2 Korinti 3:1-18
3 Perlu kin ibereken kami surat si isina mujiken diri kami? Bali kin kami bagi kalak si deban si merluken surat-surat pujin i bas kena nari ntah man kena?
2 Kena kap surat kami, si itulis i bas pusuh kami, si ieteh janah ibaca kerina kalak.
3 Enggo jelas maka kena kap surat Kristus si itulisken kami selaku pelayan Dibata. Itulis kami surat e labo alu tinta tapi alu kesah si badia Dibata si nggeluh, labo itulis i bas batu tapi i bas pusuh manusia.
4 Erkelangken Kristus, tek kami kerna si e i lebe-lebe Dibata.
5 La ikataken kami maka kami ngasup ngelakoken pendahin enda erkiteken gegeh kami, tapi erkiteken penampat Dibata.
6 Ia si erban kami ngasup jadi pelayan sada perjanjin si mbaru, labo alu penegu-negu sada undang-undang si tertulis, tapi alu penegu-negu kesah si badia. Undang-undang si tertulis maba ukumen mate, tapi kesah si badia maba kegeluhen.
7 Undang-undang si maba kematen si itulis i bas batu, reh alu kemulian si mbelin, seh maka kalak Israel la ngasup natap ayo Musa perban kemulian si lit i bas ayona e kemulian si nandangi masap.
8 La kin belinen kemulian pelayanen si ilakoken kesah si badia?
9 Adi undang-undang si maba kematen e saja pe mulia, pasti ndauh lebih mulia pelayanen si erban kalak ikataken benar!
10 Situhuna, undang-undang si mulia si mbarenda, nggo lanai lit ertina ibandingken ras kemulian si lit i bas perjanjin si mbaru.
11 Adi undang-undang si nandangi masap saja pe ibereken alu kemulian, pasti ndauh belinen kemulian si lit i bas perjanjin si gundari!
12 Erkiteken bagenda pengarapen kami, emaka pang kami terus terang ngerana.
13 Kami labo bali ras Musa si nutupi ayona alu kain gelah la idah kalak Israel kemulian* undang-undang si nandangi masap e.
14 Mbarenda la iangkai kalak e, janah seh asa wari enda pe, kain penutup e tetap lit denga bas ukurna sanga perjanjin si ndekah ibacaken, sebap alu penampat Kristus ngenca kain e banci lepas.
15 Situhuna, seh asa wari enda pe, tiap ibacaken Undang-Undang Musa, kain penutup ndai tetap nutupi ukur kalak e.
16 Tapi adi lit sekalak jelma mulihken man Jahwe, kain penutup e ilepasken.
17 Jahwe e Roh kap, janah i ja lit kesah si badia Jahwe, i je lit kebebasen.
18 Kerina kita si ayona la itutupi, sicidahken kemulian Jahwe bali bagi cermin. Kita iubah gelah bali bagi Dibata janah gelah sicidahken kemulian si reh belinna, pas bagi si iarapken Jahwe, Roh e.*
