2 Timotius 3:1-17
3 Ingetlah! I bas wari-wari pendungi pagi reh me masa si sulit si dem kiniseran.
2 Sebap manusia pagi ngkelengi dirina saja, mata duiten, tual, meganjang rukur, tukang hina, la patuh man orang tua, la meteh ngata bujur, la setia,
3 la lit kekelengenna, la nggit arih-arih, tukang pitnah, la ikuasaina dirina, merampus, la atena ngena si mehuli,
4 penghianat, keras kepala, sombong, lanai diatena Dibata tapi kesenangenna saja si idaramina,
5 tempa-tempa isembahna Dibata tapi la idalankenna kai nina Dibata. Kalak si bagenda ula deheri.
6 Piga-piga i bas kalak e nari masuk ku rumah-rumah alu cara si licik janah ipengaruhina diberu-diberu si lemah, si mbue dosana, ras si ikuasai erbage sura-sura.
7 Diberu-diberu e lalap erlajar tapi la pernah idatna pemeteh si tepat kerna kebenaren.
8 Bagi Jannes ras Jambres si nentang Musa, bage ka me kalak e terus nentang kebenaren. Tuhu-tuhu nggo ceda perukuren kalak e. Itulak Dibata kalak e erkiteken la nggeluh menurut kiniteken.
9 Tapi, kai pe lanai banci ilakoken kalak e, sebap jelas iidah kerina kalak maka kalak e motu, bagi si terjadi man dua kalak ndai.
10 Tapi kam, nggo tuhu-tuhu ikutkenndu kai si kuajarken, si kudalanken, tujunku, kinitekenku, kesabarenku, kekelengenku, ras kesetianku.
11 Janah itehndu maka aku isiksa ras ngenanami kiniseran i Antiokia, Ikoni, ras i Listera. Megenggeng aku ngadapi siksan e, janah iselamatken Tuan* aku i bas si e kerina.
12 Situhuna, kerina kalak si atena nggeluh sue ras peraten Dibata i bas persadan ras Kristus Jesus pasti ka nge isiksa.
13 Tapi kalak jahat ras penipu reh dekahna reh jahatna, itipuna kalak janah ia pe kena tipu.
14 Tapi kam, teruslah ikuti kerina si nggo ipelajarindu, si nggo itekindu kenca lit si erban kam tek, erkiteken itehndu ise si ngajarkenca bandu
15 janah mulai kin kam lahir nggo itandaindu Kitap si Badia si banci erban kam pentar janah iselamatken alu kiniteken man Kristus Jesus.
16 Kerina isi Kitap si Badia rehna i bas Dibata nari janah erguna i bas ngajar, ncidahken kesalahen, pekena kerinana, janah mereken disiplin guna ngelakoken kai si benar,
17 gelah budak Dibata tuhu-tuhu ngasup janah ilengkapi guna ngelakoken kerina perbahanen si mehuli.
Cataten i teruh
^ Bahasa Junani, Kyrios. Ntah banci saja “Tuhan.”
