1 Korinti 4:1-21
4 Ate kami gelah kalak erpengakap maka kami pelayan Kristus ras pengurus rahasia si badia Dibata.
2 Sekalak pengurus iarapken setia i bas ndalanken dahinna.
3 La penting kuakap ihakimi kena aku ntah pe ibaba kena aku ku pengadilen manusia. Situhuna, aku pe la kuhakimi diriku sendiri.
4 La lit kuakap kai pe salahku, tapi enda labo ertina aku kalak si benar. Jahwe kap si nghakimi aku.
5 Emaka, ula ihakimi kena ise pe ope lenga seh waktuna, seh asa kerehen Tuan. Icidahkenna pagi kai si terbuni si lit bas gelap janah ipebetehkenna isi pusuh kalak, jenari tiap kalak ndatken pujin si patut i bas Dibata nari.
6 O turang senina, kukataken kerina enda guna kepentingen kena. Kuban diriku ras Apolos jadi usihen gelah erkelangken kami banci iangkai kena peraturen enda: “Ikutkenlah kai si tertulis,” gelah ula kena meganjang rukur janah gelah ula ulin iakap kena sekalak jelma asangken si deban.
7 Kai kin si erban kena beda ras kalak si deban? La kin si lit i bas kena e ibere Dibata nge? Adi memang kerina e ibere Dibata, ngkai maka kena sombong tempa-tempa si e asil usaha kena sendiri?
8 Enggo kin puas akap kena? Enggo kin kena bayak? Enggo kin kena merentah jadi raja adi la ras kami? Ngarap kel aku kena nggo jadi raja gelah kami pe banci merentah jadi raja radu ras kena.
9 Kuakap, kami selaku rasul-rasul iban Dibata jadi kalak si iukum mate i bas bagin pendungi, perban kami nggo jadi tontonen man doni enda, malekat-malekat, bage pe manusia.
10 Kami bodoh guna Kristus, tapi kena pentar erkiteken ngikutken Kristus. Kami lemah, tapi kena megegeh. Kena ihamati tapi kami la ihamati.
11 Seh asa gundari kami kelihen denga, muas denga, kurang paken,* ipekpeki, la lit rumah kami,
12 janah kami kerja keras alu tan kami. Paksa kami ihina kalak, ipasu-pasu kami kalak e. Sanga kami ianiaya, megenggeng kami alu sabar.
13 Sanga kami ipitnah, ijawap kami alu lembut. Seh asa gundari, kami iban bali bagi sampah doni si iambekken kalak.
14 Kutulis enda kerina labo gelah kena mela, tapi guna mere nasehat man kena selaku anak-anak si kukelengi.
15 Bicara lit kin pe 10.000 guru kena si ngajari kena cara ngikutken Kristus, bapak kena labo nterem. Tapi aku jadi bapak kena, erkiteken kubaba berita si meriah kerna Kristus Jesus man kena.
16 Emaka kupindoken man kena gelah usih kena aku.
17 Eme sebapna kusuruh Timotius ndahi kena, ia kap anak si kukelengi janah setia i bas ngelayani Tuan. Ingetkenna kari kena kerna cara-caraku i bas ngelayani Kristus, bali bagi si kuajarken i bas tiap runggun.
18 Piga-piga i bas kena nari jadi sombong sebap iakapna aku la reh ndahi kena.
19 Tapi mis nge kari aku reh, adi bage kin peraten Jahwe. Merhat aku meteh uga kin situhuna kalak si sombong e, labo guna meteh kai si ikatakenna, tapi guna meteh lit kin kuasa Dibata bas kalak e ntah lang.
20 Sebap Kerajan Dibata labo kerna ranan, tapi kerna kuasa Dibata.
21 Apai kin ipilih kena? Reh aku alu perpalu ntah alu lemah lembut ras alu kekelengen?
Cataten i teruh
^ As. “tilanjang.”
