Epesus 2:1-22
2 Enggo iban Dibata kena nggeluh aminna pe kena nggo mate erkiteken kesalahen ras dosa kena.
2 Mbarenda kena nggeluh ngikutken doni* enda. Ikutken kena penguasa si erkuasa nandangi udara, eme cara rukur si lit i bas kalak si la patuh.
3 Situhuna perbahanenta pe mbarenda ngikutken sura-sura dagingta si erdosa. Siikutken sura-sura dagingta ras perukurenta si erdosa. Bali bagi kalak si deban, mulai kin kita lahir kita anak-anak si patut irawai Dibata.
4 Tapi erkiteken mbelin kel perkuah ate Dibata janah keleng kel ateNa kita,
5 ipegeluhNa kita janah ipersadaNa ras Kristus, aminna pe kita nggo mate perban dosata. Erkiteken lias ateNa si mbelin, iselamatken me kena.
6 Selain si e, ipekeke Dibata kita janah ipekundulNa kita i surga erkiteken ersada kita ras Kristus Jesus.
7 Alu bage i bas jaman* si nandangi reh, ibuktikenNa lias ateNa si mbelin alu ngelakoken kai si mehuli guna kita, eme kalak si nggo ersada ras Kristus Jesus.
8 Kena si erkiniteken nggo iselamatken erkiteken lias ateNa si mbelin. Kena iselamatken labo erkiteken usaha kena sendiri, tapi erkiteken pemere Dibata.
9 Enda labo asil pendahin kena, emaka ise pe labo lit alasenna gelah tual.
10 Kita kap si iciptaken Dibata janah kita iciptaken guna ngelakoken kai si mehuli erkiteken kita ersada ras Kristus Jesus. Enda me si itentuken Dibata mulai kin tangtangna nari guna silakoken.
11 O kena si rehna i bas bangsa si deban nari, ingetlah maka mbarenda “kalak si isunat” manusia nggelari kena “kalak si la isunat.”
12 Paksa si e, la itandai kena Kristus, terpisah i bas bangsa Israel nari, janah la ikut i bas perjanjin-perjanjin si erpalasken janji Dibata. La lit arapen kena janah la tandai kena Dibata sanga kena nggeluh i bas doni enda.
13 Tapi gundari, kena nggo ersada ras Kristus Jesus, emaka aminna pe mbarenda kena ndauh i bas Dibata nari, gundari kena nggo rembak ras Ia erkiteken dareh Kristus.
14 Sebap Kristus kap si ndameken kita, si mpersadaken dua pihak janah si ngeruntuhken tembok si nirangken kalak e.
15 Erkiteken nggo ikorbankenna dagingna, imasapkenna Undang-Undang Musa si risiken perentah si erban kalak e ermusuhen. Alu bage, dua pihak si ermusuhen e erdame janah ipersada ras ia guna jadi sada bangsa si mbaru.
16 Alu tiang siksanna,* iban Kristus dua pihak e jadi sada daging janah idamekenna kalak e mulihi ras Dibata. Erkelangken kematenna, nggo imasapkenna permusuhen e.
17 Reh ia janah iberitakenna berita si meriah kerna perdamen man kena si ndauh arah Dibata nari bage pe man kalak si rembak ras Ia.
18 Erkelangken ia, kerina kita eme si dua pihak e banci bebas ndeheri Bapak, erkiteken nggo sialoken kesah si badia si seri.
19 Emaka, kena lanai bo kalak asing ntah pe kalak pertandang. Gundari nggo seri warga negara kena ras kalak si badia, janah kena nggo jadi anggota keluarga Dibata.
20 Kena nggo ibangun i datas sada pondasi, eme rasul-rasul ras nabi-nabi, tapi Kristus Jesus jadi batu pondasi si utamana.
21 Kerina bangunen si ersada ras ia janah si tiap baginna ersada alu mehuli, reh belinna janah jadi rumah pertoton si badia man Jahwe.
22 Kena si ersada ras ia pe radu ras ibangun jadi ingan tading Dibata, erkiteken kesahNa si badia lit i je.
