Epesus 4:1-32
4 Aku, Paulus, si ipenjaraken erkiteken Tuan, mindo aku gelah perbahanen kena bali min bagi kalak si ilebuh Dibata,
2 eme terus meteruk ukur, lemah lembut, sabar, ras megenggeng man kalak si deban erkiteken keleng ate,
3 janah usahakenlah njaga persadan si ibereken kesah si badia, bage pe nggeluhlah alu dame.*
4 Sada ngenca daging, sada ngenca kesah si badia, janah kena pe ilebuh Dibata guna sada arapen.
5 Sada Tuan, sada kiniteken, sada peridin,
6 sada Dibata si jadi Bapak man kerina jelma, si erkuasa nandangi kerina janah erdahin arah kerina bage pe i bas kerinana.
7 Enggo ibereken Dibata man banta sekalak-sekalak lias ateNa si mbelin, si e teridah arah cara Kristus mereken pemere e banta.
8 Sebap lit tertulis, “Sanga ia nangkih ku ingan si meganjang, ibebaskenna piga-piga tabanen, janah ijadikenna kalak e pemere.”
9 Kai kin ertina “ia nangkih”? Ertina eme pernah ia nusur ku doni.
10 Ia si nusur e, ia ka nge si nangkih ku ingan si ganjangen asangken kerina langit, alu bage banci idemina kerinana.
11 I bas pemere-pemere e, lit piga-piga si jadi rasul, nabi-nabi, perberita, permakan, bage pe guru.
12 Tujunna mereken pemere e guna mpekena kalak si badia gelah erdalan i bas dalan si benar, ngelayani, janah mbangun daging Kristus,
13 seh asa kerina kita ersada i bas kiniteken janah lit pemetehta si tepat kerna Anak Dibata. Alu bage kita jadi dewasa janah dungna seh kita ku tingkat kedewasan Kristus.
14 Emaka ula nai kita bagi anak-anak, si iombang-ambingken bagi galumbang janah iembus angin ku jah ku je alu erbage-bage ajaren palsu arah penipu nari si make cara si licik.
15 Tapi katakenlah kai si benar, teruslah kita sikeleng-kelengen janah reh belinna i bas kerinana gelah seri kita ras Kristus, eme kap takal.
16 Ibanna kerina anggota daging e ersada alu mehuli janah kerina anggota daging e erdahin ras-ras ngelakoken tugasna sendiri. Adi kerina anggota daging e erdahin alu mehuli, daging e reh belinna janah ibangun alu kekelengen.
17 Emaka i bas gelar Tuan, kukataken janah kubereken kesaksin maka kegeluhen kena lanai banci bagi kalak si lit i doni enda, erkiteken kalak e ngikutken perukuren si sia-sia.
18 Perukuren kalak e gelap janah ndauh arah kegeluhen si rehna i bas Dibata nari, erkiteken kalak e la ermediate janah pusuhna la erpenggejapen.
19 Erkiteken pusuh peraten kalak e lanai erpenggejapen emaka ilakokenna perbahanen si la meteh mela.* La kalak e pernah puas ngelakoken kerina si najis.
20 Tapi nggo ipelajari kena maka Kristus labo bage.
21 Jesus ngajarken kai si benar. Adi nggo ibegi kena ajarenna pasti tuhu-tuhu iteh kena kerna si e.
22 Enggo kena iajari gelah itangtangi kena sipat-sipat si ndekah eme perbahanen kena si mbarenda, erkiteken sipat-sipat e nggo icedai sura-sura si nipu.
23 Cara kena rukur arus terus iubah,
24 janah arus ipake kena sipat-sipat si mbaru si iban menurut peraten Dibata janah sue ras kebenaren bage pe kesetian situhu-tuhu.
25 Emaka gundari, ambekkenlah kerina ranan si la tuhu. Tiap kalak arus jujur nandangi sada ras si debanna, erkiteken kita anggota sada daging.
26 Adi merawa kena, ula seh asa erdosa. Ula sempat kena merawa sada warin.
27 Ula bere kesempaten man Iblis.
28 Kalak si nangko ula nai nangko. Erdahinlah ia alu mehuli guna ncariken keperlunna, gelah lit i bas ia si man berenken ku kalak si deban si merluken.
29 Ula pediat ranan si la mehuli ndarat arah babah kena nari. Tapi katakenlah kai si mehuli guna mpegegehi paksa iperluken, gelah erguna man kalak si megikenca.
30 Janah ula iban kena ceda ate kesah si badia. Kena nggo ibereken tanda alu meterai eme kesah si badia, guna mbebasken kena arah tebusen i bas wari keselamaten.
31 Tadingkenlah kerina perasan dendam, merawa, ngamuk, serko, janah ngisakken, bage pe kerina si la mehuli.
32 Tapi melias janah mesayanglah kena sada ras si debanna, ampunilah sada ras si debanna, bali bagi Dibata nggo tuhu-tuhu ngampuni kena erkelangken Kristus.
