2 Petrus 2:1-22
2 Mbarenda lit nabi-nabi palsu i tengah-tengah umat Dibata. Bage ka pe, lit ka pagi guru-guru palsu i tengah-tengah kena. Alu erbuni-buni, ipetandaken kalak e pagi sekte-sekte si erban perpecahen si ncedai kiniteken kena. Janah la ka iakuina ise si nggo nukur ia, emaka kalak e arus pedas ikernepken.
2 Selain si e, nterem ka si ngikutken perbahanen kalak e si la meteh mela.* Erkiteken si e, ihina me dalan kebenaren.
3 Iban kalak e ranan si la tuhu guna ndatken keuntungen si merangap i bas kena nari. Tapi, ukumen man kalak e si nggo ndekah itentuken la banci terlambat janah kalak e pasti ikernepken.
4 Malekat-malekat si erdosa pasti iukum Dibata. IbenterkenNa kalak e ku bas Tartarus,* janah irantekenNa kalak e i bas gelap* si seh kel gelapna, seh asa kalak e ihakimi.
5 Doni i bas jaman si nai pe iukum Dibata nge. Iban Dibata terjadi banjir si mbelin i doni si iingani manusia si la nghamati Ia. Tapi iselamatkenNa Nuah, sekalak perberita kerna kebenaren bage pe pitu kalak si debanna.
6 Selain si e, iukum Dibata kota Sodom ras Gomora janah ibanNa kota e jadi abu. Kejadin e jadi persinget kerna kai si terjadi pagi man kalak si la nghamati Ia.
7 IselamatkenNa ka Lut, kalak si benar. Susah kel iakapna erkiteken perbahanen kalak jahat si la meteh mela.*
8 Sanga tading ia ras kalak e, susah kel akapna tiap wari erkiteken ibegina janah idahna kejahaten si ilakoken kalak e.
9 Jelas me, nggo iteh Jahwe cara mbebasken kalak si nembah Ia i bas percuban nari janah nggo itehNa ka cara nikapken ukumen man kalak jahat guna ikernepken i bas wari penghakimen pagi,
10 terutama kalak si iusahakenna erban daging kalak si deban jadi najis janah ihinana kalak si erkuasa.
Perpang kel kalak e janah kai pe ate-atena saja. La kalak e mbiar nghina kalak si mulia.*
11 Aminna pe malekat-malekat ndauh gegehen ras belinen kuasana asangken guru-guru palsu e, tapi kalak e la pernah ituduh malekat-malekat alu kata-kata hinan, perban ihamati malekat-malekat e Jahwe.
12 Kalak e bali bagi binatang si la rukur, si lahir guna itangkap ras ibunuh. Ihina kalak e kai si la iangkana. Ikernepken me kalak e erkiteken perbahanenna si jahat.
13 Kalak e iukum erkiteken perbahanenna si jahat.
Meriah iakap kalak e pesta pora, bage pe paksa ciger wari. Sanga kena man-man ras kalak e, kalak e bali bagi kotoren i bas baju ras bagi cacat i bas ayo, si meriah kel akapna ngajarken ajaren si sesat.
14 Mata kalak e dem alu perbahanen si erlua-lua, janah la banci kalak e ngadi ngelakoken dosa, ras igodana kalak si lenga paguh kinitekenna. Pusuh kalak e nggo terbiasa merangap. Kalak e me kalak si iukum Dibata.
15 Itadingken kalak e dalan si benar, dungna iban kalak ia papak. Ikutkenna dalan Bileam anak Beor, si merhat ndatken upah arah perbahanen si salah.
16 Erkiteken ilanggar Bileam undang-undang, ipersingeti me ia. Kelede si la banci ngerana pe dungna banci ngerana bagi manusia janah iambatina perbahanen si mehado arah nabi e.
17 Kalak e bali bagi sumber lau si kerah ras bali bagi kabut si iembus angin si meter, janah nggo isikapken ingan si seh kel gelapna man kalak e.
18 Meganjang kel kalak e ngerana tapi situhuna la lit isina. Alu sura-sura dagingna si erdosa ras perbahanenna si la meteh mela,* igodana kalak si mbaru denga nadingken kalak si ngelakoken perbahanen si salah.
19 Erjanji kalak e mereken kebebasen, tapi ia sendiri budak dosa. Adi sekalak jelma lit si ngkuasaisa, ia budak kalak si ngkuasaisa e kap.
20 Kalak si ndatken pemeteh si benar kerna Tuan ras Juru Selamatta, Jesus Kristus, nggo kap ia ibebasken arah doni si najis enda. Tapi adi mulihken ka ia janah ikuasai si najis e, emaka kedungenna ndauh keleken asangken si tangtangna mbarenda.
21 Madin la pernah iteh kalak e kerna dalan si benar, asangken itehna kerna si e tapi jenari itadingkenna perentah si badia si nggo pernah ialokenna.
22 Kalak e bali bagi kuan-kuanen enda: “Biang ipanna mulihken kai si nggo iutahkenna, janah babi si nggo iperidi, mulihi ercebah i bas kubang.”
Cataten i teruh
^ As. aselgeia. Nen Kamus.
^ Nen Kamus.
^ Ntah banci saja “imasukkenNa kalak e ku lubang.”
^ As. aselgeia. Nen Kamus.
^ Maksudna, kalak si lit tanggung jawapna i bas runggun.
^ As. aselgeia. Nen Kamus.
