Epesus 3:1-21
3 Aku, Paulus, ipenjaraken erkiteken Kristus Jesus guna kena si rehna i bas bangsa si deban nari.
2 Pasti ibegi kena maka nggo ibereken tanggung jawap man bangku jadi pengurus rumah, gelah banci kusampati kena ndatken manpaat arah lias ate Dibata si mbelin.
3 Ipebetehken man bangku kerna rahasia si badia si ndai kutulisken alu gendek.
4 Emaka sanga ibaca kena e, banci iteh kena maka nggo kuangkai rahasia si badia kerna Kristus.
5 I bas jaman si nai, rahasia si badia e lenga kerinana kel ipebetehken man manusia. Tapi gundari, si e nggo ipebetehken kerinana alu kesah si badia man rasul-rasul bage pe man nabi-nabiNa si badia.
6 Enda me rahasia e: Erkiteken berita si meriah, kalak i bas bangsa si deban nari si ersada ras Kristus Jesus, ikut pagi jadi ahli waris radu ras ia, bage pe jadi anggota i bas daging si seri, janah ikut i bas ngaloken kai si nggo ijanjiken Dibata man kami.
7 Erkiteken lias ate Dibata si mbelin, aku jadi pelayan guna rahasia e. Alu kuasaNa, iberekenNa pemere enda bangku.
8 Asangken kalak si kitikna i bas kalak si badia, kitiken denga ka aku. Tapi ibereken Dibata man bangku lias ateNa si mbelin, alu bage banci kupeseh berita si meriah man bangsa si deban kerna pasu-pasu arah Kristus nari si la terkira,
9 janah banci kusampati kerina kalak ngangkai kerna pengaturen rahasia si badia, si nai nari ibuniken Dibata si nciptaken kerinana.
10 Emaka, erkelangken runggun, gundari pemerentah-pemerentah ras penguasa-penguasa i surga banci meteh kerna kepentaren Dibata si erbage-bage.
11 Si enda sue ras peratenNa si tahan rasa lalap, si nggo itetapkenNa gelah terjadi erkelangken Kristus Jesus Tuanta.
12 Perban erkiniteken man Kristus, banci kita bebas ngerana janah la kita ragu ndeheri Dibata.
13 Emaka kupindoken man kena gelah ula kitik ukur kena ngidah kiniseran si kunanami guna kena, sebap kiniseranku e maba kemulian man kena.
14 E me sebapna erjimpuh aku i lebe-lebe Bapak,
15 si erkiteken Ia kerina keluarga i doni bage pe i surga jadi lit.
16 Kutotoken man Dibata si dem alu kemulian gelah ipegegehiNa pusuh ras perukuren kena alu gegeh kesahNa si badia,
17 bage pe gelah tading Kristus i bas pusuh kena alu kekelengen perban kena erkiniteken. Mbera rurat kena janah ibangun i datas pondasi,
18 gelah bali bagi kalak si badia, kena pe tuhu-tuhu ngangkai uga belangna, gedangna, ganjangna, ras bagesna kebenaren e,
19 janah iteh kena kekelengen Kristus si ulin asangken pemeteh. Alu bage kena banci dem alu kerina sipat-sipat Dibata si iberekenNa man kena.
20 Alu kuasaNa si erdahin i bas dirita, banci ilakoken Dibata ndauh buen asangken kerina si nggo sipindo ntah pe siukuri.
21 Man baNa me ibereken kemulian erkelangken runggun bage pe erkelangken Kristus Jesus, rasa lalap seh rasa lalap. Amin.
