1 Korinti 9:1-27
9 Me bebas nge aku? Me rasul nge aku? Me nggo pernah kuidah Jesus Tuanta? La kin kena asil arah dahinku i bas Tuan?
2 Aminna pe aku labo rasul guna kalak si deban, aku rasul guna kena! Kena kap buktina maka aku rasul si ngelayani Tuan.
3 Enda me pembelanku man kalak si nghakimi aku:
4 Me lit nge hak kami man ras minem?
5 Me lit nge hak kami itemani ndehara si sada kiniteken, bali bagi rasul-rasul si deban, agi-agi Tuan, ras Kepas?*
6 Aku ras Barnabas kin ngenca si la banci ngadi cari makan?
7 Prajurit si apai kin si ertugas alu biayana sendiri? Lit kin kalak si nuan anggur tapi la ipanna buahna? Ntah, lit kin permakan si la kenan susu asuhenna?
8 Perukuren manusia kin si kukataken e ndai kerina? La kin Undang-Undang Musa pe bage nge nina?
9 I bas Undang-Undang Musa lit tertulis, “Ula tutupi babah lembu si sangana ngerik gandum.” Lembu-lembu e kin si iperdiateken Dibata?
10 Ntah, guna kepentingenta kin si ikataken e? Situhuna, si e itulis guna kepentingenta, erkiteken kalak si mbajak ras si ngerik iarapkenna dat bagin.
11 Adi isuan kami i tengah-tengah kena kai si rehna i bas Dibata nari, salah kin adi ialoken kami i bas kena nari kai si jadi keperlun kami?
12 Adi kalak si deban pe lit hakna ndatkenca arah kena nari, la kin belinen nge hak kami? Aminna pe bage, la ipake kami hak kami e. Tapi kami si nanggungsa kerinana, gelah berita si meriah kerna Kristus la terhalang erkiteken kami.
13 La kin iteh kena maka kalak si ngelakoken dahin si badia i rumah pertoton ndatken pangan i bas rumah pertoton nari, janah kalak si erdahin i batar-batar persembahen ndatken bagin i bas batar-batar persembahen e nari?
14 Bage ka pe, isuruh Tuan maka kalak si mberitaken berita si meriah gelah nggeluh arah berita si meriah e nari.
15 Tapi sada pe labo kupake pengaturen e. Kutulis kerna si e labo gelah bage iban man bangku. Padin kuakap mate asangken bene kai si kumegahken e.
16 Aminna pe kuberitaken berita si meriah, enda labo alasen man bangku guna ermegah, erkiteken e nggo kewajipenku. Tapi cilaka me aku adi la kuberitaken berita si meriah.
17 Adi kulakoken e alu ermeriah ukur, kudat me upah. Tapi aminna pe kulakoken alu terpaksa, tetap nge tek Dibata mereken tugas e man bangku.
18 Adi bage kai upahku? Upahku eme banci kuberitaken berita si meriah alu la igalari, gelah la kusalahgunaken hakku i bas mberitaken berita si meriah.
19 Aminna pe aku labo budak ise pe, tapi kujadiken diriku budak kerina kalak, gelah banci reh teremna jelma kusampati.
20 Man kalak Jahudi, aku bagi kalak Jahudi gelah banci kusampati kalak e. Man kalak si patuh man undang-undang aku pe bagi kalak si patuh man undang-undang gelah banci kusampati kalak e, aminna pe aku labo i teruh undang-undang.
21 Man kalak si la i bas undang-undang, aku pe bagi kalak si la i bas undang-undang gelah banci kusampati kalak e, aminna pe aku i bas undang-undang Dibata ras undang-undang Kristus.
22 Man kalak lemah, aku jadi kalak lemah gelah banci kusampati kalak e. Kai pe kulakoken guna erbage-bage jelma, gelah alu cara kai pe banci kuselamatken kalak e.
23 Kai pe kulakoken guna berita si meriah gelah banci kuberitaken berita si meriah e man kalak si deban.
24 I bas lomba lari, la kin iteh kena maka kerina si ikut e kerinana kiam, tapi sekalak ngenca si ndatken hadiah? Emaka kiamlah kena asa ngasup kena gelah menang guna ndatken hadiah e.
25 Tiap kalak si ikut i bas lomba lari e ikuasaina dirina i bas kerinana. Si e ilakoken kalak e guna ndatken mahkota si banci masap, tapi kita, guna mahkota si la banci masap.
26 Emaka perkiamku labo la ertujun, janah bali bagi kalak si ertinju, la aku nggit ninju angin.
27 Kupekpeki dagingku janah kujadiken bagi budak, gelah ula sempat aku sendiri si nggo ngajari kalak si deban dungna itulak Dibata.
Cataten i teruh
^ Igelari ka Petrus.
