1 Petrus 3:1-22
3 Bage pe kena o ndehara, patuhlah man perbulangen kena, gelah adi lit perbulangen si la patuh man kata Dibata, banci ia patuh erkiteken perbahanen kena aminna gia la kena ngerana sengkebabah pe,
2 sebap idahna maka mehuli* janah mehamat perbahanen kena.
3 Ula ban penampilen kena si teridah arah darat jadi si pentingna, contohna bagi gaya buk si lebihsa,* perhiasen emas, ntah pe make baju si mewah.
4 Tapi banlah maka jile kena e rehna i bas pusuh nari, kejilen si la ermasap-masap, e me lemah lembut ras ukur tenang. Enda me kejilen si meherga kel i lebe-lebe* Dibata.
5 Bagenda me diberu-diberu si nai, si erkiniteken* ras erpengarapen man Dibata, ipejilena bana alu patuh man perbulangenna,
6 bali bagi Sara patuh man Abraham, ilebuhna ia tuan. Kena me anak-anakna adi terus ilakoken kena si mehuli janah la mbiar i bas kai pe.
7 Bage pe kena o perbulangen, nggeluhlah kena alu dem pengertin* man ndehara kena. Hamatilah kalak e sebap gegehen kena asangken ia,* perban kalak e pe ikut jadi ahli waris ras kena guna ngaloken kegeluhen arah lias ate Dibata. Adi la bage, pertoton kena labo ibegiken.
8 Dungna, o turang senina, seperukuren min kena kerina, sepenggejapen, sikeleng-kelengen, melias ras mesayang, janah meteruk ukur.
9 Ula balas kejahaten alu kejahaten, ntah pe hinan alu hinan. Tapi, balaslah alu ranan si mehuli,* sebap guna si e me kena ipilih gelah banci ialoken kena pasu-pasu.
10 Sebap lit tertulis, “Ise pe si atena sikap geluhna ras ermeriah ukur, arus ijagana dilahna i bas ranan si la mehuli nari, janah arus ijagana biberna gelah ula nipu.
11 Arus ipedauhna kai si la mehuli janah arus ilakokenna kai si mehuli. Arus idaramina ras iayakina perdamen.
12 Sebap mata Jahwe mperdiateken kalak si benar, janah cupingNa megiken pemindon kalak e, tapi nembeh ate Jahwe kalak si ngelakoken kai si jahat.”
13 Adi semangat kena ngelakoken kai si mehuli, ise kin si erban kena cilaka?
14 Tapi, aminna pe arus inanami kena kiniseran erkiteken kai si benar, ermeriah ukur me kena. Ula mbiar nandangi kai si erban kalak mbiar,* janah ula kena kuatir.
15 Hamatilah Kristus selaku Tuan i bas pusuh kena. Ersikaplah kena katawari pe guna njawap kerina kalak si nungkun kerna pengarapen si lit i bas kena. Tapi jawaplah alu lemah lembut janah mehamat.
16 Jagalah pusuh peraten kena tetap bersih, gelah ise pe si ngerana nentang kena alu cara kai pe jadi mela, erkiteken mehuli perbahanen kena selaku pengikut Kristus.
17 Ulin inanami kena kiniseran erkiteken perbahanen si mehuli adi kin e ipediat Dibata, asangken erkiteken perbahanen si jahat.
18 Sebap Kristus si ngelakoken kai si benar pe sekali ngenca mate guna seh rasa lalap. Ia mate guna kalak si ngelakoken kai si salah. Ibanna bage gelah banci itegu-teguna kena ku Dibata. Mate ia i bas daging tapi ipegeluh i bas kesah.
19 Janah i bas keadan si bage lawes ia erberita man malekat-malekat si lit i bas penjara,
20 si mbarenda la patuh man Dibata i bas jaman Nuah. Paksa bahtra ibangun, Dibata tetap sabar. Bahtra e maba waluh kalak si selamat arah lau e.
21 Kejadin e nggambarken peridin si nelamatken kena gundari erkelangken kekeken Jesus Kristus. Peridin e labo mbersihken daging i bas si kotor nari, tapi mindo man Dibata guna pusuh peraten si bersih.
22 Jesus lawes ku surga janah gundari ia nggo i sebelah kanan Dibata. Malekat-malekat bage pe penguasa-penguasa iban patuh man bana.
Cataten i teruh
^ As. “bersih.”
^ As. “bagi kepang buk.”
^ As. “i mata.”
^ As. “badia.”
^ Ntah “alu erpengangka.”
^ As. “sebap kalak e bali bagi benda si lebih lemah.”
^ As. “alu pasu-pasu.”
^ Ntah banci saja “Ula mbiar nandangi ancamen kalak.”
