1 Tesalonika 5:1-28
5 O turang senina, la perlu kutulisken man kena kerna ndigan waktu si itetapken e terjadi.
2 Sebap tuhu-tuhu iteh kena maka kerehen wari Jahwe e bali bagi kerehen pinangko i bas berngi wari.
3 Sanga ikataken kalak e, “Dame ras aman!” i je me kalak e rempet ikernepken i bas waktu si kentisik, bali bagi suina iakap diberu si nandangi melahirken. La banci ielakken kalak e.
4 Tapi kena turang senina, kena labo i bas kegelapen. Emaka sanga reh wari e, labo kena sengget perban kena la bali bagi pinangko si sengget sanga nggo terang wari.
5 Sebap kerina kena eme anak-anak terang ras anak-anak suari. Kita labo anak-anak berngi bage pe labo anak-anak kegelapen.
6 Emaka ula kita medem bagi kalak si deban. Tapi tetaplah kita medak janah erjaga-jaga.
7 Sebap kalak si medem, medem i bas berngi wari. Kalak si mabuk, mabuk i bas berngi wari.
8 Perban kita anak-anak suari, tetaplah kita erjaga-jaga. Banlah kiniteken ras kekelengen bagi baju si ngelindungi tententa. Banlah arapen keselamaten bagi topi si ngelindungi takalta.
9 Ipilih Dibata kita labo gelah iukum, tapi gelah ngaloken keselamaten erkelangken Jesus Kristus Tuanta.
10 La soal kita nggeluh ntah pe mate,* kita nggeluh ras Jesus, perban ia nggo mate man banta.
11 Emaka, teruslah kena siiah-iahen janah mpegegehi sada ras si debanna, bagi si ilakoken kena.
12 O turang senina, ipindoken kami man kena gelah iergai kena min kalak si kerja keras i tengah-tengah kena, si minpin kena i bas ngelayani Tuan bage pe si mpersingeti kena.
13 Buktiken maka tuhu-tuhu ikelengi kena ras iergai kena pendahin kalak e. Usahakenlah gelah erdame sada ras si debanna.
14 Selain si e, ipindoken kami man kena o turang senina, persingetilah kalak si la tertip, apuli kalak si sangana susah, sampati kalak si lemah, janah sabarlah man kerina kalak.
15 Pastikenlah gelah ula lit si mbalas kejahaten alu kejahaten man ise pe, tapi lakokenlah kai si mehuli man kalak si deban bage pe man kerina kalak.
16 Ermeriah ukurlah katawari pe.
17 Teruslah ertoto.
18 Katakenlah bujur i bas kai pe. Enda me si ngena ate Dibata i bas kena nari selaku pengikut Kristus Jesus.
19 Ula ambati pendahin kesah si badia i bas diri kena.*
20 Ula sepele nandangi nubuat.
21 Pastikenlah kerinana, janah teruslah lakoken kai si mehuli.
22 Ula lakoken kejahaten kai pe.
23 Mbera Dibata si mereken kedamen erban kena tuhu-tuhu badia. Mbera kesah, kegeluhen, bage pe daging kena tetap bersih sanga kerehen Tuanta Jesus Kristus.
24 Dibata si ngelebuh kena e setia janah pasti ilakokenNa bage.
25 O turang senina, teruslah totoken kami.
26 Alo-alolah kerina turang senina alu dem kekelengen.*
27 Kupindoken man kena i bas gelar Tuan, gelah surat enda ibacaken man kerina turang senina.
28 Mbera lias ate Tuan Jesus Kristus si mbelin lit ras kena.
Cataten i teruh
^ As. “kita medak ntah pe medem.”
^ As. “Ula mateken api kesah si badia.”
^ As. “alu ciumen si badia.”
