2 Korinti 12:1-21
12 Aku arus ermegah. Aminna pe la erguna, terus nge kucakapken kerna kai si kuidah bage pe kai si ipebetehken Tuan.
2 Lit kutandai sekalak dilaki si ersada ras Kristus, si 14 tahun si lewat rempet iangkat ku surga si peteluken. La kuteh ia iangkat ras dagingna ntah lang. Dibata si metehsa.
3 Payo, kutandai dilaki e, tapi la kuteh ia iangkat ras dagingna ntah lang. Dibata si metehsa.
4 Rempet ia ibaba ku pardis janah ibegina kata-kata si la banci ikataken ntah pe ibelasken manusia.
5 Kumegahken me dilaki e. Tapi aku, kelemahenku saja si kumegahken.
6 Adi ermegah pe ateku, labo aku jadi la masuk akal sebap kai si kukataken benar kap. Tapi labo aku ermegah, alu bage ipuji kena aku menurut kai si nggo idah kena ras si ibegi kena arah aku nari,
7 janah labo erkiteken kai si luar biasa si nggo ipebetehken man bangku.
Gelah ula aku sombong, ibereken duri i bas dagingku, tempa-tempa lit malekat Setan si terus mekpeki aku, alu bage la aku sombong.
8 Enggo telu kali aku mindo man Tuhan gelah duri e ibuat i bas aku nari.
9 Tapi ikatakenNa man bangku, “Lias ateKu si mbelin nggo bias man bandu, sebap paksa kam lemah, kuasaKu jadi sempurna i bas kam.” Emaka alu ermeriah ukur, ermegah aku nandangi kelemahenku gelah kuasa Kristus tetap lit i bas aku bali bagi kemah.
10 Emaka senang kuakap sanga aku lemah, sanga ihina, sanga kadeku pe kurang, ntah pe sanga ngadapi kiniseran guna Kristus. Paksa aku lemah, aku jadi megegeh.
11 Aku memang la masuk akal. Kena nge si maksa aku gelah kupujiken diriku. Amin gia aku labo kai pe, situhuna labo sitik pe aku ketadingen ibandingken rasul-rasul kena si seh kel hebatna e.
12 Enggo idah kena sendiri maka aku enda rasul, erkiteken terus aku megenggeng janah kulakoken melala tanda-tanda si luar biasa, mukjizat-mukjizat, ras perbahanen si dem kuasa.
13 Me labo lit kurangna kena ibandingken runggun si deban, selain aku la jadi tanggungen kena ngenca? Maapkenlah aku erkiteken kesalahen enda.
14 Situhuna, enda me si petelu kaliken aku nggo ersikap ndahi kena. Bali bagi si mbarenda, gundari pe aku labo jadi tanggungen kena sebap si kuarapken labo erta kena, tapi kena nge. Labo anak-anak si mpepulung erta man orang tuana, tapi orang tua nge si mpepulung erta man anak-anakna.
15 Adi aku, meriah ukurku mereken kerinana ras ngkorbanken kerinana guna kena. Keleng kel ateku kena, emaka patut kin kurang kekelengen kena man bangku?
16 Aminna pe bage, la aku jadi tanggungen man kena. Tapi, ikataken kena aku “licik” janah ikataken kena kutokohi kena alu “tipun.”
17 Me labo pernah kubuat untung i bas kena nari arah kalak si kusuruh ndahi kena?
18 Sanga kusuruh Titus ras sekalak turang senina ndahi kena, me labo ibuatna untung i bas kena nari? La kin seri nge perukuren ras perbahanen kami?
19 Iakap kena kin kami sangana mbela diri? Tentu lang. Kami ngerana alu jujur i lebe-lebe Dibata selaku kalak si ersada ras Kristus. Turang senina si kukelengi, situhuna kerina si ilakoken kami guna mpegegehi kena kap.
20 Bicara reh kari aku, kuatir aku adi kena la bagi si kuarapken, janah aku pe la bagi si iarapken kena. Kuatir aku adi lit si gejek, cian, merawa, erjengil, ngataken si la tuhu kerna kalak si deban, cekurak, sombong, janah rubati.
21 Banci saja sanga reh kari aku mulihi, iban Dibataku aku mela i lebe-lebe kena, janah sedih kel aku erkiteken melala kalak si mbarenda erban dosa lenga ka ertobat* i bas perbahanenna si najis, perbahanen seks si salah,* ras perbahanen si la meteh mela.*
Cataten i teruh
^ Ntah “jera dingen robah.”
^ Bahasa Junani, porneia. Nen Kamus.
^ As. aselgeia. Nen Kamus.
