2 Timotius 4:1-22
4 I lebe-lebe Dibata bage pe Kristus Jesus si nandangi nghakimi kalak si nggeluh ras kalak si mate paksa reh ia ncidahken dirina i bas Kerajanna pagi, kubereken bandu perentah:
2 Beritakenlah berita si meriah alu la tertaren-taren, i bas waktu si senang bage pe i bas waktu si susah. Berekenlah penginget, persinget, ras nasehat alu dem kesabaren janah bali bagi guru si beluh ngajar.
3 Lit pagi waktuna lanai ikutken kalak e ajaren si benar,* tapi sura-surana saja ngenca ikutkenna. Ipepulungna me guru-guru guna megiken kai si ntabeh akap cupingna megikenca.*
4 Lanai kalak e nggit megiken kebenaren janah iperdiatekenna me cerita-cerita si la tuhu.
5 Tapi, tetaplah kam sadar i bas keadan kai pe, megenggenglah ngadapi kiniseran, lakokenlah dahin selaku perberita,* janah lakokenlah pelayanenndu alu tutus.
6 Aku nggo bali bagi persembahen inemen si iamburken, janah nggo ndeher kel waktuna aku ibebasken.
7 Enggo erjuang aku alu mehuli, nggo kiam aku seh garis akhir, janah nggo kuikutken kiniteken kalak Kristen.
8 Mulai gundari nari, lit mahkota kebenaren si isikapken man bangku. I bas wari e pagi, Tuan eme hakim si adil, iberekenna me mahkota e man bangku jadi hadiah, janah labo man bangku saja, tapi pe man kerina kalak si nimai Tuan ncidahken dirina.
9 Usahakenlah gelah meter kam reh ndahi aku.
10 Enggo itadingken Demas aku erkiteken ngena atena doni* enda janah nggo lawes ia ku Tesalonika, Kresens ku Galati, bage pe Titus ku Dalmati.
11 Lukas nari ngenca ras aku. Babalah Markus radu ras kam, sebap banci isampatina aku i bas pelayanenku.
12 Tapi nggo kusuruh Tikikus ku Epesus.
13 Adi reh kam, baba mantelku si kutadingken i Troas i rumah Karpus, bage pe gulungen-gulungen kitap, terlebih-lebih gulungen si iban arah kulit nari.
14 Mesui kel kuakap iban Aleksander, tukang tembaga e. Jahwe me si mbalas ia sue ras perbahanenna.
15 Kam pe arus hati-hati nandangi ia, sebap megegeh kel ia ngelawan beritata.
16 Sanga tangtangna kubela diriku i lebe-lebe pemerentah, la lit si nemani aku. Kerina kalak nadingken aku. Mbera la itak-taki* Dibata si enda man kalak e.
17 Tapi Tuan tedis i deherku nemani aku ras mereken gegeh, gelah erkelangken aku, berita si meriah e tuhu-tuhu iberitaken janah kerina bangsa banci megikenca. Aku pe selamat arah babah singa nari.
18 Ipulahi Tuan me aku arah kerina kejahaten nari janah iselamatkenna me aku guna Kerajanna i surga. Imuliaken me ia rasa lalap seh rasa lalap. Amin.
19 Peseh salamku man Persila* ras Akuila, bage pe kerina kalak si lit i bas rumah tangga Onesiporus.
20 Erastus tetap tading i Korinti, tapi Tropimus kutadingken i Miletus perban ia sakit.
21 Usahakenlah reh ope lenga musim mbergeh.
Eubulus, Pudens, Linus, Klaudia, ras kerina turang senina si deban, kirim salam man bandu.
22 O turang senina, mbera semangat si icidahken kena ipasu-pasu alu lias ate si mbelin i bas Tuanta Jesus Kristus nari.
Cataten i teruh
^ Ntah “si erguna.”
^ Ntah “guna mpeseh kai si merhat kalak e megikenca.”
^ Ntah “teruslah beritaken berita si meriah.”
^ Nen Kamus.
^ Ntah “la iperhitungken.”
^ Ntah “Priska.”
