1 Tesalonika 2:1-20
2 O turang senina, iteh kena maka kerehen kami ndahi kena labo sia-sia.
2 Bagi si nggo iteh kena, nggo inanami kami kiniseran janah ihina i Pilipi, tapi iban Dibata kami jadi pang guna mpeseh berita si meriah kerna Dibata man kena aminna pe lit melala tentangen.*
3 Labo ibereken kami nasehat alu perukuren si salah, ntah alu sura-sura si jahat, ntah pe guna nipu.
4 Tapi perban cocok iakap Dibata kami si mpeseh berita si meriah e, emaka meriah akap kami mberitakenca, labo guna erban manusia senang tapi guna erban Dibata senang, Ia kap Dibata si mereksa pusuhta.
5 Iteh kena maka labo pernah kami muji-muji ntah pe iban-ban kami mehuli guna ndatken untung si merangap. I bas si e, Dibata si jadi saksi!
6 Labo pernah idarami kami kemulian arah manusia nari, ntah arah kena, ntah pe arah kalak si deban, aminna pe banci saja kami jadi tanggungen si mberat man kena i bas perduiten erkiteken kami rasul-rasul Kristus.
7 Tapi lembut perbahanen kami man kena, bali bagi sekalak nande si sangana pepinemken anakna.
8 Erkiteken kelengna ate kami nandangi kena, meriah ukur kami mpeseh berita si meriah i bas Dibata nari man kena, janah kesah kami pe ibereken kami man kena perban keleng kel ate kami kena.
9 O turang senina, pasti inget kena uga kerja keras kami ras uga latihna kap kami. Erdahin kami suari berngi, gelah sanga iberitaken kami man kena berita si meriah i bas Dibata nari, la kami jadi tanggungen ise pe.
10 Kena me si jadi saksi bage pe Dibata, kerna perbahanen kami si setia, benar, ras la ersalah nandangi kena selaku kalak si tek man Tuan.
11 Iteh kena uga perbahanen kami man kena, bali bagi sekalak bapak man anak-anakna. Terus ipersingeti kami kena, ipegegehi kami, janah ibereken kami kesaksin man kena sekalak-sekalak.
12 Alu bage, perbahanen kena lalap ngena ate Dibata, si ngelebuh kena guna masuk ku bas KerajanNa janah ialoken kena kemulian i bas Ia nari.
13 Erkiteken si e me maka la kami erngadi-ngadi ngata bujur man Dibata, perban sanga ibegi kena kata Dibata i bas kami nari, ialoken kena kata e labo bagi kata si rehna i bas manusia nari tapi bagi si arusna, eme i bas Dibata nari. Kata e erdahin i bas diri kena kalak si tek man Tuan.
14 O turang senina, nggo iusih kena runggun-runggun Dibata si nggo ersada ras Kristus Jesus si lit i Judea. Bali bagi kalak e nggo isiksa kalak Jahudi, kena pe isiksa kalak si sada bangsa ras kena.
15 Kalak Jahudi pe munuh Tuan Jesus ras nabi-nabi janah kami pe isiksana. La isenangken kalak e Dibata janah ilawanna kerina kalak.
16 Iberitaken kami man bangsa si deban gelah kalak e pe iselamatken, tapi terus iambati kalak Jahudi kami. Alu bage terus itambahi kalak e dosana. Tapi dungna inanami kalak e me rawa Dibata.
17 O turang senina, aminna pe kita sirang kentisik janah la banci idah kami kena, tapi kena tetap lit i bas pusuh kami. Perban merhat kel kami jumpa ras kena, emaka iusahaken kami kel jumpa ras kena.
18 Emaka idahi kami ate kami kena. Aku, Paulus, labo ngenca sekali kuusahaken tapi nggo dua kali. Aminna pe bage, iambati Setan perdalanen kami.
19 Adi la kena, ise nari si jadi arapen ntah keriahen ukur ntah pe mahkota si erban megah iakap kami i lebe-lebe Tuanta Jesus paksa kerehenna?
20 Kena kap kemulian ras keriahen ukur kami.
Cataten i teruh
^ Ntah banci saja “aminna pe arus erjuang.”
