2 Korinti 13:1-14
13 Enda me petelu kaliken aku ersikap guna ndahi kena. Lit ayat si ngataken, “Tiap perkara banci sah adi lit dua ntah telu saksi si ngerana.”
2 Aminna pe gundari aku la ras kena, begikenlah kata-kataku tempa-tempa aku ras kena pedua kaliken. Emaka kubereken ateku leben persinget man kalak si mbarenda erban dosa, bage pe man kena kerina. Adi reh ka pagi aku, kalak si bage la banci kupediat.
3 Alu bage, kubuktiken me man kena maka Kristus ngerana erkelangken aku, janah labo ia lemah nandangi kena, tapi perbahanenna dem alu kuasa.
4 Memang ia ibunuh i tiang* erkiteken keadanna si lemah, tapi gundari ia nggeluh erkiteken kuasa Dibata. Gundari pe, kami lemah bali bagi ia, tapi nggeluh me kami ras ia erkiteken kuasa Dibata si sangana erdahin i bas diri kena.
5 Teruslah periksa diri kena, erkiniteken denga kin kena ntah lang? Teruslah pastiken uga kin kena situhuna. Sadar nge kena maka Jesus Kristus ersada ras kena? Arusna sadar min kena, pala la kena ialoken Dibata.
6 Ngarap kel aku gelah kena sadar maka kami ialoken Dibata.
7 Ertoto kami man Dibata gelah la ilakoken kena kesalahen kai pe. Tujun kami labo gelah ngena ate kalak kami. Tapi, gelah ilakoken kena kai si mehuli, aminna pe kami la ngena ate kalak si deban.
8 La banci ilawan kami kebenaren, tapi kai pe ilakoken kami guna kebenaren.
9 Pasti meriah ukur kami sanga kena megegeh, aminna pe kami lemah paksa si e. Ertoto ka kami gelah iban kena perubahen si iperluken.
10 Emaka kutulis kerna si enda sanga aku la ras kena, gelah sanga aku ras kena la perlu aku kerassa man kena, erkiteken nggo ibereken Tuan man bangku kuasa guna mpegegehi kena, janah labo erban kena lemah.
11 Dungna, o turang senina, teruslah kena ermeriah ukur, teruslah ban perubahen si iperluken, teruslah aloken pengapul, teruslah kena seperukuren, janah teruslah nggeluh alu dame. Alu bage, Dibata si dem kekelengen ras dem kedamen terus ras kena.
12 Alo-alolah sada ras si debanna alu dem kekelengen.*
13 Kerina kalak si badia kirim salam man kena.
14 Mbera lias ate si mbelin arah Tuan Jesus Kristus, kekelengen Dibata, bage pe pasu-pasu arah kesah si badia, terus lit ras kena.
