2 Tesalonika 3:1-18
3 Dungna o turang senina, teruslah totoken kena kami, gelah kata Jahwe terus terberita alu meter janah imuliaken i tengah-tengah jelma si nterem bali bagi i tengah-tengah kena,
2 janah gelah kami iselamatken i bas kalak si kejam ras si jahat nari, sebap kiniteken labo lit i bas kerina kalak.
3 Tapi Tuan setia kap, janah ipegegehina ras ilindungina kena i bas si jahat nari.
4 Selain si e, selaku pengikut Tuan, tek kami man kena, maka sangana ikutken kena petunjuk si ibereken kami janah terus pagi ikutken kena.
5 Mbera itegu-tegu Tuan pusuh kena guna ngkelengi Dibata janah setia guna Kristus.
6 O turang senina, gundari ibereken kami man kena petunjuk enda i bas gelar Tuanta Jesus Kristus eme: Ula deheri turang senina si perbahanenna la tertip janah la sue ras petunjuk si nggo ialoken kena* i bas kami nari.
7 Iteh kena sendiri uga arusna ngusih kami, erkiteken sanga kami ras kena, perbahanen kami la bali bagi kalak si la tertip.
8 La ipan kami pangan ise pe alu la nggalar. Tapi, kami kerja keras janah tutus ate kami erdahin suari ras berngi. Alu bage la kami jadi tanggungen si mberat man ise pe i tengah-tengah kena.
9 Labo perban la lit hak kami erban si bage, tapi icidahken kami ate kami usihen si mehuli gelah banci iusih kena.
10 Situhuna, sanga kami ras kena, pernah ibereken kami petunjuk enda: “Ise pe si la nggit erdahin, ula ia man.”
11 Ibegi kami maka lit piga-piga i tengah-tengah kena kalak si la tertip perbahanenna, si la nggit erdahin tapi icampurina urusen kalak si deban.
12 I bas gelar Tuan Jesus Kristus, ibereken kami perentah ras nasehat man kalak si bage, gelah idahikenna dahinna janah ipanna asil pencarinna sendiri.
13 Tapi o turang senina, ula kena nyerah i bas ngelakoken kai si mehuli.
14 Adi lit kalak si la patuh man petunjuk si lit i bas surat enda, hati-hatilah* nandangi kalak si bage janah ula nai erteman ras ia gelah mela iakapna.
15 Ula ianggap kena ia musuh. Tapi teruslah persingeti ia selaku turang senina.
16 Mbera Tuan si mereken kedamen terus mere kena kedamen i bas kerinana. Mbera lit Tuan ras kena kerina.
17 Enda me salam arah aku nari, Paulus, si kutulis sendiri alu tanku. Enda me si jadi tanda i bas tiap suratku si mbuktiken surat enda i bas aku nari.
18 Mbera lias ate si mbelin arah Tuanta Jesus Kristus tetap lit ras kena kerina.
