1 Korinti 15:1-58
15 O turang senina, kuingetken ateku kena kerna berita si meriah si kupeseh, si nggo ialoken kena janah si terus icikep kena alu nteguh.
2 Adi terus icikep kena alu nteguh berita si meriah si kupeseh, kena iselamatken. Adi lang, sia-sia saja kena jadi pengikut Jesus.
3 Kai si pentingna si nggo kualoken, nggo kupeseh man kena, eme: Kristus nggo mate guna dosa-dosata, bali bagi si itulisken i bas Kitap si Badia.
4 Ia nggo ikuburken, janah ipekeke i bas wari si peteluken, bali bagi si itulisken i bas Kitap si Badia.
5 Jenari icidahkenna dirina man Kepas,* kenca si e man 12 rasulna.
6 Kenca si e, icidahkenna dirina man lebih 500 kalak pengikutna* si sangana radu pulung i bas sada ingan. Teremen i bas kalak e nggeluh denga radu ras kita, tapi si debanna nggo medem i bas kematen.
7 Kenca si e, icidahkenna dirina man Jakup, jenari man kerina rasul-rasul.
8 Si terakhir, icidahkenna dirina man bangku, si tempa-tempa bagi anak si ilahirken ope lenga waktuna.
9 Aku si meterukna i bas rasul-rasul, janah la aku cocok igelari rasul perban nggo kusiksa mbarenda runggun Dibata.
10 Banci aku bagenda gundari erkiteken lias ate Dibata si mbelin. Lias ate si iberekenNa man bangku e labo sia-sia erkiteken aku lebih kerja keras i bas ngelayani asangken rasul si debanna. Aminna pe bage, kerina enda labo perban gegehku sendiri, tapi perban lias ate Dibata si mbelin.
11 Emaka, ise pe si mberitakenca, la soal aku ntah rasul si deban, seri nge berita si ipeseh kami janah e me si iteki kena.
12 Adi siberitaken maka Kristus nggo ipekeke i bas si mate nari, ngkai maka lit piga-piga i bas kena si ngataken la lit kekeken man kalak mate?
13 Bicara tuhu la lit kekeken man kalak si nggo mate, Kristus pe mbarenda labo ipekeke.
14 Adi Kristus la ipekeke, sia-sia me berita si nggo sipeseh janah kiniteken kena pe sia-sia.
15 Selain si e, adi tuhu kin kalak mate la ipekeke, Kristus pe labo ipekeke Dibata, janah e ertina sibereken kesaksin si palsu kerna Dibata, sebap nggo sikataken maka nggo ipekekeNa Kristus.
16 Adi tuhu kin kalak mate la ipekeke, Kristus pe labo ipekeke.
17 Janah adi Kristus la ipekeke, sia-sia nge kiniteken kena janah tetap denga kena i bas dosa.
18 Si enda pe ngertiken maka nggo masap kalak si nggo medem i bas kematen selaku kalak si ersada ras Kristus.
19 Adi pengarapenta man Kristus terjeng kegeluhen si gundari enda ngenca, kita me kalak si mekuahna kel ate i bas kerina jelma.
20 Tapi gundari, Kristus nggo ipekeke i bas si mate nari janah ia jadi si pertama ipekeke arah kalak si nggo medem i bas kematen.
21 Bali bagi kematen reh arah sekalak jelma, bage ka pe kekeken man kalak si mate reh arah sekalak jelma.
22 Kerina manusia mate erkiteken Adam, janah kerina manusia ipegeluh mulihi erkiteken Kristus.
23 Tiap kalak ipekeke menurut gilirenna:* Si pertama eme Kristus, kenca si e ipekeke me kalak si jadi jang Kristus i bas paksa kerehenna.
24 Kenca bage i bas kedungenna, ikernepkenna me kerina pemerentahen ras kerina si erkuasa, jenari iserahkenna me Kerajan e man Dibata, eme Bapakna.
25 Merentah me ia jadi raja seh asa itamaken Dibata kerina musuhna i teruh nahena.
26 Musuh terakhir si nandangi ikernepken eme kematen.
27 Dibata “erban kerinana jadi patuh i teruh nahe Kristus.” Aminna pe ikataken maka ‘kerina nggo iban patuh,’ enda labo ngertiken maka Dibata ikut patuh man Kristus sebap Dibata kap si erban kerinana patuh man Kristus.
28 Tapi, kenca kerina iban patuh man Kristus, Kristus selaku Anak pe patuh man Dibata si nggo erban kerinana patuh man bana, alu bage Dibata ngenca si jadi Penguasa kerinana.
29 Adi tuhu kin kalak mate labo ipekeke, uga kerna kalak si iperidiken, guna jadi kalak mate nge ia maka iperidiken? Man kai kalak e iperidiken alu tujun si bage?
30 Man kade kami ka nggeluh i bas bahaya tiap wari?
31 Tiap wari menam aku mate. Labo aku erbual kerna si e, bali bagi sanga kukataken man kena maka megah kuakap nandangi kena selaku pengikut Kristus Jesus Tuanta.
32 Kai gunana kulawan binatang-binatang si seh kel rawana i Epesus, bali bagi si ilakoken kalak si deban?* Adi tuhu kin kalak mate labo ipekeke, “man minem sajalah kita sebap pagi mate me kita”.
33 Ula kam nggit itipu. Pergaulen si la mehuli ncedai kebiasan si mehuli.
34 Sadarlah kena, lakokenlah kai si benar, janah ula nai ban dosa, sebap piga-piga i bas kena la lit pemetehna kerna Dibata. Kukataken bagenda gelah mela kap kena.
35 Aminna pe bage, lit si nungkun, “Uga kalak mate ipekeke? Uga bentuk kalak e pagi kenca ipekeke?”
36 Kena la masuk akal! Benih si isuan kena labo banci turah adi la kin mate lebe benih e.
37 Kai si isuan kena labo sinuan-sinuan si nggo turah, tapi sada benih saja nge ngenca, bali bagi benih gandum ntah benih si debanna.
38 Tapi, iban Dibata benih e turah bagi si sue ras peratenNa, janah labo seri tiap benih si turah.
39 Labo kerina daging seri. Lit daging manusia, daging asuh-asuhen, daging perik, bage pe ikan.
40 Si tading i surga la seri bentukna ras si tading i doni. Kemulian si tading i surga la seri ras kemulian si tading i doni.
41 Lain kemulian matawari, lain kemulian bulan, lain kemulian bintang-bintang. Janah tiap bintang lit kemulianna sendiri.
42 Bage ka pe kerna kalak mate si ipekeke. Ikuburken i bas keadan si banci masap, janah ipekeke i bas keadan si la banci masap.
43 Ikuburken i bas keadan si hina, ipekeke i bas keadan si mulia. Ikuburken i bas keadan si lemah, ipekeke i bas keadan si megegeh.
44 Sanga ikuburken eme bentuk daging, sanga ipekeke jadi bentuk roh. Lit bentuk daging, lit ka bentuk roh.
45 Bagi lit tertulis, “Manusia si pertama, eme Adam, ia jadi manusia si nggeluh.” Adam si terakhir jadi mahluk roh si mereken kegeluhen.
46 Tapi si pertama labo bentuk roh. Si pertama eme bentuk daging, janah kenca si e jadi bentuk roh.
47 Manusia si pertama rehna arah doni nari janah iban i bas abu nari, tapi manusia si peduaken rehna i bas surga nari.
48 Kerina si lit i bas doni enda seri ras ia si iban i bas abu nari, janah kerina si lit i bas surga seri ras ia si rehna arah surga nari.
49 Bali bagi kita si seri ras ia si iban i bas abu nari, pagi pe kita seri ras ia si rehna i bas surga nari.
50 O turang senina, kukataken man kena maka dareh ras daging la banci ngewarisi kerajan Dibata. Bage ka pe, kai si banci masap la banci ngewarisi kai si la banci masap.
51 Perdiateken rahasia si badia si kupeseh enda: Labo pagi kerina kita medem i bas kematen, tapi kerina pagi kita iubah
52 i bas waktu si seh kel kentisikna, eme i bas sengkemirep mata,* sedekah trompet si terakhir ersora. Sanga trompet e ersora, kerina kalak mate ipekeke i bas bentuk si la banci masap, janah kerina pagi kita iubah.
53 Si banci masap arus iubah jadi si la banci masap, janah si banci mate arus iubah jadi si la banci mate.
54 Sanga si banci masap iubah jadi si la banci masap, janah si banci mate iubah jadi si la banci mate, terjadi me ayat enda, “Kematen ibendut seh rasa lalap.”
55 “O kematen, i ja kemenangenndu? O kematen, i ja bisandu?”
56 Bisa si maba kematen eme dosa, janah dosa erkuasa erkiteken Undang-Undang Musa.
57 Tapi bujur ninta man Dibata si nggo mere kemenangen man banta arah Tuanta Jesus Kristus!
58 Emaka, o turang senina si kukelengi, kena arus paguh, ula monce-once, janah teruslah sibuk i bas ndahiken dahin Tuhan, sebap iteh kena maka kerja keras kena i bas ngelayani Tuhan labo sia-sia.
Cataten i teruh
^ Igelari ka Petrus.
^ As. “turang senina.”
^ As. “berurutan.”
^ Ntah banci saja “bagi menurut manusia.”
^ Ntah “sekejap mata.”
