2 Petrus 3:1-18
3 Turang senina si kukelengi, enda me suratku si peduaken si kutulisken man kena. Bali bagi suratku si pertama, kuiahken ateku kena gelah bersih perukuren kena.
2 Ateku gelah inget kena kata-kata si nggo pernah ibelasken nabi-nabi si badia bage pe perentah Tuan ras Juru Selamatta si ipeseh arah rasul-rasul kena.
3 I bas si e kerina, arus iteh kena maka i bas wari-wari pendungi reh me kalak si nggit nokohi. Ate-atena saja perbahanenna,
4 janah nina, “I ja dage kerehen si nggo ijanjiken e? Labo lit si berubah mulai kin nini bulang kami medem i bas kematen, kerinana seri saja bali bagi tangtangna doni enda ijadiken.”
5 Alu sengaja la iperdiateken kalak e bukti si lit: Erkiteken perentah Dibata, mbarenda nari pe langit nggo lit, daraten ipisahken arah lau, janah daraten e ikelilingi lau.
6 Bage ka me, alu lau banjir si mbelin, doni i bas jaman si e ikernepken.
7 Bage ka pe, alu perentah si seri, langit ras doni si lit gundari enda nandangi ikernepken alu api. Langit ras doni ipediat tetap lit seh asa wari penghakimen man kalak si la nembah Dibata, janah seh asa wari kalak si la nghamati Dibata ikernepken.
8 Tapi, o turang senina si kukelengi, ula min kena lupa kerna si enda: I bas Jahwe, sada wari bali kap ras seribu tahun, janah seribu tahun bali ras sada wari.
9 Jahwe la melet i bas nepati janjiNa, bagi pengakap piga-piga kalak. Tapi sabar Ia man kena perban labo ateNa sekalak pe ikernepken tapi gelah kerina min ertobat.*
10 Tapi kerehen wari Jahwe bali bagi kerehen pinangko. Paksa si e, lesap me langit alu sora si erlenggur. Kerina si lit i bas langit ras doni meseng perban seh kel lasna. Tapi doni ras kerina pendahin manusia si lit i je teridah me.
11 Kerina si enda nandangi ikernepken me alu cara si bage. Emaka ukurkenlah jadi kalak si uga arusna kena. Arus bersih lagu langkah kena janah buktiken arah perbahanen kena maka kena kalak si nembah Dibata.
12 Lakokenlah si e asum kena nimai janah tetap nginget wari kerehen Jahwe. I bas wari e, meseng me langit janah kerina si lit i bas doni jadi melengas erkiteken api si seh kel lasna!
13 Tapi kita nimai kai si nggo ijanjiken Dibata, eme langit si mbaru ras doni si mbaru. I je me inganna keadilen.
14 Jadi, o turang senina si kukelengi, sanga itimai kena si enda kerina, usahakenlah asa bancina gelah i bas kedungenna idapeti Dibata kena bersih ras la erpandangen janah nggeluh alu dame ras Ia.
15 Selain si e, anggaplah kesabaren Tuhanta e jadi kesempaten guna iselamatken, bali bagi surat si itulisken turang seninata si ikelengi kita eme Paulus, sue ras kepentaren si ibereken Dibata man bana.
16 Kerna si enda me si ituliskenna i bas kerina suratna. Tapi lit piga-piga isi suratna e si mesera ngangkaisa janah si e iputarbalikken kalak si kurang pemetehna ras si la paguh kinitekenna. Bage ka me perbahanenna nandangi piga-piga bagin si deban si lit i bas Kitap si Badia. Kalak e sendiri si erbanca maka ia ikernepken.
17 Emaka turang senina si kukelengi, erkiteken nggo iteh kena kerna si e, hati-hatilah kena gelah ula iban kalak e kena papak radu ras kalak e, alu ajaren-ajaren palsu si ngelanggar hukum, alu bage tetap kena paguh.
18 Tapi teruslah datken terbuen lias ate si mbelin bage pe pemeteh kerna Tuanta ras Juru Selamatta eme Jesus Kristus. Mbera terus ia imuliaken gundari nari seh rasa lalap. Amin.
Cataten i teruh
^ Ntah “jera dingen robah.”
