2 Korinti 2:1-17
2 Enggo kuputusken maka sanga kudahi mulihi kena kari, lanai kuban kena sedih.
2 Adi kuban kena sedih, ise nari kin si ngapuli aku adi la kin kalak si kuban sedih?
3 Kutulis sange surat man kena gelah adi reh kari aku, la aku sedih iban kalak si arusna erban aku senang, sebap tek aku maka kai si erban aku senang pasti ka erban kena senang.
4 Erkiteken beratna kiniseranku janah latih kel ukurku, kutulisken surat enda man kena alu iluh mambur, si e kukataken labo gelah kena sedih tapi gelah iteh kena maka tuhu-tuhu keleng kel ateku kena.
5 Adi lit si erban kena sedih, situhuna labo aku si ibanna sedih, tapi kena kerina nge si ibanna sedih. La ateku terbuen ncakapken kerna si enda.
6 Teremen i bas kena nggo mere disiplin man bana, janah si e nggom bias.
7 Gundari, alu lias ate, ampuni janah apulilah ia, gelah ula ia nyerah perban sedihsa kel kapna.
8 Kupindoken man kena, banlah ia tek maka tuhu-tuhu ikelengi kena kel ia.
9 Kutulis sange surat man kena guna nguji kena, patuh ntah lang kena i bas kerinana.
10 Adi iampuni kena sekalak jelma, aku pe ngampuni ia. Situhuna, sanga kuampuni sekalak jelma, si e kulakoken i lebe-lebe Kristus guna kena kerina.
11 Alu bage, la ibuat Setan kesempaten nandangi* kita, sebap nggo siteh rencanana.
12 Sanga aku seh i Troas guna mberitaken berita si meriah kerna Kristus, nggo lit kesempaten* man bangku guna ngelayani Tuan,
13 tapi la tenang ukurku sebap la aku jumpa ras seninaku Titus. Emaka kenca kukataken man turang senina si lit i je maka arus aku lawes, berkat me aku ku Makedoni.
14 Bujur man Dibata, si rusur minpin kita i bas pawai kemenangen ras Kristus. IpakeNa kita guna mberitaken pemeteh kerna diriNa ku japa pe, bali bagi bau si merim.
15 Sanga siberitaken kerna Kristus, kita bali bagi bau si merim i lebe-lebe Dibata, si teranggeh i tengah-tengah kalak si iselamatken bage pe si ikernepken.
16 Man kalak si ikernepken, enda bali bagi bau si maba kematen, tapi man kalak si iselamatken, enda bali bagi bau si maba kegeluhen. Ise si cocok ndahiken dahin enda?
17 Kami kap si cocok ndahikensa, sebap la idayaken kami kata Dibata* bagi si ilakoken nterem jelma. Tapi selaku pengikut Kristus si isuruh Dibata, arah ukur kami si bujur nge kami ngerana i lebe-lebe Dibata.
Cataten i teruh
^ Ntah “la itipu Setan.”
^ As. “nggo terbuka pintu.”
^ Ntah “la ibuat kami untung arah kata Dibata.”
