2 Tesalonika 2:1-17
2 Tapi, o turang senina, kerna kerehen Tuanta Jesus Kristus bage pe kerna ndigan kita ipepulung ras ia, mindo kami
2 gelah ula mis ate kena mamang ntah pe la tenang adi lit berita maka wari Jahwe nggo reh, aminna pe berita e tempa-tempa i bas Dibata nari, ntah ibegi kena arah sekalak jelma, ntah ibaca kena i bas surat si tempa-tempa rehna i bas kami nari.
3 Ula kena itipu ise pe alu cara kai pe, erkiteken wari e labo reh ope lenga lit kalak si murtad bage pe ope lenga teridah kalak si ngelanggar undang-undang, eme kalak si patut ikernepken.
4 Kalak e kap si ngelawan janah si ipeganjangna bana i bas kerina si igelari dibata ntah pe si isembah kalak. Alu bage, kundul ia i rumah pertoton Dibata janah ikatakenna i lebe-lebe jelma si nterem maka ia dibata.
5 Sanga aku ras kena denga, la kin inget kena rusur kucakapken kerna si enda man kena?
6 Gundari nggo iteh kena ise si ngambati kalak e gelah ula teridah ope lenga waktuna.
7 Payo, pelanggaren e ilakoken alu erbuni-buni, janah terus ibuniken seh asa si ngambatisa gundari e lanai lit.
8 Kenca si e teridah me si ngelanggar undang-undang e. Paksa nggo teridah kerehen Tuan Jesus, kalak si ngelanggar undang-undang e ikernepken me. Payo, imasapken me ia alu kesah si ndarat i bas babah Jesus nari.
9 Kalak si ngelanggar undang-undang e reh erkiteken Setan, si mereken kuasa guna ngelakoken kerina perbahanen si luar biasa, tanda-tanda si luar biasa guna nipu, ras mukjizat-mukjizat,
10 bage pe kerina tipun si licik si erban kalak e ikernepken. Kalak e ikernepken erkiteken la nggit ngaloken ras ngkelengi kebenaren si mereken keselamaten.
11 Eme sebapna ipediat Dibata kalak e itipu, alu bage tek kalak e man kata-kata si la tuhu,
12 gelah kerina kalak e iukum perban la kalak e tek nandangi kai si benar tapi ngena atena nandangi kai si salah.
13 O turang senina si ikelengi Jahwe, arus rusur ikataken kami bujur man Dibata guna kena, erkiteken mulai tangtangna nari nggo ipilih Dibata kena guna iselamatken, alu mpebadiaken kena erkelangken kesahNa si badia bage pe alu kiniteken kena man kebenaren.
14 IpilihNa kena arah berita si meriah si iberitaken kami, gelah ialoken kena kemulian i bas Tuanta Jesus Kristus nari.
15 Emaka o turang senina, tedislah kena alu paguh janah teruslah ikutken kai si nggo iajarken man kena, ntah sanga kami ngajar ntah pe arah surat kami.
16 Mbera Tuanta Jesus Kristus ras Dibata eme Bapakta, si ngkelengi kita, si mereken pengapul si la erkeri-kerin bage pe arapen si mehuli erkiteken lias ateNa si mbelin,
17 ngapuli pusuh kena ras erban kena paguh i bas kerina perbahanen ras kata-kata si mehuli.
