guna ngaloken pemere-pemere si terbelinen. Tapi gundari kucidahken ateku man kena dalan si ndauh ulin.
Cataten i teruh
^ Maksudna, sanga lenga tek.
