2 Korinti 7:1-16
7 Emaka turang senina si ikelengi kami, erkiteken nggo sidat janji-janji e, mari sibersihken dirita ras perukurenta arah kai pe si banci erban kita najis, gelah badia kita alu sempurna perban mbiar man Dibata.
2 Banlah ingan kami i bas pusuh kena. La pernah lit salah kami man ise pe, la pernah irugiken kami ise pe, janah la pernah imanpaatken kami ise pe.
3 Bage ningku labo guna nalahken kena perban bagi si nggo kukataken, kena lit bas pusuh kami, mate ras kami janah nggeluh ras kami.
4 Bebas aku ngerana man kena, janah megah kuakap nandangi kena. Tuhu-tuhu terapuli kel aku, janah mbelin keriahen ukurku aminna pe melala kiniseran inanami kami.
5 Sanga kami seh i Makedoni pe, la tenang iakap kami, janah terus inanami daging kami erbage-bage kiniseran. Lit perlawanen arah darat runggun nari, janah lit perasan mbiar bas runggun nari.
6 Tapi Dibata si lalap ngapuli kalak si picet ukurna, nggo ngapuli kami arah kerehen Titus.
7 Terapuli kami labo saja erkiteken kerehenna, tapi pe erkiteken pengapul si idatna i bas kena nari. Ipebetehkenna man kami kerna uga tedehna ate kena nandangi aku, kerna uga cedana ukur kena, janah kerna uga ermediatena kena man bangku, alu bage reh tambahna keriahen ukurku.
8 Aminna pe sedih kena iban suratku e, labo aku erkadiola. Sebap kentisik ngenca kena sedih perban suratku e. Emaka aminna pe tangtangna aku erkadiola,
9 gundari nggo senang kuakap, labo perban kena sedih, tapi perban sedihku e erban kena teriahken guna ertobat.* Erkiteken sedih kena e sue ras peraten Dibata, alu bage la irugiken kami kena.
10 Sedih si sue ras peraten Dibata ngasilken pertobaten si maba keselamaten, janah la erban kalak erkadiola. Tapi kesedihen doni enda ngasilken kematen.
11 Jelas kel maka sedih kena e sue ras peraten Dibata, alu bage iusahaken kena kel ngelakoken kai si benar. Ibersihken kena gelar kena, merawa kel kena nandangi perbahanen si salah, mbiar kena man Dibata, tutus kel ate kena ertobat,* semangat kena mpekena kesalahen kena. I bas si e, ilakoken kena kai si benar.
12 Kutulis surat enda man kena labo guna kepentingen kalak si ersalah ntah pe kalak si isalahken. Tapi kutulis surat enda gelah ibuktiken kena i lebe-lebe Dibata maka merhat kena megiken kami.
13 Si enda me si erban kami terapuli.
Tapi selain terapuli, reh riahna ukur kami erkiteken Titus pe ermeriah ukur, perban kerina kena mpegegehi ia.
14 Pernah kupujiken kena man Titus, janah la aku mela. Kai si ipujiken kami man bana payo tuhu, bage ka pe kerna kerina si ikataken kami man kena.
15 Selain si e, reh kelengna ate Titus nandangi kena, erkiteken ingetna uga patuhna kena kerina janah ialo-alo kena ia alu dem kehamaten.
16 Meriah ukurku erkiteken i bas kai pe banci aku tek man kena.*
Cataten i teruh
^ Ntah “jera dingen robah.”
^ Ntah “jera dingen robah.”
^ Ntah banci saja “banci aku megenggeng erkiteken kena.”
