1 Korinti 2:1-16
2 Emaka o turang senina, sanga aku reh ndahi kena guna mberitaken rahasia si badia Dibata, la kupake kata-kata ntah pe kepentaren arah kalak si beluh.
2 Sebap sanga aku ras kena, labo kucakapken kai pe selain kerna Kristus si ipakuken i bas tiang.*
3 Sanga reh aku ndahi kena, aku lemah, mbiar, janah nggirgir kel.
4 Sanga aku ngerana ntah pe ngajar, la kupake kata-kata kepentaren guna erban kalak tek, tapi alu kata-kata si mbuktiken gegeh kesah si badia,
5 gelah erkiniteken kena man kuasa Dibata labo man kepentaren manusia.
6 Gundari, i tengah-tengah kalak si paguh kinitekenna, ngerana kita kerna kepentaren, tapi labo kerna kepentaren doni* enda ntah pe kepentaren penguasa-penguasana si nandangi ikernepken.
7 Tapi sicakapken me kerna kepentaren Dibata, si terbuni i bas sada rahasia si badia. Enda nggo itetapken Dibata ope lenga iban manusia pengaturen kai pe gelah kita imuliaken.
8 Penguasa si apai pe i bas doni* enda la lit si meteh kepentaren enda, sebap adi itehna, la mungkin ibunuhna Tuanta si mulia.
9 Enda sue ras ayat si ngataken, “Kai si isikapken Dibata man kalak si ngkelengi Ia lenga pernah iidah mata, ibegi cuping, ntah pe ibayangken manusia.”
10 Man banta kap ipebetehken Dibata kerna si e arah kesah si badiaNa, erkiteken kuasa e nggo mpebetehken kerinana termasuk kepentaren Dibata si seh kel bagesna.
11 Lit kin si banci meteh perukuren manusia? La kin manusia e sendiri ngenca si metehsa? Bage ka pe, la lit si meteh perukuren Dibata adi la kin ipebetehken kesah si badia Dibata.
12 Labo sialoken cara rukur si lit bas doni enda, tapi sialoken kesah si badia i bas Dibata nari. Alu bage kerina si ibereken Dibata alu mehuli man banta banci siangkai.
13 Janah, sicakapken kerna si e, labo alu kata-kata si iajarken kepentaren manusia. Tapi alu kata-kata si iajarken kesah si badia, sijelasken hal-hal rohani alu kata-kata rohani.
14 Kalak si ngikutken sura-sura dagingna la ia nggit ngaloken kai si rehna i bas kesah si badia nari, erkiteken e kebodohen iakapna. La banci iangkaina erkiteken si e perlu iperiksa alu penampat kesah si badia.
15 Tapi kalak si itegu-tegu kesah si badia, iperiksana kerinana, janah la lit si banci nghakimi ia.
16 Bagi si ikataken Kitap si Badia, “Ise kin si meteh perukuren Jahwe maka banci iajarina Ia?” Tapi bas kita lit kap perukuren Kristus.
