2 Korinti 8:1-24
8 O turang senina, gundari ate kami gelah iteh kena kerna lias ate Dibata si mbelin si icidahken man runggun-runggun si lit i Makedoni.
2 Sanga inanami kalak e kiniseran ras percuban si mberat, ermeriah ukur kel kalak e. Aminna pe kalak e mesera, tapi kalak e nggit mere.
3 Ibereken kalak e asa ngasupna, janah lebih ka asa ngasupna. Aku kap saksina.
4 Alu ukur ersuruh, terus ipindoken kalak e man kami gelah idatna kehamaten i bas mere sumbangen, guna ikut mereken penampat man kalak si badia.
5 Kai si ilakoken kalak e lebih asangken si iarapken kami, erkiteken tangtangna nggo ibereken kalak e dirina man Tuan janah man kami, sue ras peraten Dibata.
6 Emaka, ipindoken kami man Titus gelah idungina mpepulung sumbangen sukarela kena, erkiteken ia nge si mulaisa mpepulung sumbangen e i bas kena nari.
7 Enggo mehuli kel kena i bas kai pe: Paguh kiniteken kena, beluh kena ngerana, melala pemeteh kena, tutus ate kena ngelakoken kai pe, janah ikelengi kena kalak si deban bagi ngkelengi diri kena. Emaka, mbera terus ka kena nggit mere alu ukur meriah.
8 Si enda kukataken labo guna mere perentah. Tapi guna mpebetehken man kena maka kalak si deban pe tutus atena janah kuuji ateku kena lit ntah lang kekelengen situhu-tuhu i bas kena.
9 Enggo iteh kena kerna lias ate si mbelin arah Tuanta Jesus Kristus, aminna pe ia bayak, jadi mesera ia guna kena, gelah keadanna si mesera e erban kena jadi bayak.
10 I bas si enda, menurut pendapatku: Idat kena manpaat adi idungi kena dahin e. Sebap nggo imulai kena setahun si lewat janah semangat kena ngelakokenca.
11 Emaka gundari, dungilah kai si nggo imulai kena e alu semangat si seri, sue ras kai si lit i bas kena.
12 Meriah ukur Dibata adi sekalak jelma mere alu ukur meriah, erkiteken iarapken Dibata gelah kalak mere menurut kai si lit i bas ia, labo menurut kai si la lit bas ia.
13 Maksudku labo erban baban kalak si deban reh nahangna janah nambahi baban kena.
14 Ateku gelah seri baban kena. Kai si lebih i bas kena banci nutupi kai si kurang i bas kalak e, janah kai si lebih i bas kalak e banci ka nutupi kai si kurang i bas kena.
15 Bali bagi ayat si ngataken, “Kalak si mbue ipepulungna la ia kelebihen, janah kalak si sitik ipepulungna la ia kekurangen.”
16 Bujur man Dibata, si erban Titus ermediate man kena bali bagi kami pe ermediate man kena.
17 Labo saja meriah ukurna ngaloken pemindon kami, tapi semangat kel ia janah lawes ia ndahi kena alu ukurna ersuruh.
18 Isuruh kami ka turang senina si deban lawes ras ia. Turang senina e ipujiken kerina runggun erkiteken kai si ilakokenna guna berita si meriah.
19 Selain si e, ia nggo ipilih runggun-runggun guna nemani kami i bas mbagiken sumbangen enda. Si e ilakoken kami guna kemulian Tuan* janah mbuktiken semangat kami i bas nampati kalak si deban.
20 Emaka hati-hati kel kami gelah ula kami isalahken ise pe i bas mbagiken sumbangen si mbelin enda.
21 Sebap ‘kerinana ilakoken kami alu jujur labo saja i lebe-lebe Jahwe, tapi i lebe-lebe manusia pe.’
22 Selain si e, isuruh kami ka turang senina si deban ras kalak e. Ia nggo rusur iuji kami janah terbukti rajin, tapi gundari nggo reh rajinna ia perban tek kel ia man kena.
23 Adi lit si nungkun kerna Titus, kataken maka ia temanku sada dahin, si erdahin guna kepentingen kena. Adi lit si nungkun kerna turang seninata e, kataken maka kalak e rasul-rasul i bas runggun-runggun janah jadi kemulian man Kristus.
24 Emaka buktiken kekelengen kena man kalak e, janah cidahken man runggun-runggun kai alasenna kami ermegah nandangi kena.
Cataten i teruh
^ Bahasa Junani, Kyrios. Ntah banci saja “Tuhan.”
