1 Korinti 3:1-23
3 O turang senina, mbarenda ngerana aku man kena labo bagi ngerana man kalak si itegu-tegu kesah si badia, tapi bagi ngerana man kalak si ngikutken sura-sura dagingna, si bagi bayi denga i bas ngikutken Kristus.
2 Kubere kena susu, labo pangan si keras, perban kena lenga megegeh. Gundari pe kena lenga megegeh,
3 perban perukuren kena ngikutken sura-sura daging denga. Adi kena sician-cianen janah rubati, la kin e ertina ikutken kena denga sura-sura daging janah nggeluh bagi kalak si deban?
4 Adi sekalak ngataken, “Aku pengikut Paulus,” janah si deban ngataken, “Aku pengikut Apolos,” la kin e ertina perbahanen kena seri saja ras kalak si deban?
5 Situhuna ise kin Apolos e? Ise kin Paulus e? Kami pelayan kap ngenca si ngelakoken dahin i bas Tuhan nari janah nampati kena jadi pengikutna.
6 Aku si nuansa, Apolos si niramsa, tapi Dibata si erbanca turah.
7 Jadi, si nuansa ntah pe si niramsa labo penting, tapi si penting eme Dibata si erbanca turah.
8 Si nuan ras si niramsa sada kap tujunna, tapi ialoken kalak e pagi upah sue ras pendahinna sekalak-sekalak.
9 Kami kap teman erdahin Dibata, janah kena kap juma Dibata si sangana idahikenNa, janah kena kap bangunen Dibata.
10 Erkiteken kualoken lias ate Dibata si mbelin, kuban pondasi bali bagi tukang bangunen si beluh, tapi kalak si deban si mbangunca i datas pondasi e. Tiap kalak arus iperdiatekenna uga ia mbangun i datas pondasi e.
11 Sebap la lit si banci namaken pondasi si deban guna nggantiken pondasi si nggo iban, eme Jesus Kristus.
12 I datas pondasi e lit si mbangun alu emas, pirak, batu-batu si merga, kayu, dukut-dukut si kerah, ntah pe nggala,*
13 tapi pendahin kalak e teridah pagi i bas waktuna paksa iuji alu api, janah ibuktiken api uga kin situhuna pendahin kalak e sekalak-sekalak.
14 Adi pendahin si ibangun sekalak jelma e tetap lit, idatna me upah.
15 Adi meseng pendahinna e, rugi me ia. Aminna pe bage, ia sendiri selamat tapi bali bagi kalak si selamat i bas api nari.
16 La kin iteh kena maka kena kap rumah pertoton Dibata, janah kesah si badia Dibata tetap lit i bas diri kena?
17 Adi ikernepken sekalak jelma rumah pertoton Dibata, ikernepken Dibata me ia. Rumah pertoton Dibata e badia kap, janah kena me rumah pertoton e.
18 Ula ise pe nipu bana. Adi lit i tengah-tengah kena erpengakap maka ia pentar menurut doni* enda, padin ia jadi kalak bodoh gelah pentar i lebe-lebe Dibata.
19 Menurut Dibata, kepentaren doni enda kebodohen kap, sebap lit tertulis, “IjebakNa kalak si pentar alu kebeluhenna sendiri.”
20 Lit ka tertulis, “Iteh Jahwe kap maka perukuren kalak si pentar e sia-sia.”
21 Emaka ula ermegah kerna kai si ilakoken manusia, sebap kerina e jang kena.
22 Paulus, Apolos, Kepas,* kegeluhen, kematen, kai si lit gundari, ntah kai si nandangi reh, kerinana jang kena kap.
23 Kena jang Kristus kap janah Kristus jang Dibata.
