2 Timotius 1:1-18
1 Surat enda i bas aku nari, Paulus, si jadi rasul Kristus Jesus sue ras peraten Dibata, guna mberitaken janji kerna kegeluhen si ibereken erkelangken Kristus Jesus.
2 Surat enda man anak si kukelengi Timotius:
Mbera ialokenndu lias ate si mbelin, perkuah ate, ras kedamen i bas Dibata nari eme Bapakta, bage pe i bas Jesus Kristus Tuanta.
3 Bujur kukataken man Dibata si man baNa kubereken pelayanen si badia alu pusuh peraten si bersih bali bagi si ilakoken nini bulangku. Rusur kuinget kam i bas totoku sanga mindo man baNa suari ras berngi.
4 Sanga kuinget iluhndu mambur, merhat kel aku jumpa ras kam, gelah meriah kel ukurku.
5 Teringet aku kinitekenndu si la munapik, si tangtangna lit bas ninindu Lois ras mamakndu Enike, janah tek aku maka kiniteken e pe lit i bas kam.
6 Emaka kuingetken kam gelah tetap semangat bagi api si gurlah i bas nggunaken pemere Dibata, si ialokenndu sanga kutamaken tanku ku datas takalndu.
7 Kesah si badia si ibereken Dibata man banta mereken gegeh, kekelengen, janah gelah beluh rukur, labo erban mbiar.
8 Emaka ula kam mela ersaksi kerna Tuanta ntah pe kerna aku si ipenjaraken erkiteken ia. Tapi alu gegeh Dibata, ikutlah kam ngenanami kiniseran guna berita si meriah.
9 Kita nggo iselamatkenNa janah ilebuhNa jadi kalak si badia, labo erkiteken perbahanenta tapi erkiteken peratenNa ras lias ateNa si mbelin. Mbarenda nari nggo iberekenNa si enda man banta erkelangken Kristus Jesus.
10 Tapi gundari, lias ate si mbelin e nggo jelas teridah sanga icidahken Jesus Kristus dirina, eme Juru Selamatta, si nggo meneken kematen janah erkelangken berita si meriah nggo iperjelasna kerna uga kita banci ndatken kegeluhen si la banci kernep.
11 Guna berita si meriah e me aku isuruh jadi perberita, rasul, ras guru.
12 Erkiteken si e me maka kunanami kiniseran si bagenda. Tapi la aku mela perban kutandai Dibata si man baNa aku tek janah tek aku maka terus ijagaNa kerina si kubereken mana baNa seh asa wari e.
13 Teruslah jemak kata-kata si benar* si nggo ibegindu arah aku nari, janah teruslah buktiken kinitekenndu, kekelengenndu selaku kalak si ersada ras Kristus Jesus.
14 Alu kesah si badia si lit i bas dirita, jagalah erta si ialokenndu.
15 Enggo iteh kena maka kerina kalak si lit i bas Propinsi Asia nggo nadingken aku termasuk Pigelus ras Hermogenes.
16 Mbera icidahken Tuhan perkuah ateNa man keluarga Onesiporus perban rusur aku ipegegehina janah la ia mela aminna pe aku ipenjaraken.
17 Malahen, sanga aku i Roma, idaram-daramina aku janah dungna jumpa ia ras aku.
18 Mbera Tuhanta eme Jahwe ncidahken perkuah ateNa man bana i bas wari e pagi. Itehndu kel kerina kerna pelayanenna i Epesus.
Cataten i teruh
^ Ntah “si erguna.”
