2 Timotius 2:1-26
2 Emaka, kam o anakku, teruslah datken gegeh arah lias ate si mbelin si lit i bas Kristus Jesus.
2 Kai si nggo ibegindu i bas aku nari janah nggo isahken i lebe-lebe jelma si nterem, ajarkenlah e man kalak si setia si ngasup pagi ngajarkenca man kalak si deban.
3 Selaku prajurit Kristus si mehuli, ikutlah kam i bas ngenanami kiniseran.
4 Sekalak prajurit labo ikut campur i bas urusen bisnis,* gelah banci isenangkenna kalak si ndaptarken ia selaku prajurit.
5 Bage ka pe, i bas pertandingen, sekalak si ikut tanding, labo ibereken mahkota adi la ia ertanding menurut aturen.
6 Selain si e, sekalak perjuma si kerja keras patut inanamina asil si pertama arah jumana.
7 Teruslah ukuri kai si kukataken enda, janah ibereken Tuhan me man bandu pengangkan i bas kai pe.
8 Ingetlah maka Jesus Kristus nggo ipekeke i bas si mate nari janah ia me kesusuren* Daud si sue ras berita si meriah si kupeseh,
9 erkiteken si e me kunanami kiniseran janah ipenjaraken bagi penjahat. Aminna pe bage, kata Dibata labo igariken.
10 Eme sebapna terus aku setia ngadapi kerinana guna kalak si ipilih Dibata, gelah erkelangken Kristus Jesus, kalak enda pe iselamatken janah imuliaken seh rasa lalap.
11 Kata-kata enda banci iteki: Adi mate kita ras ia, kita pe pagi pasti nggeluh ka ras ia.
12 Adi terus kita setia, kita pe merentah pagi jadi raja radu ras ia. Adi situlak ia, ia pe pagi nulak kita ka.
13 Adi kita la setia, Dibata tetap nge setia, sebap la banci ilawanNa sipatNa ras tujunNa sendiri.
14 Teruslah ingetken kalak e kerna si e. Persingetilah* kalak e i lebe-lebe Dibata gelah la sijawapen kerna kata-kata, sebap si e la erguna janah banci erban rugi* kalak si megikenca.
15 Usahakenlah asa ngasupndu gelah jadi kalak si ngena ate Dibata, jadi si erdahin si la mela nandangi pendahinna, janah ngajarken kata Dibata* alu tepat.
16 Ula begiken ranan si sia-sia si erlawanen ras kai si badia, erkiteken ranan si bage erban kalak reh dauhna i bas Dibata nari,
17 janah ranan e jadi mbar bali bagi penakit gangren.* Himeneus ras Piletus ikut pembarkenca.
18 Enggo itadingken kalak e kebenaren. Ikataken kalak e maka kekeken nggo terjadi janah icedaina kiniteken kalak.
19 Aminna pe bage, pondasi si itamaken Dibata tetap paguh, janah i je lit tertulis,* “Itandai Jahwe kalak si jadi jangNa,” janah, “Ise pe si ngelebuh gelar Jahwe arus nadingken kai si la benar.”
20 I bas rumah si galang, lit peralaten si iban arah emas, pirak, kayu, bage pe taneh liat.* Lit si penting,* janah lit ka si kurang penting.*
21 Adi sekalak jelma ipedauhna dirina arah alat si kurang penting,* bali me ia bagi alat si penting,* ipebadia, ras erguna man kalak si mpunasa, janah banci ipake guna ngelakoken tiap dahin si mehuli.
22 Emaka, kiamlah kam nadingken sura-sura kalak si nguda denga, janah ayakilah kai si benar, kiniteken, kekelengen, kedamen, radu ras kalak si erlebuh man Tuhan i bas pusuh si bersih nari.
23 Selain si e, tulaklah ranan si bodoh janah ula ikut sijawapen i bas kai si la erguna, sebap itehndu maka si e erban perubaten.
24 Sekalak budak Tuhan la perlu rubati, tapi lembut min man kerina kalak, beluh ngajar, la ibalasna paksa ia irugiken,
25 janah alu lemah lembut iajarina kalak si nggit ngelawan, sebap banci saja ipediat Dibata kalak si bage ertobat gelah banci lit pemetehna si tepat kerna kebenaren,
26 janah jadi sadar jenari lepas ia arah siding Iblis si nangkap ia nggeluh-nggeluh guna ngelakoken sura-surana.
Cataten i teruh
^ Ntah banci saja “pendahin tep-tep wari.”
^ As. “benih.”
^ As. “Berekenlah kesaksin si jelas man.”
^ Ntah “kernep; kacau.”
^ As. “kata kebenaren.”
^ Penakit si erban badan jadi macik.
^ Ntah “lit meterai.”
^ Ntah “taneh dah.”
^ Ntah “mehaga.”
^ Ntah “kurang mehaga.”
^ Ntah “kurang mehaga.”
^ Ntah “mehaga.”
