1 Tesalonika 4:1-18
4 Dungna, o turang senina, nggo iajari kami uga arusna perbahanen kena gelah ngena ate Dibata. Tuhu bage nge perbahanen kena gelgel nari. Janah gundari ipindoken kami kel man kena i bas gelar Tuan Jesus gelah ilakoken kena lebih asa si e.
2 Sebap nggo iteh kena petunjuk* si ibereken kami man kena arah Tuan Jesus.
3 Peraten Dibata eme gelah kena badia janah ndauh i bas perbahanen seks si salah* nari.
4 Arus iteh kena sekalak-sekalak uga ngkuasai daging kena gelah tetap badia ras mehamat.
5 Labo bagi bangsa-bangsa si la nandai Dibata si la terkuasaisa napsu seksna janah la pernah puas.
6 I bas si enda, ula ise pe erban si la mehuli ntah pe ngelanggar hak turang seninana, sebap iukum Jahwe kap kalak si ngelakoken si bage, bali bagi si nggo pernah ikataken kami janah ipersingeti kami man kena.
7 Enggo ilebuh Dibata kena gelah jadi badia, labo gelah najis.
8 Emaka kalak si nulak pengajaren enda, labo manusia si itulakna, tapi Dibata si mereken kesah si badia nge si itulakna.
9 Labo perlu itulisken kami kerna uga ngkelengi turang senina, sebap kena nggo iajari Dibata ngkelengi sada ras si debanna.
10 Situhuna nggom bage perbahanen kena man turang senina i belang-belang Makedoni. Tapi teruslah lakoken kena si e janah reh tutusna i bas ndalankenca.
11 Sue ras petunjuk si ibereken kami, usahakenlah asa bancina nggeluh alu tenang, la ncampuri urusen kalak si deban, janah erdahinlah alu tutus.
12 Alu bage la kena kurang kai pe janah jelma si nterem pe banci ngidah perbahanen kena si mehuli e.
13 O turang senina, ate kami maka iteh kena min uga situhuna kerna kalak si nggo mate, gelah ula ceda ate kena bagi kalak si la erpengarapen.
14 Sebap adi erkiniteken kita maka Jesus nggo mate janah ipekeke mulihi, kita pe erkiniteken ka maka pengikut Jesus si medem i bas kematen pe ipekeke Dibata pagi janah ersada kalak e ras Jesus.
15 Pengajaren Jahwe kap si ikataken kami man kena, eme kita si nggeluh denga seh asa kerehen Tuan labo pagi ngelebei kalak si nggo medem i bas kematen.
16 Sebap nusur me Tuan i bas surga nari janah ijemakna trompet Dibata. Erlebuh ia alu sora si megang, alu sora peminpin malekat, janah pengikut Kristus si nggo mate ipekeke me leben.
17 Kenca si e, kita si nggeluh denga ibaba nangkih ras kalak e i bas embun gelah jumpa ras Tuan i langit, alu bage kita tetap ersada ras Tuan.
18 Emaka teruslah apuli sada ras si debanna alu kata-kata enda.
